طمنيني عنك وشلونك عسا حالك بخير
كيف هي دنياك واوضاعك عسا وقتك تمام
وعلميني في بعادك جفنك المغرم سهير
او حكايتنا روايه صاغها حلو المنام
لو سالتيني انا ضامي على جم الغدير
ما تذوق خافقي شربة بعد صدك حرام
يا اميرة خاطري شوفيني ببعدك كسير
كل ما دور كلام العشق ضيعت الكلام
عن بوارق ضحكتي جفني بنظراته ضرير
صايمن لو كان مايجزا بحسنات الصيام
انوي السجه واهون لا مراح ولامسير
مابقا لي شف وانتي كل شفي والمرام
اه لامنه تبسم طيفك الساحر عصير
تحضنه دمعات عيني فرحه وحزن وهيام
ياوجودي كيف ضاع العشق في وقتن قصير
واكسفت شمس الوصل من دون دخان وغمام
ليت شوفك صدق وافرش لك من اشواقي حرير
واشعل ضلوع الوله لعيونك ان حل الظلام
واكتب بحبر الوفاء الين مثواي الاخير
ما ابي غيرك غلا ولا ابي غيرك غرام
ليه لان الود والاحساس في صدري نفير
في غيابك من عهودك مابعد حلت حرام
تحتري صوت الفرج في رجعتك ولا البشير
وترتجي نار الهوى ترجع ذعاذيع وسلام
روحي تشوفك كبيره بالغلا واني كبير
وسط روحك لي مداهيل واحاسيس ومقام
لاحظي حرف الشعر للحين في حكمك اسير
وان تغنى بك سجع بنغامه اسراب الحمام
بشريني لو بكلمه خلي الخافق يطير
وانهلي مني الوفاء بيد الوله والاهتمام
العرض الشجري
