السلام عليكم ورحمة الله وبركاته
بين أيديكم الجزء العشرون من مجموعة الوصفات التي أجمعها من أجل زوجتي الغالية .
وحسب وعدي فإنني سوف أعرضها تباعاً حتى تعم الفائدة الجميع وأرجو أن تنال إعجابكم.
دعواتكم لي ولزوجتي وأبنائي الخمسة.
إيهاب
كنافه دوم
2 كنافة ديسك – ملفاى ديسك – جيلى بارد للتلميع – كنافة محمرة
ميكس كريم – ميكس فروت (توت وفراولة وعنب اسود وكريز او موز ومانجة )
الطريقة
نحضر طبق مدور عالى ونبطط على جوانبه الكنافة المحمرة بحيث نغطى الطبق كله من الداخل تماما بطبقة رفيعة من الكنافه ونكبسها كويس
ثم نضع طبقة من الكريمة بالقمع ثم طبقة من الفاكهة ثم طبقة كنافة وهكذا لحد مانملى الطبق
ثم نضع الميل فى ديسك ونبطط بايدنا ونضغطها كويس
ثم ندخلها الفريزر لمدة ساعه
ولما نخرجها نقلبها فى طبق بس نمسح على الطبق المدور بفوطة ساخنة على كل الطبق
علشان قالب الكنافة ينزل معاكى بسهوله وبعد ما تنزل الكنافه نلمعها بالفرشاه
بالجيلى ونزوقها بأصابع البقلاوة
وبالهنا والشفا
طريقة عمل ديسك الكنافة
نقطع الكنافة كويس ونخلطها كويس بذبدة وسكر بودرة ثم نضعها فى صينية على
هيئة راقة خفيفة رفيعه وندخلها الفرن وبعد ماتستوى نسقيها بالعسل الخفيف
وبعد ماتبرد ناخدها ونكسرها خالص
مقدار الميكس كريم
كيلو كريمة لبانى – 80 جرام سكر – 250 ج كستر كريم
تارت كنافة بالبلح
بلح اسود ماسك نفسه – كنافة – كريمة جوز الهند – جيلى ساخن
كريمة جوز الهند)
كريمة جوز الهند
250ج جوز هند ناعم – 200ج ذبدة – 200ج سكربودرة – 3 بيضات
الطريقة
نخلط فى الخلاط الذبدة مع السكر كويس جدا ثم نضع البيض بيضة بيضة اثناء الضرب
ثم نضع الجوز هند
ونخلطهم لحد ماتتكون الكريمة
نقطع الكنافة كويس وندعكها بالسمنة كويس وبعدين نضعها فى صينية التارت ونبططها بايدنا كويس
قوى ثم نضع عليها كريمة جوز الهند ونفردها كويس بالمعلقة ثم نرصص البلح عليها
يغطى كل الوش ندخلها الفرن لمدة 45 دقيقة على درجة حرارة 160
وبعد مايستوى نلمعه بالفرشاة بالجيلى ونزوقه
بوحدات من الكنافة البرمة واصابع زينب
وبالهنا والشفا
________________________________________
عيش السرايا
ديسك توست (حنشرح طريقته)
عسل (قطر – شيرة) كيلو ماء – 1 و1/2 كيلو سكر – ليمونة )
لون طعام احمر – قشطة – فستق مفروم
الطريقة
اضع فى صينية كبيرة العسل وعليه نقط من لون الطعام الاحمر
ثم نضع فيه دائرة التوست ونتركها لحد ماتتشرب تماما من العسل
ثم نضعها اضعها فى طبق واسيها تبرد كويس قوى ثم اضع عليها
الكريمة والفستق المفروم
وبالهنا والشفا
طريقة عمل قالب التوست
(1/2 كيلو دقيق – 50ج سامولينا – 12ج ملح – 10ج خميرة 10ج سكر – 25ج زيت)
نضع الخميرة مع الزيت مع الملح مع السكر مع سنة ماء دافىء ونقلبهم كويس جدا
ثم نضعهم على الدقيق والسامولينا لحد ماتتكون العجينة
نضعها فى الصينية واضغط على العجينة بايدى كويس ثم اتركها فى مكان دافىء
لحد ماتعلى وتخمر ثم اخرمها من فوق بالعصاية الخشب كذا خرم
وادخلها الفرن لمدة ساعة درجة حرارة 190 ولما يطلع من الفرن ويبرد
اقطعه بالسكينة بالعرض على هيئة دائرة كبيرة
ارز بسمتى بالبلح
½ كيلو ارز بسمتى – ربع كيلو صدور فراخ – بصل مبشور – 150 ج بلح اسود رطب
ملح – فلفل – سودانى – معلقة زبدة + شوية زيت
الطريقة
نضع الذبدة والسمن على النار ثم نضع البصلة ثم نضع صدور الفراخ لحد مايتشوحوا ونضع السودانى ثم نضع الارز المغسول والملح والفلفل والكمون والماء ونقلب كله ثم نضع انصاص البلح
ونتركه يستوى عادى زى الارز العادى
وبالهنا والشفا
________________________________________
صينية فراخ بالزيتون
صدور فراخ مقطعه شرائح – طماطم شرائح – بصل شرائح
زيتون اسود مخلى وصحيح – زيت – كسبرة خضراء
الطريقة
نضع شائح الصدور فى صينية ونضع عليها الزيتون والبصل والطماطم
والكسبرة الخضراء المخرطة وشوية ذيت واضعها على البوتجاز شوية
وبعدين ادخلها الفرن لحد ماتستوى
وبالهنا والشفا
سبانخ بالبشاميل
¼ كيلو لحمة مفرومة – بصلة مبشورة ناعم – ثوم مجروش – كيس سبانخ او
كيلو سبانخ متقطع ومسلوق – بشاميل
الطريقة
نضع اللحمة فى المقلاية وعليها البصلة ومعلقة الثوم وشوية كسبرة خضراء مقطعه
ونشوحهم كويس ثم نضع ملح وفلفل وكمون ونقلب كله كويس حوالى 5 دقايق
ثم نضعها فى طبق بايركس ونضع عليها البشاميل وبيضة مربوبة على البشاميل او جبنة مبشورة
وبالهنا والشفا
________________________________________
شوربة الفراخ بالكريمة
صدور فراخ مسلوقة و مقطعة قطع صغيرة – شوربة الدجاج او ماجى – كريمة لبانى –
ملح – فلفل – سودانى مقشر او بندق
الطريقة
نضع الشوربة تغلى على النار ثم نضع فيها الصدور تغلى غلوة ثم نضع
الكريمة او ( كوب حليب + 2 معلقة دقيق متقلبين كويس مع بعض ) فى حالة عدم توفر الكريمة
ونقلبهم مع الشوربة ثم نضع السودانى ونخليها تغللى غلوتين ثم نغرفها
فى طبق التقديم ونضع على الوش شوية فول سودانى
وبالهنا والشفا
كنافة عثمنلى بالمانجة
ميكس كريم – مانجو مقطعه – 2 ديسك كنافة – ديكور
الطريقة
نضع ديسك الكنافة فى طبق وعليه بالقمع دايرة كريمة داير ما يدور الطبق
ثم نضع دائرة مانجة مكعبات ثم دائرة كريمة بالقمع ثم نضع
ديسك الكنافة الثانى ثم نزوقها بالمانجة
وبالهنا والشفا
بلح الشام
½ كيلو دقيق
½ كيلو ماء
75 ج زيت
8 بيضات
3 صفار بيض
زرة سكر
زرة ملح
زرة فانيليا
الطريقة
نضع فى حلة الماء والزيت والملح والفانيليا لحد ما يغلوا على النار
ثم نضع الدقيق مرة واحدة واقلبه كويس وهو على النار علشان العجينة تستوى
ثم اضع العجينة على طول فى الخلاط واشغل الخلاط علشان العجينة تبرد
واثناء ما الخلاط شغال انزل بيضة بيضة ثم صفار البيض لحد ماتتكون عندى
العجينة اضعها فى الكيس والبلبلة
ادهن ايدى بالزيت واعمل عليها اصابع بلح الشام سواء كبيرة او منيى
وتنزلهم فى الزيت البارد على طول فى المقلاية براحتها خالص خالص لحد ماحتلاقيها بتتخن
وتبقى زهبية اللون ثم اشيله مباشرة من على النار واضعه فى الشيرة
ولما نيجى نحمر بلح الشام غيره نضع زيت بارد على الزيت اللى على النار علشان الزيت
الساخن يبرد وبالهنا والشفا
البسبوسة باللوز
900 ج سمولينا – 75 ج حوز هند – 450 ج سكر – 300 ج ماء
125 ج شيرة خفيفة – لوز مقشر
الطريقة
اضع كل المقادير فى طبق واخلط بالمعلقة الخشب لحد ما تتكون العجينة وحتكون تقيلة
ادهن صينية بالذبدة واضع فيها البسبوسة واساويها وارصص
عليها اللوز وادخلها الفرن على درجة حرارة 160 لمدة نص ساعة
لازم تتسقى البسبوسة وهى خارجة من الفرن فورا بالشيرة الساخنة
لقمة القاضى
½ كيلو دقيق
½ كيلو ماء
75 ج زيت
بيضة
10 ج خميرة
40 ج سكر
شيرة تقيلة
الشيرة التقيلة: كيلو ماء – 2 كيلو سكر – عصير ليمونة
الطريقة
نذوب فى كوب الخميرة مع السكر مع شوية ماء
اضع الكوب المذوب على الدقيق واخلطهم بالمعلقة الخشب كويس قوى
ثم اغطيها بفوطة واتركها تخمر لمدة نص ساعه
نعملها كور بالمعلقة الصغيرة
نقليها فى الذيت الساخن نص سوى فقط وبعدين بعد مانخلص الكمية كلها
نعيدها تانى فى الزيت لحد ما كله يحمر باللون الذهبى وياخد نفس اللون
وبالهنا والشفا
كنافة قرع عسلى بالبشاميل
200 ج قرع عسلى – 200 ج سكر – قرفة – زبيب – مكسرات - كنافة
بشاميل ( 100 ج سكر – 100 ج زبدة – 100 ج دقيق – 100 ج حليب)
كنافة مفرومة خالص خالص خالص نضع عليها سمنة وسكر بودرة
الطريقة
اضع الكنافه فى قالب التارت ( بتاع البيتسا)وابططها كويس بأيدى وكمان الجوانب
اضع قرع العسلى على الكنافه فى القالب واكبسه كويس قوى
ثم اضع البشاميل على الوش وادخله الفرن
وبالهنا والشفا
طريقة القرع العسلى / اقطعه مكعبات واضعه فى حلة على النار مع السكر لحد مايستوى تماما
وينزل مايته ثم اصفيه خالص من الماء واضع علية
المكسرات والقرفة
طريقة عمل البشاميل/ لما الذبدة تسيح على النار اضع الدقيق واقلبهم ليندمجوا
ثم اضع الحليب مع التقليب كويس ولحد ما يتخن
عند فرك الكنافة بعد ما تقطيعا يوضع على 1/2 كيلو الكنافة كوب سمنة + كوب سكر بودرة وبيفرك بيهم الكنافة كويس قوى
بيكاتا بالمشروم
½ كيلو لحمة بتلو – 100 ج مشروم – 50 ج ذبدة – ½ كوب كريمة لبانى
بصلة – معلقة كبيرة دقيق – 1 طماطم – ملح – فلفل
الطريقة
نبشر الطمطماية بالمبشرة ونضعها على اللحمة
نبشر البصلة وناخد ماء البصلة فقط ونضعها على اللحمة
ونتبل اللحمة بالملح والفلفل ثم افرد قطع الللحمة امامى فى الطبق وارش عليها رشة
دقيق واقلبها على الناحية التانية وارشها برضه رشه دقيق
نضع فى المقلاية سمن او ذبد او ذيت ونشوح اللحمة لحد ما لونها يبقى ذهبى
نقطع المشروم شرائح بالسكينة ونضعه على اللحم فى المقلاية تقليبتين تلاتة
ثم نضع الكريمة اللبانى حوالى 5 دقائق
لتقديم الخضار مع البيكاتا
بعد تقطيع الخضار وسلقه نشوحة فى معلقة ذبدة تقليبة
ثم نضع الخضار فى الطبق ونرصص البيكاتا علية
وبالهنا والشفا
كفتة الخشخاش
½ كيلو لحمة مفرومة – شبت – بقدونس – ملح – فلفل- كمون – ذبدة – لوز مجروش – كسبرة خضراء
الطريقة
نضع على اللحمة الملح والفلفل وكمون والبصل ( التفل فقط بدون ماء البصل)
وشوية لوز مجروش
وشبت وبقدونس وكسبرة خضراء كله متقطع ناعم ونخلطهم مع بعض كويس
ندهن صينية بالذبدة ونعمل الكفتة اصابع ونرصصها فى الصينية ونرش
على الوش رشة لوز مجروش وندخلها الفرن لحد ماتستوى وتحمر
وبالهنا والشفا
فراخ بالكسبرة الخضراء
فرخة – 5 معالق كبيرة سماق – ¾ كوب ذيت ذيتون – ¼ كوب عصير ليمون
½ كوب جزر – كوب كسبرة خضراء مفرومة – ملح – فلفل
2 رغيف خبز شامى (لبنانى )
الطريقة
نضع فى طبق غويط كل المقادير مع بعض (ماعدا الفراخ)ونخلطهم كويس
نقطع الفراخ اربع اجزاء او اكثر حسب الرغبة
نضع فى صينية رغيف شامى مفرود زى ماهو ثم نرصص عليه
الفراخ ثم نضع عليها الخلطة اللى عملناها ونفردها كويس على الفراخ
ثم نضع الرغيف الشامى التانى حنغطى بيه الصينية
وندخلها الفرن لحد ما الغراخ تستوى وتحمر
وبالهنا والشفا
________________________________________
قطايف مشكلة
(بالمكسرات و القشطة والبلح)
قطايف متوسطة – بلح أسود – قشطة – فستق مجروش – ذيت للقلى
شيرة تقيلة
الطريقة
نعمل القطايف زى القرطاس ثم نقليها فى الزيت وبعدين نحشيها بالقشطة ونضع
على الوش الفستق الناعم
او
نفرم البلح ونضع عليه لوز مجروش او فستق ونحشى بيه القطايف
ونقفلها كويس زى السمبوسه ونحمرها فى الزيت ثم نضع
عليها الشيرة
وبالهنا والشفا
كنافة طرح (او خصل)
المكونات
كنافة – قشطة – فستق مجروش – شيرة
الطريقة
نفرد امامنا خصلة الكنافة واضع القشطة فى الكيس والقمع وانزل القشطة
فى منتصف خصلة الكنافة ونلف الكنافة بأيدنا كويس وجامد
ونضعها فى الصينية ونضع على الوش سمنة كتير قوى يعنى ممكن حوالى نص كيلو
(متخافيش ما احنا حنصفيها بعد ما تستوى)
وندخلها الفرن لحد لونها ما يحمر ونصفيها من السمنة اللى فى الصينية
ونسقيها بالشيرة وتقدم وممكن تعملى على طرفها قشطة وتحطى عليها فستق
مجروش
وبالهنا والشفا
ملحوظة
ممكن تتحشى بالمهلبية
كياو حليب – 200 ج سكر – 100 ج نشا – باكو فانيليا
شوربة خضار بالكريمة
200 ج جزر – 200 ج كوسة – معلقة ذبدة – معلقة دقيق – ½ كوب كريمة لبانى
بصلة – ملح – فلفل
الطريقة
نضع شوية ذيت فى حلة مع قطعة ذبدة كبيرة وبصله مخرطة ونقلبها لحد ماتصفر
ثم نضع معلقة دقيق ونضع الخضار ونقلب تقليبة ثم اضع اى نوع شوربة عندى
ولو معندكيش حطى ماجى لحد ما كله يغلى (بس متغطيهاش علشان لونها ميغيرش)
ونتركها على النار حوالى ربع ساعه ثم نضعها فى الخلاط ونضربها
ثم نضع عليها الكريمة ونقلبها بالمعلقة وبعدين نغرفها
وبالهنا والشفا
________________________________________
شوربة طماطم بالكريمة
كيلو طماطم – ملح – فلفل – 2 كرات افرنجى – 2 بصلة – 1 بطاطس
ورق لاورو – عود زعتر – جزرة – معلقة سكر – شوربة
الطريقة
نضع شوية زيت صغيرين فى حلة ونضع البصل المخرط والبطاطس المقطعه صغيرة والجزر المقطع صغير والكرات المقطع صغير ونقلب تقليبتين ثم نضع الطماطم (مقطعه انصاص او اربع)
ونضع 2 كوب شوربة (مرقة ) اى نوع عندك ونقلب ونغطيها شوية لحد ماتستوى
ثم نضعها فى الخلاط ونضربها ثم نصفيها فى المصفاه السلك
ثم نغرفها فى الطبق ونضع على وشها كريمة لبانى
وبالهنا والشفا
________________________________________
فتة الكشك
الكشك( 4 كوب شوربة – 4 كوب زبادى – 4 معلقة كبيرة دقيق – نص ليمونة )
عيش شامى محمص – بصل محمر 2 صدر دجاجة شرائح
الطريقة
نحمر العيش المقطع فى زيت على النار
ثم نضع العيش فى طبق التقديم
ونضع علية قطع الدجاج المقطعه شرائح
ثم نضع الكشك على الفراخ
ثم نرش البصل المحمر على وش الطبق
وبالهنا والشفا
طريقة عمل الكشك
نضع الشوربة على النار مع فص ثوم مهروس تغلى كويس قوى على النار
اضع الدقيق على الذبادى واخلطهم كويس قوى بالمضرب السلك اليدوى
ننزل بخليط الذبادى فى الشوربة واحدة واحدة مع التقليب يأيدنا الثانية كويس قوى وبسرعة
علشان ميكلكعش منك وقلبية يادوب دقيقتين وتطفى النار وتصبية
التقلية : بصلة كبيرة قطعيها صغير وشوحيها فى الزيت لحد مالونها يبقى ذهبى غامق
وتستخدم .
ملحوظة :اذا كان الكشك تخين ذودى شوية شوربة واذا كان الكشك خفيف ذودى معلقة دقيق
فراخ على الطريقة المكسيكى
فرخة – معلقة كبيرة مستردة – ¼ كوب ماء بصل – معلقة كبيرة صلصة
معلقة كبيرة بهارات دجاج – معلقة زعتر فرش – ¼ معلقة شطة
ملح – فلفل
الطريقة
نضع المقادير على بعض
نفتح الفرخة من ضهرها بالطول ونضع عليها التتبيلة ةندعكها كويس
نتركها شوية برة الثلاجة علشان التتبيلة تمسك كويس فى الفرخة
اضع زيت فى مقلاية واضع الفرخة تتشوح شوية وتاخد لون الشوى
وبعدين ندخلها الفرن تكمل النضج
وبالهنا والشفا
________________________________________
مكرونة بالذبدة
كيس مكرونة – معلقة ذبدة – فصين ثوم – بقدونس
الطريقة
نسلق المكرونة وتشطفها بالماء البارد ونصفيها من الماء
نفرم الثوم بالسكينة نضع الذبدة على النار ونضع الثوم لفة بس
ثم نضع المكرونة ونقلب تقليبتين ثم نغرفها فى طبق التقديم
ونضع على الوش بقدونس مفروم
وبالهنا والشفا
اصابع زينب
½ كيلو دقيق – 125 ج سامولينا – 150 ج سمنة – 15 ج خميرة فورية – 250 ماء
الشيرة (العسل – القطر) 2 كيلو سكر + كيلو ماء وعصير ليمونة بعد الغليان
الطريقة
نضع الحميرة مع شوية ماء دافىء فى كوب واذوبها
نضع كل المقادير فى الخلاط ونضع عليهم الخميرة المذابة الى
ان تتكون عندى العجينة حوالى 5 دقايق وحلاقى العجينة خلاص مبتلزفش فى اليد
اغطى العجينة واتركها شوية تخمر
اضع العجينة امامى على هيئة صباع طويل او رول ثم اخد منها قطعه قطعه واضغطها
على وش المبشرة الصغير الخشن والف لفة بصوابعى اضعها فى صينية
واتركها تانى لتخمر لمدة ربع ساعه ثم احمرها فى ذيت ساخن لحد
ما لونها يحمر واشيلها علبى طول من على النار على الشيرة
الباردة واقلبها كويس فى الشيرة وتقدم
ارز باللحمة والخضار
2 جزرة مقطعه صغير – كوب بسلة – ¼ كيلو لحمة مقطعه مكعبات صغيرة
فلفلة رومى خضراء وفلفلة حمراء وفلفلة صفراء – ½ كيلو ارز بسمتى
ورق لاورو – ملح – فلفل – بهارات – حبهان – 3 معالق كركم
2 بصلة متوسطة – 2 معلقة كريمة
الطريقة
نضع زيت فى حلة ثم نضع البصل ونشوحة ثم نضع اللحمة ونقلب كويس
ثم نضع اللورو والكركم والبهارات والجزر والفلفل الرومى و البسلة
لحد ما تستوى اللحمة ثم نضع الارز ونسويه عادى
وبالهنا والشفا
________________________________________
فخدة فى الفرن (دون)
فخذة ضانى- 2 ملعقة كبيرة صلصة طماطم- ملعقة كبيرة بهارات لحم
2ملعقة كبيرة خل- ملعقة صغيرة فلفل أسود- ملعقةكبيرة ملح 5- فصوص ثوم صحيحة – بصلة كبيرة مقطعة حلقات 2 ملعقة كبيرة زيت او سمنة
الطريقة:
اغسلي الفخذة ونشفيها
اعملي بعض الخروم بالسكينة فى لحم الفخذة
ضعي في طبق الملح و الفلفل – و البهارات – و الخل – و اخلطيها جيدا
ضعى فى الخروم من خلطة التتبيل وفص ثوم صحيح فى كل خرم وبباقى خلطة التتبيل ندعك بيها الفخدة كلها كويس
نضع الزيت او السمن فى صينية كبيرة على النار ونحمر فيها البصل
نضع الفخدة فى السمنة ونقلبها كويس فيها لحد ما تحمر من جميع الجهات
نتركها على النار ونغطيها مع اضافة الماء كلما احتاجت الى ان تستوى تلت ارباع سوى
غطى الصينية بورق الألمنيوم،و ضعيها فى الفرن
لحد ما تستوى وقبل ما تخرجيها شيلى الورقة الفويل من عليها وادهنيها بصلصة الطماطم علشان وشها يحمر و بالهنا و الشفا
ورقة الفراخ
½ كيلو وراك منزوعه العظم – ½ كيلو بطاطس – ½ كيلو طماطم
2 جزرة – 2 بصلة – 3 فلفلة رومى – 2 قرن فلفل حامى – ورق فويل
ملح – فلفل – 4 فص ثوم – كرفس – زيت زيتون – كسبرة خضراء
الطريقة
اتبل الفراخ بالملح والفلفل واشوحها فى مقلاية فيها زيت لحد ما تصفر وتستوى نص سوى
اقطع البصل والفلفل والطماطم والبطاطس والثوم شرائح واقطع قرون الفلفل الحامى نصين
واقطع الكرفس والكسبرة الخضراء قطع صغيرة
بعد ما تتشوح الفراخ اشيلها واضع مكانها فى المقلاية كل الخضار اللى انا قطعته فى
الزيت واشوحه واقلبه حوالى لفتين تلاتة ثم اضع شوية ماء تاخد غلوة ثم اطفى النار
ادهن صينية بالزيت كويس ثم اضع 4 ورقات من الورق الفويل وادهنهم
كويس بالزيت وكزلك اطراف الفويل
اضع نصف مقدار الخضروات فى الصينية ثم اضع الفراخ ثم اضع نص المقدار التانى
واقفل الفويل كويس واضغط عليه بأيدى وادخله الفرن على الرف اللى فوق لمدة نص ساعة
ثم ننزله الرف اللى تحت لمدة نص ساعه تانية ولما يطلع من الفرن اقلبه وهو زى ماهو
بالورق فى الطبق وبعدين اعمل فتحتين فى وش الورق وافتحهم
وبالهنا والشفا
سلطة الخيار باللبن الرايب
½ كيلو خيار – 2 كوب لبن رايب – ملح – فلفل – شبت – فص ثوم مهروس
الطريقة
نقشر الخيار ونخرطه شرائح رفيعه ونقطع الشبت قطع صغيرة
ثم نضع الشبت على الخيار والثوم والملح والفلفل ونقلبهم كويس
ثم نضع اللبن الرايب عليهم ونخلطهم كويس ونضعها فى طبق التقديم
وبالهنا والشفا
________________________________________
شعيرية بالكبدة
i
½ كيلو شعيرية – 200 ج كبدة – 4 معالق زيت – 200 ج لوز
ملح – فلفل
الطريقة
نضع زيت كتير فى حله على النار ثم نضع الشعيرية لحد ماتحمر ثم
نصفيها من الزيت الزايد ثم نضعها فى حلة وعليها ماء لحد ما تستوى
وتبقى مفلفلة
نتبل الكبدة بملح وفلفل ثم اشوحها فى الزيت لحد ماتحمر خالص
ثم اقطعها بالسكينة شرائح متوسطة
اسلق اللوز واحمره
اضع فى مقلاية شوية زيت واحمر فيها بصلة مفرومة ثم اضع اللوز و
شرائح الكبدة وشوية كسبرة خضراء مقطعين صغير واقلب اقلب
لحد ما يتجانسوا مع بعض كويس
اغرف الشعيرية فى طبق التقديم واضع عليها خليط الكبدة اللى بالكسبرة
وبالهنا والشفا
________________________________________
المغربية
300 ج مغربية – كيلو لحمة موزة – 200 ج بصل قاورمة – لتر ماء – 2 معلقة زيت زيتون
قرن فلفل اخضر – 2 كرفس – 4 فصوص ثوم
الطريقة
نضع زيت الزيتون فى حلة ونشوح فية بصلة مفرومة ناعم مع الفلفل الاخضر
والبصل القاورمة ونلفهم لحد ال البصلة تحمر ثم اضع اللحمة واقلبهم كويس ثم اضع
المغربية واقلب ثم اضع الماء لحد ما كله يستوى واغرفها
وبالهنا والشفا
________________________________________
كول سلو
نص كرنبة – 300 ج جزر – 2 معلقة كبيرة سكر – 2 معلقة كبيرة خل – مايونيز
بصله – ملح – فلفل
الطريقة
نخرط الكرنب تقطيع رفيع ونقطع البصلة تقطيع رفيع ونبشر الجزر بشر رفيع
نرش رشة ملح خفيفة على البصل المقطع وادعكه بايدى
علشان الماء يخرج منه وطعمه ميبنش واضع البصل على الكرنب
اضع الخل على المايونيز واضعه على الخليط اللى عندى ثم اضع السكر
والجزر المبشور واخلط السلطة كلها ببعض
وبالهنا والشفا
بيكاتا مولونيز
½ كيلو لحمة بتلو – حزمة بقدونس – 4 بيضات – 100 ج جبنة رومى مبشورة
صوص طماطم – 2 معلقة دقيق – ثوم مفروم – ملح – فلفل
الطريقة
نضرب البيض فى طبق ثم نفرم الثوم ونضعه على البيض
نفرك الكسبرة الخضراء ونضعها على البيض ثم نضع الدقيق ونقلب ثم نضع الجبنة الرومى
وشوية حليب لحد ما تبقى زى عجينة العجة واضع شوية ما صغيرين قوى
اضع كل قطع البفتيك فى الخليط اللى عملناه
نضع زيت فى مقلاية على النار وارصص البفتيك جنب بعض
لحد ما يحمر ويستوى ثم اضعه فى الفرن حوالى عشر دقايق علشان تقرمش شوية
فى حلة صغيرة اضع الطماطم والثوم على النار لحد ماتستوى ثم اضع فى مقلاية
شوية زيت صغيرين وحوالى 6 فصوص ثوم مفرومين وشوية ريحان مخرط
ثم اضع الطماطم اللى انا سويتها وملح وفلفل غلوة
ثم اضع البيكاتا فى الطبق واصب عليها صوص الطماطم
وبالهنا والشفا
طواجن طبيخ بيتى
كيلو لحمة – كيلو بطاطس – كيلو طماطم – ¼ كيلو بامية – 200 ج لوبيا ناشفة
300 ج فاصوليا خضراء – كرفس – كسبرة خضراء – 4 معالق طماطم بيورية
ملح – فلفل – كمون – فلفل حار – ورق لورو – ثوم – حبهان – 8 فصوص ثوم – ½ كيلو بصل
الطريقة
نخرط حوالى ½ كيلو بصل شرائح ونخرط الثوم صغير
نضع زيت فى حلة ثم نضع اللورو و الحبهان ونخرط الكرفس قطع صغيرة
ونضعه عليهم ونخرط الكسبرة بالسكينة ونضعه عليهم
نقطع اللحمة مكعبات ونضعها ونضع الصلصة ونقلب لحد ماتستوى
نضع فى مقلاية معلقتين زيت وعليها ثوم مخرط وشوية كسبرة خضراء
ونضع البامية ونشوحها تشويحة (كل الخضار يتشوح بنفس الطريقة)
نجهز الطواجن
نضع كل نوع خضار فى طاجن لوحده يعنى نضع الكوسة المقطعه فى طاجن
ونضع الفاصوليا فى طاجن ونضع البطاطس فى طاجن ونضع اللوبيا فى طاجن
ونضع البامية فى طاجن ثم اضع على وش كل طاجن لحمة بالصلصة وادخلها الفرن لحد ما الوش يحمر
وبالهنا والشفا
شكلمة
350 ج جوز هند ناعم – 250 ج سكر بودرة – 250 ج بياض بيض – ½ باكو فانيليا
الطريقة
ندهن الصينية كويس بالذبدة
نضع فى الخلاط بياض البيض يتضرب كويس قوى قوى لحد ما يعلى لفوق
واول مايبقى كريمى نضع سكر البودرة ونستمر فى الضرب
ثم اضع الفانيليا ونستمر فى الضرب لحد ما يعلى ويمسك ثم اضع جوز الهند ونقلب من تحت لفوق
وندخلها فرن درجة حرارة 100 درجة لمدة ساعه او ساعه ونصف
بالهنا والشفا
كنافة بلورية
½ كيلو كنافة – 150 ج سمنة – 250 ج فستق – 150 ج شيرة (قطر – عسل) تقيل
الطريقة
نضع السمن السايح على الكنافة المفرومة (او المقطعه)
ثم افرد طبقة كنافة خفيفة جدا جدا فى الصينية واكبسها كويس قوى
اضع يا دوب معلقة شيرة على الفستق واخلطه كويس علشان يتماسك
ثم اضع الفستق فى الصينية على الكنافة واضغط علية بطبق كويس قوى قوى علشان يتكبس كويس
واضع عليها شوية شيرة بسيطة
ثم اضع طبقة تانية خفيفة جدا جدا من الكنافة واكبسها كويس
ادخل الصينية الفرن حوالى نص ساعه على درجة 190 درجة
وبعد ماتطلع من الفرن نسقيها بطبقة خفيفة من الشيرة واقلبها
واقطعها قطع صغيرة مستطيلة
تحياتي وفي انتظار ردودكم
إيهاب
العرض العادي
