يمه غدرني الشيب قبل أفـرح بشـيٍ مشتهيـه
أثري نحرت البحر وانا كنت اخاف من البلـل


يمه ترى حتى العسـل نـاسٍ تعرفـه ماتبيـه
والا ترى الله مطريٍ في سورة النحل العسـل


يمه ترى لوكل رجلٍ جـا مثـل جـدّه وابيـه
ان كان صاروا كل خلـق الله نبييـن ورسـل


كم كنت القح نخل جدّي رحمةالمولـى عليـه
وان قلت برد يقول "عمر البرد مالقّـح نخـل"


وكم قلت فاسي ثلّمه جذع الأثل وازريت فيـه
والبيد سيل من الجفاف وشلون ابحطب لك أثل


والبير ياجدي حِثـل والحِثـل ماحـدٍ يرتويـه
وشلون ابرمي الدلو في بيـرٍ وصافيهـا حِثـل


ويقول"مزن الغيب يذبحه الظمـا مـن يحتريـه
لابد مانشـرب همـاجٍ ليـن نلقـى لـه بـدل


ولّم حطبك وماك واللي كتب لـه رزقٍ يجيـه
ودنياك داريها قبل مايسبـق السيـف العـذل "


طفولتي كانت رجولـه مابهـا افـراحٍ وتيـه
في داخلي حتى البراءه عاشت رجولـة طفـل


طفولتي همّ,, وشقى يمّـه ولا قـد قلـت ليـه
حتى مراجيح الطفولـه كانـت شـداد وجمـل


أكبر ويبقى الهمّ فيني مثـل ضيـفٍ بالوجيـه
أهجّ مـن رمضـا الضيـاع لمربعانيـة ملـل


يمّه ومن حظّه مثـل حظّـي ردي لا تعذليـه
لو ساقته فوضى الزمن لديـار عاقلهـا خبـل


حاولت من عاري الزمان اخذ سمل ثوب ارتديه
واثري مثل من حاول بياخذ من الحافـي نعـل


أحلى شبابي وانتهى في غربتـي قبـل ابتديـه
ما لولشت له بنت بدو اتمشط اطراف الزعـل


رجعت مثل اللي طلب ثار ولده من عند اخيـه
شديت بالقعدان حملـي يـوم ضيعـت الزمـل


يمه وكـلٍ قـال مـا لأمـه مثيـل ولاشبيـه
واللي خلق كلّ النسـا مالـك شبيـه ولا مثـل


يمه دخيل تراب ماطا رجلك الدمـع احبسيـه
هالكون كله مايسـاوي دمـع عينـك لانهمـل


يمه فرح والا حـزن دمـع الغـلا لاتسفحيـه
تبقى دموعـك غاليـه لوكـان سبتهـا بصـل




ولاّ انا حظـي كـذا مافـرح بشـيٍ مشتهيـه
يمه مادام اني غرقت وشلون اخاف من البلـل


محمد الدحيمي