السلام عليكم ورحمة الله وبركاته....
هذي أول مشاركه أشارك فيها وأتمنى تكون مشاركه مميزه(مسويه زحمه)
عندي لكم قصه أ خطرمنها ما فيه ولكم القصه...
تقول القصه (القصه هي اللي تقول هههههه)أبد فيه اثنين اصدقاء حيل ينقطون صداقه الاول اسمه مساعد والثاني مشاري مساعد عنده اخت تمووت بمشاري . .
ومره من المرارير الله يسلمكم ويدخل اهاليكم الجنه ويوفق جيرانكم ويأكل الفقراء والمساكين(مايسوى مشاركه مني) طنقرة في بال مساعد ياخذ اخته ويروحون الرياض خالتهم راح مساعد عند مشاري
وقال له :مشاري وش رايك نروح الرياض نقعد فيها كم يوم تستانس ونشفط جو ومعنا ساره ننزلها عند خالتي وناخذ لنا شقه ونقعد فيها كم يوم
مشاري: مساعد لا والله انت صاحي تتكلم من جدك وبعدين تعال انت تفكربعقلك مايصير اختك معنا ومااقدر اروح معك وانا بو مزنه(مسوي فيها مستحي)
مساعد: مشاري لا انا اكلمك وانا نايم وثم انا افكر بعقلي اجل بركبتي
مشاري: مدام السالفه شفطت هوا ماعندي مانع
وجا اليوم اللي مشو فيه على الرياض..طبعا ساره مستانسه يقول اللي يشوف وناستها ماخذه العلامه الكامله بالانجليزي (عقدتي من يومني بالمتوسط لحد الجامعه ) مشوا وهي جالسه ورا فارس الاحلام ومساعد هو اللي يسوق ..خذت ساره فرصه (تغث)مشاري وكل شوي تدق ظهره ومخلي الوضع طبيعي وتدق بظهره (لحد ماسوت آبار بظهره)مشاري صارخ صرخه قويه
مساعد:شفيك
مشاري: سلامتك مافيه شي بس حسيت شي داخلي بينفجر صارخت
مساعد: اذا تبي تصارخ الله لايهينك قبل لا تصارخ عطنا مقدمات روعتني وروعت البنت(مايدري انها راس البلى)وكل شوي تدق ظهرخالد وتقول
ساره:احبك ومااقدراعيش بالدنيا من دونك (تعرفون حركات المسلسلات المكسيكيه)
مشاري :عيب عليك يابنت اهجدي خليك ثقيله(حطوا في بالكم الكلام كله مساسره وبالحركات)
مساعد:مشاري ساره انا بنزل البقاله تبوني اجيب لكم شي معي؟
مشاري (وهو حاس بيصير شي )سلامتك بس لاتتأخر
ساره:خذ راحتك
ذات الحسن والجمال الست هانم خذتها فرصه تغثه
ساره:شوشو وش بلاك مستحي كلمني انا والله احبك
مشاري: الله يخليتس ماودي بمشاكل مع مساعد بسبتس ووخري عني بلا حركات المراهقين
ساره: طيب انا وش سويت لك علشان تسوي فيني كل هذا
مشاري: اهجدي هذا مساعد جا واسكتي
ومشوا الله يسلمكم وبدت ساره تكمل مشوارها في ازعاج مشاري وقف مشاري وقال...
مشاري: مساعد الله يخليك خلني اسوق بدالك انا خايف عليك واكيد انت الحين تعبان
مساعد: ايه والله مشاري الله يعطيك العافيه انا تعبان بالحيل
مشاري:ولا يهمك مساعد (الصديق وقت الضيق)
وكملوا طريقهم(أدري بتقولون وش ذا ولا رايحين لبريطانيا بس لنتم ورى ماتسكتون وتكملون ههه)
جت سندريلا (ساره)وقالت مساعد مساعد ابي دورة المياه(الله يعزكم)
مساعد: خير يامال البلى يالمهبوله وشفيك كذا الواحد يطلب وبعدين من وين اجيبلتس من جيبي
ساره: مساعد تنكت ابيها وانتهى الموضوع
مشاري : ساره هنا دورة مياه اوقف؟
ساره نياههههههههههههههها ماتدري وش بيجيك ايه الله يسلمك وقف
جلست ساره تنتظر بدورة المياه علشان يعرفون انها تبيها وطلعت وجلست ورا مشاري عاد مشاري دوروه ماتلقونه قعد منصدم طول الطريق على هالحركه اللي سوتها له ساره نام مساعد وكملت المسيره الذاتيه ههه كملت وبدت تعطيه من هالكلام الحلو وهو لسه منصدم من جيتها وراه وصلوا الرياض وجلسوا يدورون بهالشقق المفروشه 3ساعات يدورون بالرياض يالله الواحد يلقى له شقه فاضيه واذا لقى له تكون غرفة الحارس ماشاءالله ولقو لهم شقه ........
مساعد يبي له اقرب سرير يرمي نفسه فيه
مشاري يبي له حمام (الله يعزكم)ياخذله دش
ذات الحسن والجمال تبي أي فرصه تكلم فيها مشاري
مساعد :انا بنزل اجيب لكم عشاء
مشاري: لا لا لا مساعد لا تعب عمرك اجيب لكم انا العشاء( والله ذا خوف من ساره مو خوف على مساعد)
مساعد :وش بلاك روعتني لا انا اعرف لكم مطعم عليه اكل يطير الطير من فوق السماء
طلع مساعد ودخل مشاري الحمام (الله يعزكم)وهو طالع لقى قدامه تدرون من لقى دنننن دننننن (لازم الاصوات المرعبه ههههه)لقى ساره تنتظره متى تطلع طبعا بعبايتها لسه الحمدلله الحياء موجود تشنج مشاري امزح امزح جت وضمته ضمه قويه وهي تضمه دخل مساعد مشاري شاف مساعد ولا ماشافه طاح واغمى عليه
صحى مشاري وجمبه مساعد ومعه احد يضحك
مساعد:قوم ياالمؤدب استيقض ياغلام مابالك تروعت ومساعد منفجرمن الضحك قوم شوف من معي
ساره:قوم يامشاري انا محمد خويك الله يرجك ماعرفتني بس والله انك ونعم الصديق
وانتهت القصه على كذا(ملاحظه)محمد يتميز بتقليد الاصوات
واتمنى تكونون استانستم وادخلت عليكم البهجه والسرور ماصارت قصه صار العيد واتمنى اجيب لكم مواضيع احسن من كذا
وطــــــــن حبـــــــي
.
مساعد لا والله انت صاحي تتكلم من جدك وبعدين تعال انت تفكربعقلك مايصير اختك معنا ومااقدر اروح معك وانا بو مزنه(مسوي فيها مستحي)
مشاري لا انا اكلمك وانا نايم وثم انا افكر بعقلي اجل بركبتي
ومااقدراعيش بالدنيا من دونك (تعرفون حركات المسلسلات المكسيكيه)
يابنت اهجدي خليك ثقيله(حطوا في بالكم الكلام كله مساسره وبالحركات)
مساعد الله يخليك خلني اسوق بدالك انا خايف عليك واكيد انت الحين تعبان 
مساعد لا تعب عمرك اجيب لكم انا العشاء( والله ذا خوف من ساره مو خوف على مساعد)
ومعه احد يضحك 
العرض العادي
