ليلة لقاء صارت بلا ميعادي
صدفه كذا في ليل جوّه هادي
سمعت جوالي برنّة خلّي
نغمه تخص الترف نبض فؤادي
فزيت للجوال عقلي طاير
من الفرح خليت حتى زادي
رصيت سند بسرعة الطياره
تقول صوت الميغ وسط الوادي
مشتاق للغالي ونبرة صوته
شوق الأسير لشوفة الأولادي
قلت: أرحبي ثم أرحبي ياعمري
فديت صوتك قلتها لك بادي
ترحيبةٍ ما مثلها ترحيبه
أعداد برق المزن والرعّادي
قالت: الو وينك عساك قريّب
قلت:أرحبي لبا الغزال الشادي
قالت: حبيبي وش بلاك تهايط
خل المهايط حولي النقادي
جاوب سؤالي بأختصار وسرعه
والمدح خلّه لا شربت قنادي
قلت:العفو موجود يا المحبوبه
جالس وقدمي دلّه وبرادي
أسوق فنجالٍ بثر فنجالي
وأقلّب التلفاز عقب الرادي
فاضي بيديني سبحتي معقوده
وحيد نفسي عايفه مقعادي
قالت: مدام أنك وحيد وفاضي
والفكر رايق والغرام جهادي
تعال بشوفك بمطعم قيصر
وإلا بمطعم حنا له روادي
مشتاقه أسمع هرجك الرومنسي
يافيلسوف الشعر ما أنته عادي
غلاك أرضي والجيوش أحساسي
معسكر الأشواق فيه أسنادي
ساعة غلا تسوى كنوز العالم
تشرح صدورٍ ضيقها يزدادي
قلت: أبشري ساعة وجيلك كلّي
حتيش لو دونك سيوف حدادي
العمر فرصه يغتنمها عاقل
واللي يطوّفها سفيهٍ غادي
لبست غتره ماركة (جفنشي)
وعقال (مرعز) فوقها متحادي
كن العلاقة بينهم من مبطي
يعني أنسجام وماش فيه عنادي
ودشداشتي صوف(أنجليزي) فاخر
من عند (كاكولي) يباع أوكادي
ماهوب(كشميري)و(صيني) سكّه
اللي بعد لبسه وغسله بادي
الأنجليزي ملبس أهل الهيبه
ملوك وشيوخٍ وقوم أسيادي
لبستها والعطر فيها فايح
(دنهل) مع خلطة (جنيد) أجدادي
توّه منزل بالمعارض توّه
ما قلبّه جاهل ولا زهادي
و(العود) بالغتره مسوّي ثوره
تقول قصف أمريكي لبغدادي
يعني مدخّن مطيبه يازينه
ريحه يرد الروح يا الأجوادي
مدفوع كاش بقيمة في سوقه
ماهوب مثل اللي يباع أقصادي
مير المهم دقيت سلف الموتر
مركب شيوخ تقود ماتنقادي
مرسيدس500جديد الماني
اس ال كامل وردوه ابلادي
بنز ابيض يسحرك في نظراته
أنا اشهد اللي مبدعه به جادي
سريت للغالي مشخّص حدي
كني امير بلاد من ميلادي
طربان مع جرّت محمد عبدو
جيتك حبيبي والغلا وقّادي
وصلت للمطعم قبل موعدنا
لأن الكباين حجز للمقعادي
أخاف ما القى وأبتلش بالطلعه
الوضع حامي والكسل مافادي
حجزت لي وحده صراحه لئطه
بالزاويه .. مايزعجك نشادي
لو يصعب الماقف أمورك سهله
مبعد عن الواشين والحسادي
جلست فيها والغلا يلعب بي
مشتاق موت لغايتي ومرادي
مغيرأناظر ساعتى واحسّب
مثل العجيري عالم الارصادي
اشوى والا صوت مشيٍ جاني
دلع تغنج تسحر الأشهادي
مشيت برنسيسه ترف وأناقه
سلّم موسيقي يطرب القصادي
وقف على باب الكبينه هادي
طقّه وقلت اتفضلي يا ودادي
غمضت عيني والفرح يغمرني
مشاعري جمهور واهيا النادي
دشت ودهن العود فايح ريحه
مير البلابالصوت كني غادي
فتّحت عيني شفت شيِ ثاني
أمي على راسي تصيح تنادي
يا (امك) ذبحك النوم غسل وجهك
العصر يذن قوم بس رقادي
فزيت عقلي خاربه برمجته
كن اليدين مكبّله بأصفادي
كنت أحسب انى قيس عاشق ليلى
وإلا كما عبله وابن شدادي
اثريه حلمن زارني في نومي
يا الله عسى ذا الحلم ماينعادي
توني عرفت الحب نار وجنه
تصيد مره مير غصب تصادي
ليت الغلا له محكمه شرعيه
بين الحبايب مايصير ابعاد
الوصل نعمه والفراق مصيبه
هم وعذاب وعلت الاكبادي
هذي قوافي صغتها بالموقف
واختامها مسك وعبير وكادي
منقــــــــــــــــــــــــــــــــــــــــوووووول ..
تحيـــــــــــــــــــــــــــــــــــــــــــــــ ـــــــــــاتي..
العرض العادي
