آخر الحب
كنت احسب اني عرفت الحب قبل اعرفـك
وعشقت قبل اعشقك واشتقت قبل التقيك
وكنت احسب اني لقيت احباب قبل اوصلك
واثري توهمت في غيرك وانا كنت ابيـك
تعال نعطش وتشربني وانا اشربـــــك
تعال قبل الوعد اجلس معي نحتريـــك
تعال شفني وانا استناك كم اشبهــــك
يطري علي الف راي و راي واحتار فيـك
اجي مكان الوعد والا اسبقه انطـــرك
والا آخذ الموعد اللي يحتريك واجيـــك
يا آخر الحب ذقت الحب في اولــــك
ويا اول الشوق اقصى الشوق ما ينتهيــك
علمتني كيف اعرفك لين صرت اجهلـك
ضيعتني في متاهاتك وكنت ارتجيـــــك
حبيب الاحلام يابعدك ويامقربــــك
حرام يكفي تبعثرني وانا احتويــــــك
ان شفتك بحلم صدقته وانا اتوهــمك
وان شفتك بعلم كذبته الين انتشيـــــك
اخاف اغمض عيوني وان رمشت افقـدك
واخاف افتح وتصبح حلم ولا التقيــــك
العرض العادي
