كئيب من الشقا ولا جريح من الجفـا ياليـل
دخيل النجمتيـن إللـي بصـدرك لا تعنيٌنـي
دخيلك ما دخلت ألا لغيـرك والدخيـل دخيـل
وأنا ما عاد إللي غيرك في هالدنيا يخاوينـي
يكفيني مـن الدنيـا أشوفـك للظـلام تميـل
معك ضو القمر ولا النجـوم إللـي تكفينـي
عقب هاك الوليف إللي تركني للعنـا والويـل
ياليته مـا تركنـي للغثـا والليـل ممسينـي
ألا ياليل لا منك نويـت مـع الظـلام تخيـل
أخذني من تحت جنـح الظـلام ولا تخلينـي
تراني ما تحملت العقايب من كثر مـا أشيـل
عذابي مع عذابك يا عذابـي لـي عذابينـي
علامك يابعد حيّ القوافـي والقمـر وسهيـل
علامك كل ما شفتك تقـول أنـك تعزيٌنـي !
علامك تترك العبره من عيون السحاب تسيل
تنٌشدني عن الغايب ويردفهـا دمـع عينـي
إذا غيابه مّكدر خاطرك يا صاحبـي بالحيـل
ترى غيابه مخلي صاحبك مثـل المجانينـي
مغير أسولف لحالي تقول إني غديت أخبيـل
وأقول إن السوالف ما تزين إلا مـع الزينـي
أنشهد ما هقيت إنه عن ربوع الخفوق يحيل
عزاي لقلبي إللي ماخذه من صدري سنينـي
ياليت أنه يقدر ما أقوله مّيـر صـار بخيـل
أمدله اليدين ويقصٌـر إيدينـه عـن يدينـي
أمانه لا تشٌره لا عدمتك من بعـض هالقيـل
تجٌمل وأترك الشرهـات للـي مـا يدانينـي
ما دام أني خليل(ن) ما تخلا عن عيون الخيل
أجل تستاهـل الفنجـال لا سقتـه باليمينـي
يذكرني سوادك في عيـون مجـدلات الذيـل
عساني ما أعدمك يا هالعيون إللـي تنادينـي
نعم دوك القوافي ثم تذٌوقهـا بطعـم الهيـل
إلين إنك تقـول أرجـوك تكفـى لا تبكينـي
كريم(ن) وأنت تستاهل ولا من عٌودت حلحيل
وأظنك عارف ٍ طبعي قبل لا جيـك وتجينـي
ياليت إني عرفتك في زمان ٍ غير عن هالجيل
ما دام إنك تحس بلوعتـي والهـم طاوينـي
خلاص أرجوك لا تبكي وأنا عنيت لي منديـل
خلاص أرجوك خل الحزن من بينك ومن بيني
توكلنا على الله وحسبنـا الله ونعـم الوكيـل
سبع مرات أرددها وأقـول آميـن آمينـي !
.
العرض الشجري
