سلام ..
كيفكم .. وش اخباركم ..
انشاء الله تكونو بخير وعافيه .. وصحة وسعاده ..
المهم ..
لا تستغربو من الموضوع .. فأنا فعلا كنت مدمنه
والحمد لله ربي تاب على ..
ودى قصتى ..
كان يامكان في قدييييييم الزماااااااااااان ...
. يعنى مو مرة من زمان بس من زمان شوى ..شوى .. يعنى
فيييييييي ايام الثانويه ..<< كنت علمى
يا حبايبى ..
كانو الناس يذاكرو ويحضرو الدروس قبل ما يدخلوا الحصه ..
يحلو الواجبات ويتناقشوا في حلول مسائل الرياضيات
ويخترعوا اجوبه للفيزياء .. ويحفظوا الجدول الدورى في الكيماء << اكيد كلكم تعرفوه
ويروحوا لابله فلانه ..تعالى عندا حصه فاضيه ..
وابله علانه ادينا الدرس مالحقنا نكتبه ..
واجتهادات ما يحتاج
المهم ..لا اطول عليكم
اختكم في الله اللى هى انا كنت فدي الزحمه ضايعه ياعين امى ..
لا ابا اذاكر ولا ابا احضر .. وطفشانه من الفيزياء وزهقانه من الرياضيات << على انى ماشاء الله على كنت ذكيه بس حاطه المذاكرة على جنب ..
شافت حالتى وحده الله يسترعليها ما ابا اقول اسمها .. اخدتنى على جنب وقالت لى يا (جمانه) << طبعا قالت اسمى الحقيقي مو جمانه .. اباكى نهاية الدوام ضرورى ابا اوريكى شي ..
قلت طيب ..
وشغلتلى بالى الله يهديها وصرت طول الحصص وانا اقول يا ترى ايش تبا ايش عندها
ومسررررحه ولا داريه عن الدنيا (انا في وادى هم في وادى )
تدخل ابله الدين وتخرج ولا ادرى
وتدخل ابله الادب وتخرج وانا مو هنا
واخر شي ابله الانجليزى .. استغفر الله كانت تحب تشرشح بتريقه .. شافتنى مسرحه
قامت طالعت بنص عين وفجعتنى وقالت : انسر ماى كوسشن دير ؟؟
قلت .. ها .. اقصد هااا وت الاكوسشن هانى ؟؟ << جبت العيد وقتها
قالت .. وير يور مايند ؟؟ .. قلت : ها .. قالت : سم الله عدوك ؟؟ اللى واخذ عقلت يتهنا به
قلت : اهاااااااااااااااااااااااا فهمت
المهم بقدرة قادر خلصت الحصه بأمان واعفتنى من الأجابه الابله
ومن يوم ما دق الجرس خرجت اجرى ادور على ديك البنت ..
ولقيتها
طالعت فيا بعين خبييييييييييييييثه وقالت : عندك انترنت ؟؟
قلت بنبرة كلها براءة : لا لسه .. مودحين .. بس اغلق ثانوى بجيبه
قالت بنظرة كلها استخفاف : اييييييييييييش ماعندك . انتولسه ماتطورتو.. ياامى كل الناس عندهم
ما بقي بيت ما دخله ..
فمت جاوبت ببراءة : اهلى مو راضين
قالت : ولا يهمك والله لعلمك وادخله لك في البيت .. يا امى اتبسطى شوفى الدنيا واتعلمى ..
قلت : طيب ....<< كنت مرررة بريئه ولا ادرى في الدنيا شي
المهم يا حبايبى ..
كلمت عمى لانه كان يحبنى ويسمع كلامى
وقلت : ياعمى خذ الكمبيوتر وركب الموديم فيه .. لا تجيب واحد خارجى .. عشان امى لا تشيله
وكلها عشية وضحاها ..
ويجىالكمبيوتر وفيه موديوم ثابت
واروح لصحبتى ..واقول بصوت عالى رج المدرسه .. جييييييييييييييييييييبتو .. والله جبته .. باناس بطير
قالت مبروك .. ياللا اعلمك كيف تركبي الاشتراك وايش هى المواقع اللى ادخلها
كانت البنت مسكينه بريئه هى كمان ما تدخل الا مواقع افلام كرتون << قال قال
المهم .. تعطينى اللنكات .. وتقول يا بنت طنشى الدراسه .. مصيرك بيت زوجك .. ايش تبى بالشهاده
لا تكملى جامعه .. ..وكلام من دا
والله اختكم في الله ماتصدق خبر _ وترمى الثانويه بما فيها ورى ظهرها
وصرت اقعد تقريبا حق ..ساعتين عالنت بس في اليوم ..لانى كنت محدودة بمواقع معينه ولا اعرف مواقع تانيه ولا يحزنون ..
المهم .. في يوم بالصدفه قعد معاى اخوى اللى اصغر منى
وشاف في واحد من المواقع كلمة شات بالانجليزى .. المهم قالى امشي نشوف ايش دا << ام البراءة
وندخل ..ويا ريت ما دخلنا .
.,,><) ومن هنا يبدأ ادمانى (><,,.
شفنا كلام بقدرة قادر يطلع على فوق<< الصفحه العامه .. واقوله ايش دا << مستغربه
قال ما ادرى ..
نقرا الكلام مال امه داعى << والله قلة حيا
وبعدين ..كتبنا السلام عليكم
شكله محد مسلم هناك .. محد رد
نعيد تانى عل وعسى احد يعبببببببببر .. ولا حياة لمن تنادى ..
قمت انا ابا اسوى فيها ام الذكاء ..
قلت لاخوى امسك واحد (وسبه) ههههههههههه والعن ابو جده
ساعتها راح يرد علينا غصبن عنه هههههههههه
وفعلا يا حبايبى ..
سبينا واحد وشرشحنا ابوا جده << بركه ما طردونا من الموقع الحمد لله
المهم ..
كلها ثوانى ويطلع رد من دا الشخص بخلفيه صفرة << مكتوب اضغط هنا<< طبعا عارفين خااااص
ونضغظ .. وياريت ماضغطنا ..
رد السب بكلام الله لا يورييييييييييكم .. اول مرة في حياتى اشوفه
واحنا قال قال نبا نعدل الموقف .. وكل مالو يزيد تعويصه
واخر شي كتبه داك الشخص ..
( انت شكلك فلسطينى مقط قط يلعن ابوك )
وليومكم دا ما عرفت ايش يعنى كلمة فلسطينى مقطقط << اذا احد يعرف لا بخل
وقفلنا واحنا كأننا سوينا جريمه
ضميرى يأنبنى .. والموضوع شاغل بالى بقوة
واروح المدرسه ..واكلم البنت على اللى صار ..
قامت ضحكت شوى .. وقالت انتى ايش مدخلك الشات ,, خليكى في افلام الكرتون بس احسن
قمت سكت .. وقلت في بالى توبه بعد كده اقولها ايش اللى يصير
وارجع البيت وكلى لقافه ادخل تانى
وفعلا دخلت زى الحراميه الساعه وحده في اليلل
واكتشفت الموضوع مو بس سب وقلللللة ادب... لا في نقاشات حلوة
في ناس من مختلف انحاء العالم بأفكار واساليب مختلفه
عادات وتقاليد واخلاق كمان مختلفه <<< طبعا دا زمان مو الان
لقيت ان الموضوع دا قمممة المتعه ..ادخل واناقش مشاكل واخذ اراء الناس في كل شى
واعرف مستويات التفكير ..
واكتشف انو اللى موجودين اغلبهم يا إما مراهقين تحت العشرين يا عجايز فوق الاريعين ههههههه
والكل يقول انا عمرى بين 23 و 26
شييييييييييي .. لقيت انواع الكذب
المهم
للأسف سهيت عن مشلكه او بالاصح بداية مصيبه ..
انى بدات اطول في القعده على النت .. وتحولت الساعتين بالتدريج الى اربع ثم عشرة ثم 12 ثم 14
وكان ممكن تزيد الى يوم كامل
وتمر علي ايام اروح المدرسه مواصله
وارجع عشان اكمل ..
صرت ما انام الا في اليومين خمسة ساعات بالكثير مررة
عيونى صارت مثل عيون المدنين حممممممممرة
مصروفي كله ما اكل منه شى ارواح اعطيه صحبتى الله يستر عليها تشترى لى اشتراكات
صرت ضعيفه مرة
خسرت من وزنى من 12 الى 15 كيلو في خلال ثلاث اشهر بس
ما كنت اقدر اكل اصلا ..
مافي شي يقعد في البطن ..
صرت مخرررررفه .. وانسى .. لدرجة انو كنت بروح في ستين دهيه من ورا النسيان
جانى فقر دم ( انيميا حاده )
وهبوط في الضغط .
وبلاوى
صرت عدوانيه .. جدا
الكل يخاف يقرب منى
حتى انى صرت ابعد عن الناس ..ما ابا اقابل احد
ولا ابا اخرج من البيت .. صرت اصرررررررررف صحباتى ما ابا اكلم احد
وحتى اهلى ماكنت اشوفهم الا في الثلاث ايام لمحه
دايم في غرفتى
منعزله احس الناس كلها تكرهنى لانهم ما يبونى اقعد على النت
ويحاولوا بكل ما اوتوا من قوة انهم يمنعونى ..ويحاربونى
امى عجزت معاى لا الطيب ولا البطال مو نافع
اخر شي .. شالت اسلاك الكمبيوتر ..
انا اتجننت ..
تصرفاتى كلها تصرفات مدمنين .. الا والا اقعد.... لكن على مين
راسها والف سيف انى بس اليوم ما اقعد
وانا راسي ومليون ساطور الا اقعد واشغل النت ..
قلت طيب ..بسييييييييييييييييييييييطه مو علي انا
واكلم وحده من صحباتى ..
تكفين ابى اسلاك كميوتر .. قالت طيب انتى تامرى بس
والله فعلا تانى يوم تسلمنى الاسلاك واسلمها الفلوس << تهريب
وصارو كل ما يشيلوا الاسلاك في اليلل استنى الى ما ينامو اطلع اسلاكى واكمل للصبح
وبسررررررررررعه قبل ما يصحوا اشيل اسلاكى << واسوى فيها انى بريئه
وصاحيه من بدرى اتهجد هههههههه
لقيوا انو ما في فايده من شيل الاسلاك ..
قالوا ايه ..
نشيل سلك خط التلفون .. وبدون الخط ما تقدر تشغل النت << والله وقتها اتمنيت انى اخترع شي يشغله بدون خط
قمت انا سويت نفس الحكايه بس مع وحده تانيه
عشان ديك لا تقول ..وى شوفوا حتى سلك تلفون تبا
وفعلا صرت كل يوم الليل بس يناموا اطلع اسلاكى ( التلفون والكمبيوتر )و اكمل السهرة للصبح
والله حالتى كانت صعبه << بس كانت قمممممممة المعته بالمغامرة
المهم ما غلقنا ..
لما لاحظوا انى صرت ساكته يشيلوا الاسلاك ولا اسوى مشاكل
قالوا دى البنت وراها مصييييييييييييييييييييييييبه لا زم نعرف وش هى
وفعلا ..
كفشونى يوم مع اسلاكى ( حبيباتى ) وانا ارتكب اعظم جريمه في الوجود هى انى مشغله النت
ويعاقبونى ..
ويمنعنى ابوى مرة وحده انى اشغل الانترنت على خط التلفون
وقال لو طلع في الفاتورة انشاء الله لودقيقه انترنت راح اشيل الكميوتر مررررة
طبعا انا كنت مدمنه .. لكن داااااااااااااااااااااااااهيه
قلت ايش ..
نسرق خط التلقون من الجيران
وفعلا اجيب خط طوييييييييييييييييييييييييييييييييييل
وانزله من غرفتى على الشقه اللى تحتنا << حقت جدتى ( سرقت المفتاح اول )
وادخل ... وادخخخخخخخل السلك من الشباك واشبكه
وارجع اطفي اللمبات ولا كأنوا احد دخل << ام الدواهى
واطلع ..
واقعد في غرفتى مسكينه بذاكر << واشيبك الخط التانى << واديلوا سهرة
وعلى دا الحال تقريبا شهر
رجعوا اهل البيت
واستغربوا اسلاك مين دى << مسكينه جدتى قلتلها ابوى يباها
قامت سكتت ونسيت الموضوع
وقلتلها الله يخليك كل يوم قبل ماتنامى اشبكيه .. طيب
وهى ياعينى تقول طيب
وكل يوم عن يوم ادمانى يزيد واكلى يقل ونومى كمان يقل
صارت حالتى صعبه
جدا جدا جدا .. ما عدت طايقه احد لدرجه فظيعه
انا صحيح شفت الدنيا واتعلمت اشياء كثير واكلت علقات جامده من النت
الاإنى زى ماتقولوا راسي ياااااااااااااااااااااااااااااااااااااااااابس ( ناشف)
ام العناد في راسى ..
ومرت الايام والشهور وطلعت اكبر فاتورة تلفون لبيتنا + بيت جدتى << المصيبه صارت مصيبتين
صارت بلاوى .. تلتها بلااااااااااااااااااااااوى
وتلتها بليويات << اتحدى احد يفهمها
ومن بعدها يا حبايبى
اتحرم النت على لمده ثلاث سنوات
ما اخفي عليكم ان حالتى كانت صعبه جدا جدا جدا
هل في احد منكم متخيل المدمن لما ما يأخذ جرعته ايش يصير
انا كده كنت
لمده سنه كامل والسم مازال يسرى في جسدى
والحنين غصب عنى ياخذنى على جرف الحفره ادور ولو عشر دقايق .
طيب
بلاش ..
بس اطالع من بعيد اشوف الاماكن اللى كنت ادخلها لكن للاسف ما اقدر
كان الرجوع بالنسبه لى حلم ووهم
وامنيه عل وعسى اقدر ارجع اللى كان
كانت الفترة دى فترة نقاهه
لكن صعبه وعانيت منها الامرين
والله كنت مدمنه
والحمد لله الان ربي تاب على من الادمان
شافانى وعافانى
وخلانى اجيب اعلى مستويات في التعليم
واتعافيت تقريبا من اغلب الاعراض لكن البعض للاسف صعب الازاله
اخوتى ..
الغرض من هذه الاعترافات ليس الضحك
وانما العبرة
وانتبهوا لحد يسوى حرامى واللا مهرب واللا مجرم << مثلى
وقلبى رحب بأى تعليق او سؤال ..
[MARQ=UP]
تحياتى للجميع
اختكم
الجمانه العربيه [/MARQ]
*3
العرض العادي
