اللي يبــينا عــيت النفـس تبغــيـه … واللي نبي عــيا البخـت لا يجـيبـه
كلنا نعرف هالبيت ودايمـ(ـن) نرددهـ ونسمعه بعد كــثــير
لكن القليل منا يعرف سبب او منــاســبة القصيدة
فأنا سمعتها واستغربت كثير ... اولـ(ـن) من اللي قايلها بعدين من مناسبتها.
قايل البيت (القصيدة) شــــــاعــرهـ اتوقع ان اسمها :: نوره الحوشان
يقولكم الله يسلمكم صارت بمنطقة القصيم و كانت الشاعره مستورة الحال مع زوجها الى أن وقع
بينهم مشكلة وتخالفوا على شي... وسبب طلاقهم طلاقاً لا رجعة فيه ، وبعد الطلاق ابعدكم ربي عن
الشر تقدم لها ناس واجد
يبونها حليلتن لهم (بيتزوجونها) حيث أنها مرأة جميلة ومن عائلة معروفة ومحافظة ، ورفضت
الزواج بعد زوجها اللي كانت تحبه وترى فيه مواصفات
الرجل المثالي . ( الله يذكرهـ بالخير ) ..
ويوم جاء ذاكـ اليوم كانت تمشي على طريق يمر بمزرعته ومعها عيالها منه
ويومنها مرت بالمزرعة اللي وهي تقز هاكـ القزهـ الا وهي واقفة بمكانها
وينطلقون البزارين للسلام على أبوهم وهي سمرت بمكانها تنتظرهم إلى أن رجعوا لها وأخذتهم
وكملت مسيرها ، وقعدت تذكرت أيامها معه وتذكرت من تقدم لخطبتها إلى بعد الطلاق وخطابها
ورفضُها لهم فقالت قصيدتها المشهورة التي يتداول الناس منها البيت الأخير الذي صار مثلا دارجا
بين الناس ولكن أغلب مرددي هذا المثل لا يدركون قصة هذا البيت الذائع الصيت
في منطقة الخليج كلها وهذهـ قصيدتها الرائعة:
ياعـين هِـلِّي صَـافي الدمع هِـلِّـيـه … وإلْيَا انتهى صافِيْه هَاتي سِرِيـْبـِه
ياعـين شـوفي زرع خلك وراعيه … شـوفي معَاوِيْدِهْ وشـوفي قِــِليْــبِه
من أول دايـم لرايــه نمـالــيــه … واليـوم جَـيَّـتْـهُـم عــلينا صعـيـبـه
وان مرني بالدرب ما اقدر أحاكيه … مصــيـبـة ياكـــبرها من مصـيـبـه
اللي يبــينا عــيت النفـس تبغــيـه … واللي نبي عــيا البخـت لا يجـيبـه