دق مهند الجرس وهو كان يدق جوالي وماكنت بحاله ولا بحال شي خلاص احسني بديت اتلاشى النزيف يزيد والألم فظيع .. فتحت له الشغاله وجا لغرفتي على طول وأول ماشافني نيمني على ظهري واعطاني ابرة في فخذي توقف النزيف بعدين جاب قميصي لبسني اياه وشالني بعد مالف عبايتي علي وطرحتي على راسي ..!
صحيت بالمستشفى وانا تعبانه فتحت عيوني شفت شكل مو غريب علي بس من زمان عنه
: خالتي .؟
كان صوت خالتي تبكي : هلا يمه الحمد لله على سلامتك
: راح ماقدرت احافظ على ولد مهند
: لا تبكين يايمه وعسى ان تكرهوا شيئاً وهو خيرٌ لكم .
: خالتي تكفون لاتقولون مات الجنين .
سكتت خالتي وقعدت تبكي وتمسح على راسي بيدها وتسمح دموعي بمنديل .
دخل علينا مهند وهو يبتسم ولا كأن شي صار .. بس لمن شافني ابكي جا عندي بسرعة قال : لا ياديمه لاتبكين ياعمري ...
قاطعته وقلت : مهند ماقدرت احافظ على ولدك .
: موبيدك ياعمري بعدين ماتدرين يمكن ربي كاتب لنا خير .. جلس بجنبي على السرير وكمل : عمري انتي تعرضتي لصدمات عصبيه في بداية حملك انا توني شايف ملفك عندك اكتئاب حاد ... وكان المفروض ماتعرضين نفسك لأي صدمة او زعل او حزن وانتي زي ماقلتي لي كنتي تبكين بشكل فظيع اكيد بيصير نتيجه عكسية على الجنين ..!ويمكن ربي فكنا منه اذا فيه شي .
مسك يدي وباسها قال : بنجيب عشرة لاتحزنين على هذا ..
: مهند هو مات اكيد .
: ايه والله مات ؟ياعمري بس لايضيق خلقك .
: آسفه حبيبي ماكنت ابغى يصير كذا بس غصباً عني ..
: ياعمري انا اللي آسف اذا فيه احد مسؤول عن اللي صار لك فهو انا .. لو دريت ان هذا بيصير لك كل هالتعب مااخذتك معاي .
تكلمت خالتي : مهند وش تقول انت .
: يمه البارحه ديمه معاي طول الليل ومارجعتها الا الصباح قبل اداوم .
: ههههههههههههه وانا اقول الرجال انقلب حاله ورجع لنا يضحك ويسولف ومستانس اثري ديمه في الموضوع
ابتسمت اجامل خالتي وانا بداخلي مكسورة ولدي مات والله مقهورة كنت مرة متحمسة يجي لي ولد ولا بنت واسميه واربيه ابي فيه من خالي ناصر كثير ومن ابوه كثير ومن عناد اخوي كثير ومن ابوي الله يرحمه اشياء كثيييرة .. وابي بنت تصير زي خالتي سمر ذكيه وعاقلة ولبقه وجميلة بربيها بطريقتي ..
انتبه لي مهند ودموعي تنزل .. جلس بجنبي ولف يده من ورى ظهري
: حبيبة مهند ليه دموعها تنزل ؟ انا ماقلت لك لااشوف الدموع هذي .
: مقهورة ان صار لولدنا كذا
: ياعمري لاتنقهرين وعسى ان تكرهوا شيئاً وهو خيرٌ لكم
: مهند كنت فرحانه فيه شو يضمن لي الحين اني راح اجيب منك عيال
: ههههههههههههههههههههه والله انك شكاكة وخوافه الحين بروح انهي الموضوع ياعمري لاتخافين.. ابيك تجين لبيتك عند امي تراعيك وانتي تعبانه ..
: .......................
تكلمت خالتي : ديمه لاتخافين انتي لمهند ومهند لك ماني كارهة ولدي ارميه لنار بنت سعود وامها .. وعلى قولة مهند انتي جنته يتركك ويروح لنار غيرك .
: خالتي اذا فيه احد بيشاركني بمهند مااقدر اعيش معه .. اذا بيصير لي لوحدي جيته الحين قبل شوي .
تحرك مهند من عندنا على طول وخرج من الغرفه قلت : خالتي
: هلا وغلا
:مهند ترى مانام راح للمستشفى مواصل
: لا ماعليك راح مالقى مرضى وماعنده الا موعدين ماجوا المرضى ورجع للبيت يرقص ويغني وجايب لنا فطور الساعه عشرة ونام لين دق عليك
: الحمد لله انه نام كنت شايلة همه انه مواصل وانا تعبته معاي
مدت علي خالتي كاسة حليب قالت : لاتقولين هالكلام يمه .. بس انا عاتبه عليك يوم خبيتي علينا حملك .
نزلت الكاسة على الطاولة اللي بجنبي قلت : صدقيني ياخالتي عشان مهند حتى اسألي خالي انا ماكنت ابغى مهند يتعذب اكثر يكفي فراقي تبغينه يشيل هم فراق ولده .
: لا يمه لو علمتيه كان صار له حجة عند ابوه وافتكينا من وجع الراس والصدمات اللي تجيك بس كل شي مقدر ومكتوب
: خلاص انا رضيت بالقدر وحكم القدر علي وفوضت امري لله بكل اموري
دخلت علينا ريم وسلمت علي وهي تبكي .
: الحمد لله على السلامه ... اجل يوم نفرح انك حامل على طول يموت
: كل شي مقدر ومكتوب ياريوم .. والله يسلم قلبك .. فين رانيا ليه ماجات
: رانيا زعلانه على البيبي وبتجي تزورك مرة ثانيه
: ياليتها جات مرة مشتاقة لها .
قالت خالتي : كلنا والله مشتاقين لك .. ويشهد الله اني بغيت ازورك كم مرة بس مهند يردني يقول ان خالك يقول ماابيها تتعب اكثر اذا شافتكم .
: صدقيني ياخالتي وانا بعيده عنكم ماكنت عايشة مع الناس .. صحيح ان خالي وهدى مدلليني ومخليني على كفوف الراحه وماينقصني شي .. بس كل مااتذكر اني بعيده عنكم وعن مهند واتذكر حال مهند وحزنه اموت من القهر .
: الله لا يقهرك يايمه .. ياديمه احنا ظلمناك ومن يوم طلعتي من بيتنا وحالنا مو حال اوادم .. مشاكل والبنات زعلانات من ابوهن مايكلمنه وهو طول الوقت معصب حاس بظلمك وقهر لولده .. ومهند عنده يسوى الدنيا ومافيها بس وش تقولين براسه اليابس .
قطع علي قبل ماارد عليها جوالي اللي دق .. كان خالي ناصر تحمد لي على السلامه بعدين قعد يلوم نفسه كيف راح وتركني بالشكل هذا وليه يخليني اروح مع مهند ,, بصراحة احرجني ماكان عندي كلام اقوله .
بس غيرت الموضوع وقلت : متى بترجعون ؟
: بشوف زوجك وارد لك خبر
: طيب خالي لاتشيل همي ترى خالتي عندي
: لا لا بنرجع ماتدخلين بيتهم ومهند هذا حاله
: خالي ماراح اخرج من المستشفى قبل اربعه ايام يعني لاتجي الحين وخالتي معاي بالمستشفى واذا خرجت بروح بيتك
: اخاف الخبل هذا يضغط عليك تروحين معاه
: ههههههههههههه خبل هاه ..؟ لا لاتخاف مااروح مع خبل انا
: ههههههههههههه ايه خبل ونص ولا فيه واحد ....
: خاليييي
: خلاص خلاص
: لاتقول الكلام هذا لاحد
: ماني قايله بس اذا جا خليه يدق علي .. ادق عليه من اليوم مايرد .
: حاضر بعدين لاتلوم نفسك .. ولا تعصب ولاتزعل على شي ربي اختاره لنا .
: يالله الله يعوضك بأفضل منه .
: خالي انا كنت امر بصدمات عصبية ممكن انها اثرت على الجنين .
: والله ..؟
: يقوله مهند ..
: حسبي الله على من كان السبب
: الله يعوضنا خير
: اللهم آمين .. واهتمي بنفسك ياديمه عشان خاطري
: ابشر يالغالي بس انت لاتشيل همي انا بخير وخالتي بجنبي حتى تأكلني بنفسها .
: جزاها الله خير .. ويالله مع السلامه .
: مع السلامه . بحفظ الله .
جلست مع خالتي وريم وخالتي كل شوي تعطيني شي آكله وانا احسني شبعانه آخر شي ترجيتها تستنى شوية ماعدت اقدر آكل احس معدتي مليانه .
دخل علينا مهند بعد ثلاث ساعت تقريباً على الساعه عشرة بالليل وكان مبسوط ..سلم على امه بعدين قرب مني وباس جبيني قال ابشرك فرجت وبتطلعين من المستشفى على بيتي .
: صدق مهند
: وربي صدق ياعمر مهند
: يارب
تكلمت خالتي : مهند كل هذي فرحة يمه اللي يشوفك مايقول ان ولده ميت
: يمه بيجيني ولد ثاني وثالث ورابع ن شاء الله .
تكلمت انا : صحيح مهند شو نوع الجنين
: ولد
: الحمد لله على كل حال
خالتي : يالله يارب العباد عسى مثل الايام هذي من السنه الجيه ازورك هنا وولدك في حضنك
: آمين يارب
تكلم مهند : يمه خلوني انبسط شويه والتفت لي : ديمه بهالسرعه حملتي كان استنيتي شويه
: هههههههههههههههههههههه بيدي هو
قالت خالتي : أي سرعه حرام عليك ترى لك سنه متزوجها
ضحكنا انا ومهند وهو قال : هههههههههههههههههههه سنه كأنها شهر ولا اقل .
كنت بين فترة وفترة احس بمغص في بطني بس آخذ حبتين مسكنة وبعد شوي يهدي عني .
جاب لنا مهند عشا من البيت مسويته سميرة بطلب من خالتي .. انا ماقدرت ادخل في معدتي شي لأني شبعانه بس عشان خالتي اللي تحلف علي كل شوي اكل كمان لو لقمه .. طفش مهند من كثر ماتحلف علي خالتي وانا اترجاها تكون آخر لقمه ومسك الملعقة وجلس يأكلني بنفسه .
: افتحي فمك هذي بس
: مهند والله مو قادرة ترى برجعه
: بس هذي ياعمري
اكلتها وانا احس ماعاد فيه مكان للأكل
:كمان هذي ديوم
: مهند والله مافيه مكان
: لاعمري باقي الحليب
: شو ..؟ فين احطه هذا كمان لا مهند الله يخليك مااقدر
: هههههههههههههههههههه طيب خلاص مانبي نغصبك اكثر
تدخلت خالتي بكلمة تمنيت انها ماقالتها لأني مبسوطه وماابغى مهند يروح من عندي .
: مهند يمه ماتبي تروح ولا خايف ان ديمه تخرج من المستشفى وماعاد تشوفها .. قوم يمه روح نام بكرة وراك دوام ..
التفت لخالتي ورجعت اطالع بمهند اللي ناظر في امه بلوم
قال : يمه عندي ثلاثه ايام اجازة .. وانا الحمد لله ماعندي ضغط في المواعيد .. خليني اجلس مع القمر هذا لأنه خلاص ماراح يفارقني .
قلت وانا ابتسم له : مهند شوف ريم فينها ترى من اليوم برا .
مهند وهو يبتسم : اش عليك في ريم تلاقينها تكلم ياسر .. ماتبوني اقولكم على الخبر الحلو ؟
: خبر شو ؟ قول ترى انا محتاجه افرح .
: من اليوم ورايح بتفرحين لايهمك شي
: ممممممممممممممممم قول حمستني
خالتي وهي على اعصابها : قول يمه عساه خير
: اليوم رحت لسعود ... التفت عليّ وانا احس بطني قلب علي والمغص زاد بس تماسكت عشان اعرف شو نهاية كلامه يمكن خير ..
كمل مهند .. قابلته بعد ماسلمت عليه يحسب اني جاب بحدد موعد الملكة ولا الزواج . قال : هلا بالدكتورمهند مابغيت تزورنا .طولت ماجيت تحدد معانا الملكة .
قلت له : اعذرني ياابو عادل انا جايك من دون علم الوالد وابي اقول لك اللي عندي وعساك تكون متفهم وماتاخذ على خاطرك ولايجي براسك شك انا عايفينك .. شفت لونه تغير وكشر قلت له : اصبر الله يطول بعمرك بقول لك كل اللي عندي وانت احكم في الأخير . مارد علي وكملت له : ابوي خطب منك وانا وزوجتي بينا سوء تفاهم وحن علي ابوي قال بزوجه من دون ماياخذ رأيي ولا يشاورني بالعكس كان بيفاجأني يحسبني بفرح اناو الله تكدرت من فكرة الزواج الثاني كله لأني احب زوجتي واغليها .. زوجتي رجعتها وانا والله ياابو عادل ماودي آخذ بنتك واظلمها ماارضاها على بنتك مثل ماني ماارضاها على وحده من اخواتي ولا انا مستعد ياابو عادل آخذها اليوم قبل بكرة عشان مااحرجك واحرج ابوي معاك .. لكن النفس وماتهوى وانا ماارضى الظلم على بنتك .. سكت ابو عادل مارد علي ثم تكلم وقال : الله يوفقك والوجه من الوجه ابيض لو ابوك قال لي هالكلام مازعلت والغصيبة ماارضاها عليك ولا على بنتي ..
سلمت على راسه واستأذنت وجيتكم وانا احس ان هم الدنيا كلها طاح من على قلبي ..
التفت مهند عليّ وابتسم : هاديوم حبيبتي ماعاد فيه شي يمنع ترجعين لي .. لو اني داري ان الأمور هينه كذا كان من زمان خطيت هالخطوة ولا انتظرت كل هالشهور بعيد عنك .
تكلمت خالتي قبلي : يمه روح الحين نام وبكرة من الفجر كلم ابوك لأن يمديه نام الحين .غيرت خالتي لهجتها وشددت على مهند قالت : وكلمه باسلوب حلو مهند تفاهم مع ابوك باحترام وبدون ماترفع صوتك .
وقف مهند وسلم على راس امه قال : الله يخليك لي بس .. انا من متى رفعت صوتي على ابوي ولا كلمته بدون احترام .. واذا بينت له ان كلامه مو عاجبني معناتها اسلوبي مو محترم ؟ .
: يامهند يايمه الموضوع هذا بالذات بيزعل ابوك انتبه انا بس انبهك وابيك تاخذ ابوك بالسياسة وانت شاطر تقدر تأثر عليه بكلامك ولاتنسى انه يحبك ويغليك .
: الله يخليكم لي بس . لاتشيلين هم مالك الا من يرضيه .
خرج مهند من عندي .. ونمت بعد نص ساعه تقريباً لأني تعبانه من الصباح .. .. فتحت عيني على الفجر شفت خالتي بجنبي على سرير ثاني ونايمه . .
قمت للحمام واخذت لي شور وبدلت ملابس وخرجت جلست وانا مغطية راسي بمنشفة كبيرة .. لأن خالتي منبهه عليّ مااتحمم الا اذا بحافظ على نفسي من البرودة لأنها مو كويسة للي في حالتي .
دق الباب وشفت عمي دخل .. قامت خالتي على صوته وصبحته بالخير ودخلت دورة المياه تغسل .
قال عمي : وشلونك ياديمه الله يعوضك خير يابنتي .
: الله يسلمك ياعمي ويعافيك .
: والله ياديمه ماذقت النوم مثل خلق ربي من يوم ماطلعتي من البيت .. خوفي على مهند نساني حتى نفسي . انا تورطت يابنتي بكلمتي مع الناس ولو دريت انكم بتتصالحون وترضين عليه ماسويت اللي سويته .. جيت ابي اكحلها واهني مهند وانسيه حبك ولقيتني اعميها وادخله الحزن بيدي . لكن
كان وجه عمي متغير مبين انه فعلاً ندمان وانا قاطعته خفت من منظره مااحب اشوفه منكسر ولا مستحي مني او منحرج قلت : لاتقول شي ياعمي انا مالمتك وعمري ماحملتك الذنب من حقك تخاف على ولدك وتحرص على سعادته . واللي صار امتحان من ربي لي انا ومهند اكثر شي والحمد لله على كل شي .
: الله يستر عليك يابنتي انا اشهد انك بنت اصول .
تكلمت خالتي : ابو مهند مهند كلمك .
قاطعها قال : مايحتاج يكلمني اللي كلمني سعود بنفسه وقال ان مهند جاه واعتذر منه وقال لي انه مافي خاطره علينا شي ومايحتاج ننحرج منه ...انا غلطت بحق ولدي وحق ديمه قبل .. التفت عمي علي وقال : انا ناوي اراضي ديمه ومهند على الله يرضون علي . سكت وكمل : اللي صار لك ياديمه كله باسبابي .. لكن الله يقدرني واعوضك وانا ابوك .
: الله يخليك لنا ياعمي وانا اذا عرفت قلب الانسان تصرفاته مااقيس عليها شي وانت قلبك كبير وطيب ياعمي وتأكد ان قلبي مافيه لك الا كل خير .
: يالله اسمحوا لي وراي شغل ..
: خذ راحتك ياعمي وتسلم على الزيارة .
خرجت خالتي مع عمي برا بتكلمه بعد مالبست عبايتها ..
رجعت لي بعد شوي قالت : عمك ندمان اكثر من مهند ياديمه بس يقول انه متورط ومافي يده حيله واليوم احس انه ارتاح .. سامحيه ياديمه
: خالتي تكفين لاتقولين هالكلام انا مسامحته ومافي قلبي شي على احد بس لاعاد تفتحون المواضيع هذي معاي الحمد لله ان ربي ستر .
افطرت مع خالتي من الفطور اللي ارسلته علينا سميرة مع عمي وصبت لي خالتي كاسة شاهي .. وأخذت كاستها وجلست على الكرسي اللي قدام سريري .
سمعت صوت عناد اخوي برا .. وسمعت مهند يسلم عليه وهو يرحب ويهلي فيه ...وقامت خالتي لبست عبايتها وتغطت ودخل عناد عندي وسلم علي ودخلت عمتي صالحه عندي سلمت علي وكانت جايبة لي اكل بس ماقدرت آكل لأني شبعانه ... وقالت لخالتي ام مهند تروح ترتاح في بيتها لأنها بتجلس معاي في المستشفى وبعدين بتاخذني لبيتها بالطايف .
كان مهند وعناد واقفين برا يسولفون وشكلهم يسمعونا لأن مهند تنحنح ودخل .. قال : اسمحي لي ياام عناد ديمه بتطلع معانا لبيتها
تكلم عناد اللي دخل وراه : المعذرة يابو بدر ..ديمه ماتدخل بيتك بعد مااهنتها وراسي يشم الهوا .
: تمهل ياابو عبدالله ترى الأمور تصلحت
: وشلون تصلحت ؟
: الموضوع هذاك انتهينا منه واعتذرت من الرجال اللي ابوي ورطني معاه .
: اعذرني ياابو بدر اللي سويتوه باختي مو سهل ومااقدر اخليها تروح معاك لين تثبت لي انك بتصون اختي وتحافظ عليها .
: ابشر مالك الا اللي يسرك .. وديمة تسوى الدنيا ومافيها عندي
تكلمت عمتي صالحه تهدي الوضع قالت : الليلة انا بجلس مع ديمه وبكرة تعالي ياام مهند ان كان ديمه بتطلع عندكم برجع للطايف بدري .. عيالي هناك تاركتهم مع عبدالوهاب والشغالات .. والا اخذتها معاي .
ردت عليها خالتي ام مهند : الله يسلمك ياام عناد ديمه بنتي وانا امها لاتخافين عليها وبتطلع لبيتها بإذن الله .
: هذا العشم ياام مهند بس ودي اجلس معاها عاد يوم جيت من بعيد
نادى مهند امه قال : خلينا نروح ونخلي ديمه تاخذ راحتها مع عمتها .
ونادى عناد يروح معاه لأن خالي ناصر مو في بيته وماعنده مكان يروح فيه .وحلف ان غدا عناد اليوم عنده .
جلست مع عمتي صالحه وقعدت تسولف لي عن عناد اللي صاروا الناس ينادونها بامه وعادل وحبها له وسديم ودلعها لها .. وحب عبدالوهاب لاخواني عسى الله يجازيهم الجنه
نمنا انا وعمتي لأني اصلاً تعبانه مانمت زين اليوم وعمتي جاية من الطايف مشوار طويل ..!
فتحت عيني العصر ماشفت عمتي ولا خالتي ام مهند بس شفت وجه اتوه فيه اعشق كل ملامحه عيونه ، حواجبه ، خشمه ، وفمه وشنبه الخفيف والمنسق بأناقه .. وذقنه الطويل .. ويدينه القويه .. وصدره وأكتاافه يااااه ياصدره قد ايش هو كبير وعميق .. اذا ضمني احسني اضيع فيه .. احسني صغيرة عليه .،
احب شعره الطويل وطريقة لبسه لثوبه وشماغه كل شي فيه يوحي برجولة طاغية احسه قوي بكل شي باسلوبه بصوته بقراراته بتحديه لي وبسيطرته على مشاعري وأحاسيسي .. قوي بحبه لي وتعلقه فيني وكلامه لي وطريقة تعامله معاي .
تأملنا بعض لدقايق طويلة ..أخيراً باس راسي وأنفاسه فيها لهفة وحب وشوق احس فيهم .. قال بحنية واضحة في صوته وكلامه وملامحه : صح النوم ياسعادة مهند .
ابتسمت وقلت له : صح بدنك ياروح ديمه . من متى وانت هنا ؟
: لي اكثر من نص ساعه .
: لااااااا ..... ليه ماصحيتني ؟
: اصحيك واخرب علي اللحظات اللي اتأمل فيها اجمل من خلق ربي بهدوء وانسجام .
: اجل انا اخرب عليك ؟
: لا بس تقطعين علي لحظات التأمل ..
دخل علينا خالي ناصر وهو يقول : هلا والله بالشيخ مهند اجل هذي سواة ؟
ضحك مهند بصوت عالي وراح له يسلم عليه وهو يقول: هلا والله باللي يقطع لحظات التأمل صدق .
ضحكت من كلامهم لأنهم اصحاب ويمونون على بعض بكل شي .
جاني خالي وسلم على راسي قال : وش لحظاته وتأمله اجل بغيت تذبح بنتي تقول تأمل وخرابيط ..؟ الحمد لله على سلامتك ياديوم .. هذا اللي استفدناه من هالمهند يوم شافك . ليتني مخبيك عنه لين تولدين .
انحرجت من خالي قلت : هههههههههههههههههههههه الله يسلمك . خااااالي لاتعيد هالكلام خلاص اسكت بعدين كل شي مقدر ومكتوب .
: اجل ضحك عليك بهالكلمتين وقال لك مقدر ومكتوب ؟
: هههههههههههههههههههههههههههههه
مسكه مهند من يده وهو يضحك قال : هههههههههههههههههههههه وخر عن حرمتي لاتغير افكارها ماصدقت انها ترجع لي .
طالع خالي فيه وقال بجديه : من قال انها بترجع معاك ؟
: اوووه ياناصر انحلت المسأله ورحت كلمت سعود والحمد لله تفهم وضعي .. طالعني مهند وكمل : عرف حبي لديومتي .. وعرف اني مااقدر اخلي احد يدخل حياتي غيرها .
: اها اجل الله يبارك لكم بس احذر يامهند تأذي ديمه بعد كذا . ترى ماعاد بنسمح لك .
: اقول فكني منك انت ونصايحك .. بعدين وش تبي انت ومخلي العزا وقاطع كل هالمشوار .
: والله عاد هذي ديمه مو أي احد اترك الدنيا كلها واجيها .
قلت انا : الله يخليك لي ياخالي وعساني ماانحرم منك .
ضحك مهند وقال وهو عند الباب بيطلع : اجل كل هذي دعوة لناصر وانا ولا حتى نص دعوة . قطع كلامه وقال : هلا والله بعناد ادخل مافيه الا ناصر .
دخل عناد علي وسلم على خالي وجلسوا يسولفون .. بعدين قام خالي وقال لعناد يروح معاه للبيت .. عشان عمتي صالحه وخالتي ام مهند هنا ومستحي يطول عندي ويحرجهم اكثر لأنه شافهم جالسات برا قبل مايدخل .
اول ماطلع خالي دخلوا عندي عمتي وخالتي وكملوا سواليف مع بعض وانا رحت ابدل والبس وجلست آكل من الأكل اللي جابه مهند لي من البيت .
سمعنا صوت خالي ماجد عند الباب وتغطوا عمتي وخالتي ودخل علي معاه باقة ورد كبيرة وهو يضحك واقف على راسي . قال : السلام عليكم .
: هههههههههههههههه هلا والله عليكم السلام ورحمة الله وبركاته
: كيف ديمتنا الغالية ..
: الحمد لله بخير كيفك انت وكيف صحتك
: بخير اذا انتي بخير .. الحمد لله على سلامتك . واللي راح ياديوم لاتتحسفين عليه الجاي افضل وأحسن ان شاء الله .
: الله يسلمك ياخالي والحمد لله على كل شي .
مسك اذني بشويش قال : تعرفين تخبين هاه .؟
: ههههههههههههه غصب ياخالي نتقي المشاكل .
دخلوا خالي سامي وخالتي فادية بعد خالي ماجد بربع ساعه كانوا جايين على سيارة لوحدهم لأن خالي ماجد بيرجع عناد وعمتي معاه مايبغاهم يرجعون مع السواق ..
اخوالي عادي ماكانوا زعلانين مني عشان سالفة الحمل اللي ماقلتها لاحد بس خالتي فادية زعلانه وكل شوي تقول طيب ياديمه اجل هدى اقرب مني وانا اللي حسبتني اقرب الناس لك ومثل امك .. اعتذرت منها ان نفسيتي كانت تعبانه وماكنت ابغى الموضوع ينتشر . وجلست اشرح لها لو كنت قلت لها وعرف احد كيف بيتصرفون الناس وبيلحون اني ارجع غصب ووووو الين اقنعتها ..
خرجت لبيت خالي ناصر مع خالتي فادية بعد ماترجيت مهند اروح لبيت خالي وراح ارجع لبيتي وانا مو تعبانه احسن .. وقعدت احمسه اني راح ارجع له وشكلي ونفسيتي احسن وكل شوي اقول له ارجع لك ونعيش شهر عسل من جديد . آخر شي وافق وقال اني ضحكت عليه بكلمتين وصدقني بس ماله الا الصبر .
جات هدى مع خالي اللي رجع لهم في المدينه بعد يومين من طلعت من المستشفى ورجعت خالتي فادية لبيتها وأخوالي وعمتي وعناد رجعوا للطايف .
......................................
ـــــتـــــآـآـآبـــــــــــع......
ــــــــــــــــــــــــــــــــــــــ
العرض العادي
