السلام عليكم
كيف حالكم ان شاء الله تمام
الواحد دحين لمن يقعد مع بشكة الشباب لازم الا من رحم الله انو يكون هناك تريقة على واحد واستلام وتقطيع فيه طيب ليه؟
اثبتت الدراسات الورورية الحديثة انو المجلس ما يكون لي طعم اذا خلا من المحشات والانتقاص في خلق الله (هدا طبعا راي معظم اللي شملتهم الدراسة وعلى فكرة ترى انا ما سالتهم شخصيا بس استنتجت من تعابير وجههم (مسوي فيها ابو العريف)) (هدا طبعا راي معظم بشكات الشباب)
الخلل انو اصلا مجتمعنا في نظري يقدر الانتقاد واذا منتو مصدقين افتحوا اي جريدة رياضية او فنية او او او.... و اقرو راي اي كاتب بعد اي حدث.
طيب و الحل؟؟؟؟؟؟؟؟ (يا ابو العريف)؟
الحل اول شيء انو كل واحد يراجع نفسو ويحاسبها بينو وبينها عن طريق قراية الايات الي مكتوبة في القران وتحذر من هدي الاشياء اللي قدي ايش كترها زي ما قال ربنا -اعوذ بالله من الشيطان الرجيم- (يا ايها الذين امنوا لا يسخر قوم من قوم عسى ان يكونو خيرا منهم ولا نساء من نساء عسى ان يكن خيرا منهن)
قبل ما اخش في النقطة التانية احب اذكر انو يا بنات ترى الكلام موجه ليكم كمان و اذا منتو مصدقين اقرو الاية بس معليش انا ما قدرت اسوي دراسات ورورية عشان انتو عارفين السبب
تاني شيء الواحد يحاول بقدر الامكان انو ينصح اللي دايما يشوفهم ويقابلهم وجه لوجه كل يوم لانو الواحد يقبل من القريب منو اكتر من الشخص الابعد شوية وعشان كدا ديننا الحنيف امر بنصح الاقارب اول
اخيرا وليس اخرا لازم نشوف الحل عشان نخلي مجالسنا بنفس وناسة وفلة مجالس التريقة والكلام الفاضي. بالنسبة للشباب ترى في مليون موضوع نتكلم فيه وحلال زي مسلا الكورة والسيارات والرقي بالامة (مسوي فيها مهتم انا ووجهي) وووووو(كملو الباقي طبعا بس محد يحطلي التريقة والغيبة اللي هيا اخطر من باب اولى)
وعشان البنات ما يزعلو ترى عندكم الف موضوع (انا اقصد بالف لاني اجهل كتير في عالم الحريم بحكم اني ورور) زي المكياجات عالم الازياء الطبخ وووووو(ارجو من احدى العضوات انها تكمل الفراغ )((مسوي فيها اختبار)
و السلام خير الختام
العرض العادي
