من الحياء=خــجــلان
خجلان ياكيف الوفا مادمت اطوّل فالغياب=إن كان ما رد الجميله وقتها مايعذروني
منهو يقصّر بالجميل الفين عيب(ن) به يعاب=إن كان قصّرت العذر بالله لا لا تقطعوني
غصب(ن) عليـّـه غبت لكن من يغيب اليوم جاب=من القصايد قاف جبته ليتكم لو تسمعوني
كنت الف بهالزمن لفيت كم دقيت باب=ابواب عــيــّــت تنفتح حتى العرب ما كلموني
اشكي غرام اللي احب ومن هواه القلب ذاب=الصاحب اللي كم بكت لجله من الفرقا عيوني
ماغفت عيني ولاني طيب(ن) والقلب طاب=ماذقت طعم النوم مدري ليه بس مارقدوني
سهران اساهر فالنجوم تغيب في وسط السحاب=إن غابت النجمه بكيت ولا بدت تضحك سنوني
افرح ليا شفت النجوم ارسل مع النظره خطاب=اكتب على سطح القمر بالله لاتخلف ظنوني
كل الكواكب لي حروفي والسما صارت كتاب=اقراه كل الوقت حتى إن الليالي حفظوني
من قال سيف الوقت حده قلت انا للوقت ناب=الوقت مثل الذيب لكن قلته وماصدقوني
ماصدقوا قولي وانا اللي من صروف الوقت شاب=شابت رموش العين لكن كيفهم لو كذبوني
اربع سنين(ن) عشتها فالحب انا كني مصاب=انصاب من رمش العيون اللي تعنوا يذبحوني
انزف وانا كلي جروح اضما واطارد لي سراب =اضما وشوف الما بيدين اللي قهر ماشربوني
عزي لحالي كان حتى ما اطول من الشراب=الموت احسه غصتي فالريق ليه مايرحموني
هذا وانا نايف وكم عدوني من عد الذياب=اليوم ادور لي على اللي بالعدد لو يحسبوني
امسيت في داري وردد عاشق(ن) والله تاب=اخطيت لكن مثلكم كم من خطا لي سامحوني
منهو عرف للحُر قال الحُر مايحسب غراب=إن كان انا حر(ن) فكيف بكفهم قد طيروني
طاير واحس إني اطير ولا اوقع فالتراب=إن كان لي منزل تراهم عالي القمه يجوني
هذا ختام القول اقوله من حسب يحسب حساب=إن الكلام إلناس قصد وليتهم بس يفهموني
احبتي الكرام
السلام عليكم ورحمة الله وبركاته
للحق اقول انني شعرت بالخجل حينما راجعت قصيدتي
( إن كان لك قلب )
فوجدت تعليقات الأوفياء
( معدي المراقيب - ساني ظلام الليل - طارق اليامي - راعي العلياء - بدر الشمال - سلمت ولا هنت - مهاجرة )
حين قرأت مشاركاتهم شعرت بالخجل حين احسست انني اطلت الرد والتعليق على تعليقاتهم الرائعة .
فلم اجد ما ابرر به غيابي إلا بقصيدة
( من الحياء خجلان )
بها حاولت ان اعتذر اولا
ثم ابرر غيابي
علماً ان القصيدة كذلك كانت تيلاد اللحظة ونقل الكيبورد مباشرة
فمن الفكر للكيبورد
لذا اعتذر غلى اي ملاحظات بها حيث لم يسعفني الوقت للتعديل او التبديل
وكلي آمال ان يتقبلوا إعتذاري
اخيكم المحب للجميع
نايف الشريف
العرض العادي
