يا زين وقتً فات ما هوب هالحين = يوم النوايا كلــــهن صافيــــــــاتي
و الحقد ما يوجد و دايم سعيـــدين = ونفوسنا سمحـــــــــة وسكر نباتي
و بيوتنا ونســــه و لا به شياطين = ما يدخله صورة ولا منكـــــــــراتي
و يطرد ظلام الليل عنا سراجيــن =و أحيان يقضــــــي قازهن طافياتي
مشروبنا صافي من الزير ولبيــن = ماهوب مستـــــورد سريع الفواتي
ما صـنعوه الغرب يا فالهم شيــــن = مابه مواد الحفــــظ و مسرطناتي
وعشينا مرقوق بين العشـــــاوين = تحطه أمي قبل وقت الصـــــــلاتي
لقمة هنيـــــــــه طيبه طعمها زين = تحوفها بيدينــــــــــــها الطاهراتي
ثمن ننام إلى قضينا مصليـــــــــن = بعد العشاء كلن يريد المبـــــــــاتي
ننام من بدري ونصحى نشيطيـــن = بعد الشروق أشغالنــــــا جاهزاتي
ما به كسل لأشغالنا مستـــــــعدين = ما عندنا سايق و لا خادمـــــــاتي
مقيالنا بمجببن بين بابيــــــــــــــن =فيه الهواء يطرق جمـــيع الجهاتي
نشب نارن بالشتاء و متدفيــــــــن = ما فيه دفايات و مكيفـــــــــــــــاتي
يجي المطر و ثيابنا تنتــلي طـــين = و نلعب جميع عيــــــالنا و البناتي
يصب مثعبنا ونملى المواعيـــــــن = يا حلو ذاك المـــاء و ذيك الحياتي
ماهي حياة الحين ياشين هالحـــين = كله غثاء وهمـــــــــــومنا كاثراتي
كلش يجي لك لو بكلمه تناديــــــن= كلش توفر بس مابه حـــــــــلاتي
صلاة ربي عد ما ترفع يديـــــــــن = على محمد صاحب المعجـــــزاتي