هذي القصيده أغنيه مرثيه( لمزعل فرحان) يرث فيها والده الله يرحمه
من أفضل الأغاني اللي سمعتها له أتمنى تعجبكم
وإذا ودكم تسمعون الأغنيه وأعجبتكم القصيده فعلا
خبروني وأنا أحطها برسم الخدمه
لاح الحزن
لاح الحزن في دنيتي وأجهر الشوف ** يبرق ويرعد في النواظر سحابه
بين النواظر صار بين ومكشوف ** في ساعة ٍ نوره وأعد الركابه
من سبة اللي مات وعيوني تشوف ** صوب الصدر نزاع الأروح صابه
جاه ونزع روحه وأخذها من الجووف ** قدام عيني مات مني نها به
مات وترك راسه على الصدر منسوف ** جسم ٍ بليا روح كل درى به
صار الحزن في خافقي يشر سيوف ** قطع خفوقي يوم فصخ ثيابه
فصخ وغسل ثم طيب وأنا أشوف ** كفن ودمعي مثل وبل السحابه
عقب الفجر شلناه للعود منسوف ** على النعش مايوحي اللي حكى به
ونزل بقبره بين الأعضاد ملفوف ** مدد ومن حوله جميع القرابه
حطيت لبنه تحت راسه كما النوف ** فكيت عن وجهه بيدي حجابه
صفو عليه الناس في عدة صفوف ** وخالطت دمعات عيني ترابه
قاموا يهلون الرمل هل بكفوف ** لين إندفن قبره ونص ٍ صابه
قمت أتعبر والعرب حولي وقوف ** حول القبر قلبي يتزايد عذابه
ذكرت أبوي اللي مع الناس معروف ** بحسن التعامل والوفاء واللباقه
أمس ٍ يكلمني وينطق لي حروف ** ليمن تكلم خاطر أهتنا به
واليوم فارقني ورافقني الخوف ** والقلب من الهوجاس أنهد بابه
ياليت موتي جاء من قبل لاأشوف ** ليته سطا بي وأتركه ماسطابه
لاشك هذا الموت والموت معرووف ** لاجاء يسل الروح ماأحدٍ درى به
العرض العادي
