السلام عليكم
صبحكم الله بالخير
قصة واقعية 100% يومية تحدث في كل بيت تقريبا الا من رحم ربي
قبل البدء بالموضوع اذكركم بقوله تعالي: ( يا ايها الذين امنوا ان جاءكم فاسق بنبأ فتبينوا ان تصيبوا قوما بجهالة فتصبحوا على مافعلتم نادمين)
المكان: بقالة في راس الشارع
الزمان: الساعة 9 صباحا
بطولة نخبة من ملاقيف الحارة...نخبة من نسوان الحارة ماعندهن لا شغلة ولا مشغلة الا السنترة في الشبابيك وقت القايلة....
تفاصيل الحادث::
زوج خديجة نسي ما يجيب لزوجته خديجة فطور من البقالة...... بعد ماراح زوج للعمل.... اشتهت عصير ولان ربي مارزقهم بعيال قررت انها تروح للبقالة مشيا على الاقدام علما ان البقالة قريبة جدا من المنزل .....يعني ما يحتاج انها تصير علمانية او ليبرالية او متحررة من العادات والتقاليد وتركب سيارة وتسوق
ولا يحتاج انها تركب مع ليموزين وتخلو بخلوة غير شرعية مع سواق ما يقرب لها
راحت للبقالة وكانت شلة من شياطين الانس _(على فكرة يقول الاستاذ عطية عبدالغنى الحربي ان شياطين الجن احسن من شياطين الانس.....بعدين اقولكم ليه.....الاستاذ عطية هذا درسني في الابتدائي الله يرحمه ان كان ميت......ويرد له فلوسه اللي ضاعت في الاسهم ان كان حي)_تراقب حركات خديجة للبقالة
اول شي وثبت (حصة) ويوم شافت خديجة قالت:شوفوا راحت للبقالة لوحدها
قالت ريم: يمكن زوجها مو موجود....
قالت حصة: يمكن تهاوش معها وترك لها البيت
قالت ريم: الظاهر انهم متهاوشين....لكن وش تتوقعون السبب
جابت هند الشاهي وجلست
هند: والله الرجال مالهم امان واتوقع انه مد يده عليها
قالت ريم: ومو مستبعد انه حارمها من خرجت البيت وشم الهوا
هند: اكيد....لا وفوق هذا مانعها من زيارة اهلها شكل اهلها يحرشونها على اهل زوجها وهي غبية تصدقهم
بعد ثواني دقت جارتهم احلام.
احلام: وينكم فيه..
هند: انتي ماتدرين؟
احلام: قولي لي وش صار
هند: خديجة راحت البقالة مشي..وزوجها تركها في البيت بدون فطور.
احلام: شوفي الفاجر..وهي وش سوت..
هند: اكيد بتترك له البيت وتروح عند اهلها
احلام: طيب مع السلامة
احلام راحت لاختها وقالت:
احلام: شفتي المسكينة خديجة.
سمية:وشفيها
احلام: زوجها تركها في البيت بدون فطور ...وحلف انه ما يجيب لها شي ...وياخوفي تكون حامل ويسقط الجنين من سوء التغذية
سمية: شوفي اللي مايخاف الله....ويمكن ما اكلت شي من امس...
سمية تتصل على نورة وقالت:
سمية: شفتي زوج خديجة وش مسوي فيها
نورة: لا والله ....لكن سمعت انه حالف يمين انه ما يجيب شي للبيت وسمعت كمان انه ماعاد يوديها لاهلها لانها تحش في اهله
سمية: ياليت على كذا وبس....المسكينة جاها فقر دم ...لو تشوفيها وهي تمشي والله العظيم قلبك يتقطع عليها
نورة تقابل سعاد وتقول لها:
نورة: شفتي الظالم زوج خديجة
سعاد: لا والله توني صاحية وش اللي صار
نورة:اليوم انا شفتها الصباح رايحة للبقالة والبنت مو قادرة تمشي من فقر الدم اللي جاها من زوجها الغبي
سعاد: اعوذ بالله الحمدلله انا مريحة راسي من الرجال ومستحيل اتزوج...لكن يمكن راحت توصل مقاضي لبيت جارهم..
نورة : مو بعيد يشغلها خدامة....
سعاد تقابل اسماء:
سعاد: شفتي زوج خديجة المنحل من القيم الانسانية
اسماء : وش فيه.
سعاد:اليوم طرد زوجته من البيت .....لا وقالها تجيب الفطور...والمسكينة اغمي عليها ولما ودوها المستشفى لقيو عندها انيميا حادة
اسماء: اعوذ بالله.....توها هند متصلة علي تقول انها صارت تشتغل خدامة باليومية وتقول ان الجنين سقط من قوة الطيحة
اسماء تكلم فوزية:
اسماء: سمعتي وش اللي صار برجال اليومين هذي
فوزية:وشفيه
اسماء: تقول حصة ان خديجة صارت خدامة وصارت تصرف على زوجها
فوزية:ومو بعيد انها هي اللي تصرف عليه وعلى اهله....على الاقل يطلع يخليها تسوق ارحم لها
وهكذا دواليك من حرمة لحرمة والموضوع كله كذب في كذب والبداية كانت من روحتها للبقالة لاسباب طبيعية جدا وانتهت في وادي ثاني...
مثل الشياطين اللي تركب فوق بعضها لتسترق السمع.....يبي لهم شهاب ثاقب....
ومثل كرة الثلج كل ما زاد الارتفاع زاد كبر الكرة
ومثل ومثل ومثل
الامثال تكثر لكن الحقيقة مؤلمة وهي التفريق بين الازواج
يقول الاستاذ عطية عبدالغني الحربي ان شياطين الجن تتأثر بالقران وتبعد عن اللي يقراه لكن شياطين الانس قد ماتقرا ما يتأثرون....
عذرا بنات حواء انا ما اعمم ......لكن هذا الواقع
العرض العادي
