بسم الله الرحمن الرحيم
اتمنى ان قصتي هذي تعجبكم وهي حصلت لي شخصياً ............
أول ما تزوجت رحت للغربية لأخذ عمره المهم جلست في جده ثلاثة أيام في يوم من هالأيام قلت ابأخربها وآخذ لي شاليه ونطخطخ شوي المهم كلمت على هالشاليهات وكلهم من الالف وخمس وانت طالع المهم لقيت لي واحد وأخذته بألف وميتين ريال سعودي الله لا يخسر ........ المهم كانت الشاليهات هذي في شمال جده في أبحر والله وناصل هناك ونأخذ الشاليه وكان يوم اربعاء المهم كانت الشاليها فل ........... المهم وصلنا الظهر علشان نحلل القيمة ووالله سعة صدر فله صغيره دورين على الطراز الامريكي ...... طلعنا للشاطيء اخذنا لنش مو لنش غداء لا قصدي قارب واخذ بنا لفه بمبلغ وقدره الى ألحين الوضع طبيعي مع أن هنالك بعض المناظر اللي تعودنا عليها في كل مكان من بعض الشابات هداهن الله وفتح على قلوبهن ......... بالليل سويت فيها رومانسي وطلعنا للبحر على هذيك المشايه الخشب اللي تصير داخله للبحر بس ناقصنا كميرا ونسوي فيديو كليب ......... المهم يوم رجعنا و دخلنا الشاليه حقنا ـ ايه هين حقنا ـ اللي مستاجرينه قصدي .... وكان فيه زي الحوش صغير جانبي وفيه المسبح وكان تطلع على هذا المسبح من الفله عن طريق باب ـ اكيد باب يعني دريشه ـ زجاجي كبير يفتح على الصالة والله وأشوف ذاك الولد اللي يمكن عمره ثلاثة عشر سنه داخل يتمشى في الحوش اللي فيه المسبح قلت وشي يبي ذا واطلع عليه وأنا معصب وكان فيه باب من الخارج يدخل على المسبح على طول دون المرور بالفله المهم صارت كورته طايحه عندنا وجاي يآخذها المهم يوم شافني يحسبني مثل ربعه بقوله اشبك يواد تبغ كورتك هيا خدها وروح لهلك ........ لا والله قلت له خير انشاء الله ومش دخلك المهم الولد انخبص وقعد يتكلم بلغه مكسره والله هو والله هو .......... هو اللي قللي جيب الكوره انا مالي دخل .... أنا والله ما قدرت أمسك نفسي شكل الولد كان جداً مضحك ورحمته في نفس الوقت ......... قلت خلاص والله ماسويلك شيء ... تفهمت الوضع وعرفت إن قصده شريف ـ شريف والا مدحت ههه ـ و عفوت عنه بشرط انه ما يعود لها ................. وفي الفجر برضه حبيت إني اصير رومانسي مره ثانيه ونطلع على طلوع الشمس على نفس مكانا اللي أمس الممر الخشبي وأول ما طلعنا من الشاليه متجهين للشاطيء الرملي كان فيه وحده جايه من برا واظنها شاميه يعني من الشام وكانت كاشفه وجهها والشعر أشقر المهم ... قابلها واحد من ربعنا اشهب الهب يعني ما فيه أمل يكون يقرب لها ....... سلم عليها باليد طبعاً وأخذها معاه وراحوا للشاليه حقه المهم انا وشلون اشرح لهالقرويه اللي معي ـ زوجتي ـ عن هالموقف بس قلت أكيد انها قريبه له وجاي يستقبلها علشان ما تضيع الشاله و كملنا مشينا .. وقبل ما نصل الشاطيء كان فيه مسبح وحوله شباب وكان فيه طاولات كان فيه طاوله عليها يمكن خمسة شباب والثانيه يمكن عشره أو أكثر اللي لفت انتباهي ان الطاوله اللي عليها عشرة شباب كان فيه واحد منهم له شعر زي ذيل الخيل وبعد ما قربنا شوي الا والله وتطلع بنت وادقق الا والله بنت وحتى آخر الجهة الثانية صار فيه بنت ثانيه .. لا حول الحين الاوله قلنا يمكن يصير قريبها وهذولا وش نقول ......... واللي زاد الطين بلله اني سمعت واحد من الخمسة اللي جالسين بدون بنات وشكلهم طفارى يقولون لواحد هاه تقط معاهم ........... قلت آفا الدعوه فيها قطه ........ وكانت لاعباة و لا هم يحزنون بنطلون جنز وكاب على الرأس بس الثانية لا كانت مطلع الشعر بس والا عليها العباة ............. المهم صارحت زوجتي وقلت والله هالمكان ما يصلح لنا وفعلاً يعني صياعه وقلت حيا عيني عينك والله ما توقعت اني ابلقى شيء زي كذا عندنا .. مع اني سافرت ورحت وجيت وشفت بس ما توقعت انها تصل الى هالدرجه وللأسف ان جده ما تبعد عن مكه الا 60 كلم .. المهم و انت تمشي بين الشاليهات تلقى فيه دريشه او نافذه كبيره تطل على الممر اللي بين الشاليهات وتكون مفتوحة طبعاً و تشوف الاب يشيش وهذا شيء رسمي في المنطقة الغربية والبنت جالسه على طرف النافذه وتطالع في الرايح واللي جاي ........ ولا رافعين صوت المسجل على احد هالمغنين ... يعني صياعه على مستوى عائلي .......... يالله لك الحمد والشكر اللي فضلنا على كثير من خلقه تفضيلاً............. لا ونسيت اقول لكم في الليل كان اللي يأجر الجت سكي او الدبابات البحرية مبسوط مره بتقولون ليش ... ابو الشباب قاعد يركب البنات معاه في الدباب ويدخل فيهم البحر ... المهم أني ماصدقت يجي وقت الطلعه الا والاستقبال يقول لي بالتلفون واين يا بو الشباب كمل معنا اليوم لايفوتك في حفله غنائيه على كيف كيفك قلت ياخي واين انا ماني حق الاشياء هذي قال لا مافيه شيء كلها عوائل ... قلت لا علشان الدعوى تصير خلطبيطا ............ المهم أني حمدت الله اللي عافاني مما ابتلاهم به وصحيح أني قصرت في النصح أو الارشاد لكن الله يتوب علي والله اللي شفته يخلي الرأس يشيب .......... والله يرحم الحال و يهدي ضال المسلمين ... والله ماكتبت الا ما حصل لي ...
وعذراً على الاطالة ........................
العرض العادي
