بديـت بسـم الله الرحـمـن
أبيـات فـي القلـب مكنونـه
الشعـر فـي راحتـي بركـان
أنـدى مـن الغيـث ومزونـه
واصفى من الـورد والريحـان
وأزهى من الزهر فـ.. غصونه
وأشهى مـن التيـن والرمّـان
والشهـد لـلـي يذوقـونـه
وأعذب من الطـلّ للعطشـان
واطرب مـن الطـار ولحونـه
واجمل من اللـول والمرجـان
والمـاس لمّـا يصوغـونـه
واجزل مـن فـلان ولا فـلان
وصعبـه عليهـم يجـارونـه
والحين نرجع علـى العنـوان
ونشـوف هالقلـب وشلونـه
ياخافقـي والقلـوب أوطـان
للحـب للعـشـق وفنـونـه
لايخدعك في الغـرام إنسـان
كـاذب وكذبـتـه بعيـونـه
خلّك أصيـل ورفيـع الشـان
لاتقـرب النـذل وشطـونـه
واحذر من الصاحـب الخـوّان
خـلّ الجفـا دونـك ودونــه
قليـل مــن يذكرالعـرفـان
أو يحفـظ الـود ويصـونـه
مره يكـون الهـوى سلطـان
ياخـذك باطيـافـه ولـونـه
ومره يكـون الهـوى برهـان
لحكايـة العشـق وظنـونـه
ومرّه يكـون الهـوى ميـزان
وتلقـى مشاعـرك مـوزونـه
ومرّه يكـون الهـوى ألـوان
وأطيـاف وأشعـار مجنونـه
ومرّه يكون الهـوى حرمـان
بالصـدّ والهجـر وطعـونـه
ولـولاك يانعمـة النسـيـان
كـان أكثـر الخلـق مدفونـه
أزمـان ياخافـقـي أزمــان
وروايـة الـحـب مسكـونـه
بين البشر في الهـوى ميـدان
لابــد ياقـلـب يمشـونـه
العشق لـه مذهـب وفرسـان
قلـيـل منـهـم يعرفـونـه
ماهو سوالف وحكـي لسـان
أو لحـن طــارف يغنّـونـه
ياليـل دانــه لـدانـي دان
ومع طلعة الشمـس ينسونـه
أو سالفـة كــان يامـاكـان
مـن ألـف ليلـه يعيـدونـه
ولو كل واحـد يحـط رهـان
ياكثـر نــاسٍ يخسْـرونـه
والختـم يحفظكـم الرحـمـن
وانـا لكـم حيـل ممنـونـه