بسم الله الرحمن الرحيم
مابعثر افكاري وسراها شتات ولمها
الا عيون جعل زينات العيون افدا لها
مافيه شي فالوجود اغلا من عيون المها
تامر على روحي وتفداها حياتي كلها
اوصافها واسلوبها الفذ المميز واسمها
ثلاثة الغاز الحياة اللي عجزت احلها
من حبها صرت احسد نظرات بوها وامها
وان مر طاريها معاليق الخفوق وتلها
سجت بقلبي وانتحا التفكير كله يمها
ياليل سلملي على ذيك العيون وقلها
معاد في ذمة معاليق الخفوق ودمها
الا غلاها اللي تظلله الجروح بظلها
في زحمة التفكير بظروف الحياة وهمها
لامرت افكاري عليها مستحيل تزلها
عينت في نظراتها سحر القلوب وسمها
تقدر تصوبها وتقدر بالغلا تحتلها
وتحطم الرقم القياسي في الجمال برقمها
كن الحلا والملح ضيع غيرها واندلها
كلامها كنه يذوب من الخجل في فمها
والحسن كنه اللي على راحة يديه يشلها
ياخذ ركود الغيم وقت العصر من سلهامها
والصبح يهديها شعاع الشمس تقديرا لها
والليل منثور وراها والقمر قدامها
ماهي بحول اللي تقلدها لوكان اخت الها
يشبه سنا البارق حمار الجمر تحت لثامها
وثمانها الياقوت والمرجان تقليد لها
والجسم غصن دانياته ترفض استسلامها
بدري على كل اليدين اللي تبي تاصلها
جمال يوسف يغتشيها كلها ويعمها
وبجنبها كن البنات البيض خدام لها
ياليتها من ربعنا واني من ابنا عمها
هني منهو من جماعتها وابن عم لها
شوقي عليها جمرة عوج الظلوع تظمها
ياليل لو تحرقني الجمره دخيلك خلها
الشوق ولعها وقلبي يحترق ويزمها
خله يطفيها على كيفه متى ماملها
ياليل جمر الشوق وداني وجيت بعلمها
قلت انتي اول حلم يقطف وردة في حلها
يا اغلا طموحي وامنياتي لوله واهمها
انتي سحاب يروي رياض الغلا ويعلها
الذكريات اروع لياليها معك وايامها
ليل تفاصيله سنه من هلها لاهلها
الله يبارك في ليالي حبنا ويتمها
لعلها تصدق مواعيد الرجا لعلها
بين الرجا والياس قلبين معاد يهمها
الا الجروح تموت في صدر الحسود بغلها
مدري .. ولا تدرين يابحر الحياة وجمها
وشلون يجمعنا القدر ليلة فرح ونفلها
وسلامتكم
عبدالرحمن بن مريط
العرض العادي
