حسبي على الايام والاشغال وظروف اليال
كان حرمتني نظرت الاحباب في ميعادها
احبهم بس الزمن عيا لايمشي لي عدال
ماوفر الحلوه واذا جته المراره زادها
وزود على ظروف الزمان الحظ متصاغي ومال
واليا تعدل يوم دحدر والميوله عادها
لارحت لاحبابي جنوب احبابي تروح شمال
وان رحت انا يم الشمال تعود يم بلادها
ياوجد حالي وجد منهو يرتجي شي محال
رجليه تعبت فالزمن مرواحها معوادها
وياوجد حالي وجد من صابه مرض وسط الطحال
مافادها كوي المداوي والدوا مافادها
قلته بعد بعدك علي ياغاية المطلوب طال
ياللي محبتك بضميري ثابته باوتادها
الدله تصيد العرب وقنادها هيل الدلال
وانته غرامك دلتي وانته تراك قنادها
ارتاح لك واسلا معك واتعب على شان الوصال
لو ساعتك بالوصل يمي واقف عدادها
واصبر على حبك ولو حبك ثقل صم الجبال
واقول عادي لو عيوني ماتذوق رقادها
اسمك اجابه في فمي لامن توجه لي سوال
لو السوال الحرب الاولى منهو اللي قادها
شمس المحبه محرقه من بعد ماغاب الضلال
وانت الضلال اللي يرجع للحياة اعيادها
لو اليالي تمطر النسيان وبل من الخيال
ما انساك بل اذكرك واشواقي يزيد اعنادها
..
..