|
لعبه عطوني وجه !
السلام يا حبايب الود !! هذي لعبه مادري راح تلعبونها و لا لأ زي المرة اللي فاتت حطيت لعبه و ما عطيتوني وجه ... بس يالله اجرب حظي :
انا الحين راح اكتب لكم جمله و اخر كلمه من الجمله يعرفها اللي بعدي حسب ما يرى ... مثلا : فجل : هذا انسان يسمى شلفنطح و هو من اعضاء منتدى الود اللي بعدي راح يمسك كلمة منتدى الود و يعرفها و هاخر كلمه من تعريفه يعرفها اللي بعده و هكذا ........... يالله اللي بعدي عليك منتدى الود ... ============================:) |
مساء الورد والياسمين
يعطيج العافيه اختي مرزوقة واللعبة حلووووووووووووووووووووووة...
منتدى الود: احلى منتدى واروع مكان يجمع فيه ناس كل واحد قلبه على الثاني .. وتضاف فيه مواضيع حلوووة حيييل.. تحياتي الفجر |
هاع
تسلمين يالفجر البعيد
وانا ما ادري ليه محد يعطيني وجه اذا حطيت سالفه المهم... اخر كلمه كانت مواضيع حلوه حيل= هذي مواضيع نقراها نستانس عليها لكن اكيد ماهي مواضيع انا مرزوقة اللي بعدي ..انا مرزوقه كمل |
هاااااااااااااااااااااااي
انا مرزوقة =عضضوة متميزة في منتدى الود واظن انها من الشرقية
وبااايووووو عنونييي :cool: |
يسعد مساكم..
اظن آخر كلمه "منطقة الشرقية "..
المنطقة الشرقية : منطقة حلووووة وانا احب اروحها واحلى مافيها سوقها... تحياتي الفجر |
سوقها .... 1. كلمه تعني المكان المراد للتسوق و هو ما تذهب له تامرة كل فتره و الثانيه
2.سوق بمعنى قد يعني سوق السياره و الهاء ضمير متصل ..... ( يا خماعة اللعبه انك تعرف الشي تعريف تحاول تخليه مضحك اكثر ما هو جد ) تعقيب على كلام الحلى الكله ... مشكوره بس انا مو من الشرقيه :D ====================== |
يسعد صباحكم ..
ضمير متصل : بنت عمي اللي ما تفج لازقة فيني كانها لزقة عنزروووت :D :D :D :D
تحياتي الفجر |
لزقة عنزروت = كلمه قديمه تعلمتها من التلفزيون !! و تطلق على شلفنطح اذا لزق هنا و استملح حاله !
=========================بس=== |
ما عاش اللي ما يعطيكي وجه يا مرزوقة،،،، إحنا إيش بنسوي هنا.
الثانية: 1/ هي فترة زمنية يختلف تأثيرها وقياسها على الناس،،، فالمستعجل يدورها و ما يلحق يقيسها،،، و بارد القلب،، علاقته بيها زي علاقة لاعبي الهلال بالكتب. 2/ الثانية: هي تعريف الزوجة للمرأة التي يتزوجها زوجها بعدها،،، وغالبا ما يضاف إليها صفات أخرى مستقاة من البيئة المحلية، مثل (خطافة الرجال،،، أم 44،،، ). 3/ الثانية: هو إسم يطلق على القناة الأرضية التي تبث إرسالها من السعودية،،، ولا يعرف لها منهج معين أو أسلوب،،، البعض يسميها غصب 2 والبعض يسميها إستبنة القناة الأولى وخصوصا اثناء المباريات، والبعض لا يعرفها على الإطلاق،، لأنه ماله إلا هيفاء. |
يسعد صباحكم ..
هيفا: البنت اللي دق العود يعني انا :D :D <<< مصدقة نفسها الدبة..
ما اله الا هيفا : فاصخة للحيا والادب تحياتي الفجر |
يا حياك الله يا عمده و الله يعز مقدارك ان شاء الله
بس بصراحة الثانيه من وين جبتها ؟ ما كانت اخر كلمه !!!!!!!!!!!!!!!!!!!!!!!!!!! بس مشكور لانك اعطيتني وجه ! :) |
سوووووووووووووووووووووري
دخلت عرض سامحوني ..
المريخ : كوكب بعيد واسم يطلق على الاماكن البعيدة للمبالغة من قبل اخوي واختي :D :p :p تحياتي الفجر |
اختي و اخوي = الناس اللي يوهقوني اهلي فيهم دايما اذا جو يطلعون ويذبونهم بجبدي !
=======================بس=== |
يسعد صباحكم ..
جبدي : العضو الذي ينقهر في وجود شي يرفع الضغط والسكر!!
بااااااااابااااااااااي الفجر |
مرزوقة ،،،، انا جبت (الثانية ) من ثالث مشاركة لك،،،، وعلى بال ما كتبت الرد،،،،، الحبايب دخلوا في الموضوع.
جبدي: وتترجم ألى العربية (كبدي)،، هي العضو المفضل في جسم الإنسان والتي أثبت علماء البطحاء علاقتها بالعاطفة عند الإنسان،،، ولذلك يطلق على الحبيب إسم (بعد كبدي)،،، ويرتبط بالكبد بعضو آخر هو المرارة،،، لذلك عندما يغضب الإنسان من حبيبه،،، يقول له (فقعت مرارتي يا مال الغنيمة) |
اولا = السكر لفظ يطلق لوصف انسان غايه في الاخلاق و الحلاوه
امثال الفجر البعيد و الناس الطيبه امثال العمده ! ثانيا = الغنيمه = ما يربحه المسلمون بعد الحرب مع المشركين و ما اربحه بعد المظاربه مع اخواني <------------ توري انها دايما تفوز نييهاهاهاهااه ام الفقش =================================بس :D |
مرااااااااااااااااااااااااااااااااااااااااحب
أم الفقش = هي عضوه في منتدى الود (مرزوقه) ودايما تدخل علينا باطول والعرض تحيااااااااااااااااااااتي المـــــــــنــــــــســــــيــــــه :D :D :D :D |
بالطول بالعرض= مصطلح تستخدمه مرزوقة لما كانت بالابتدائي مع شلتها لما تتهاوش ... و تغني معاهم (بالطول بالعرض شلتنا تهز الارض )
======================بس== |
الأرض: هي كل ما تتمني أن تلمسها قدماك،، عندما تكون (حشران)،، وإنت في طائرة،،، وباقي على الوصول 10 ساعات،،، ولا تستطيع إستخدام دورة المياه في الطائرة ،، لضيقها قياسا بكرشك الكبير
|
كرشك الكبير= ذلك الجسم الكروي الذي في مقدمة الانسان و به النتوء المسمى بالسره و التي بدورها تربط الجنين بامه !
\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\ \\\\\ |
أمه ====== ذللك الانسان الطيب الذي يعطي بلا حدود
|
بلا حدوود = برنامج على الجزيره القناه الغثيثه
============================ |
[shdw]مرااحب[/shdw]
القنااة الغثيثة == يامكثرها من قنوووووات عدي واغلطي [gl]سلاام[/gl] |
اغلطي = مصطلح طلبته مني اروى و معناه افعلى الغلط بس انا ما اغلط انا شاطره
======================== |
اف اف ... والله اني ما شفت الموضوع الا اليوم :D <--- مبسوط مرة فيه تعريفات حلوة ... هذا الموضوع اللي يرضي غروري
وعلى قولتس يا سحيلة ... ببلط ان شاء الله هنا :D الله لا يعطي عدوانتس عافية يا سحيلة :D <-- نذل مهوب قايل الله يعطيتس يا سحيلة العافية على الموضوع كخخخخخخخخخخخخ اية نجي لأخر كلمة ... يا قلبي وشي وشي ... انا ما اغلط انا شاطرة !!! في اللغة بمعنى : مشوا خشومكم تمسكون علي غلطة :D .. وتقال في بعض الاحيان ... مش بوزك .. اي هيهات هيهات ... :D اما في الاصطلاح : فتعرف الشاطرة ... بأنها البنت المؤدبة اللي كلها مليحة ... اللي تلبس أبة ( الأبة هي الشريطة البيضاء اللي تلبس في المدرسة :D ) وتتكتف حتى لما تجي تطالع افلام كرتون !!!( ليش ما أدري كخخخخخخخخخخ ) .... وغالباً تكون الشاطرة متفوقة في دراستها والمواد العلمية... ونبيهة وذكية جداً في تلك الأمور ... اما في باقي أمور الحياة ... فهي دجاجة صقعاء .. اي ما عندها ما عند جدتي منيرة الله يغفرلها ان شاء الله... :D وينلعب عليها دايم .. كذلك تعاير بالدافورة ( اي تلقب بالدافورة ) ... وتكون غير محبوبة من صديقاتها الشيطانيات !! لغيرتهم الدائمة منها لأنها تأخذ علمات في المدرسة وأهم لا !!! وهذا التفسير سواءاً في اللغة أو الاصطلاح .. لا ينطبق بتاتاً البتة عليتس يا سحيلة ام الخلاقين :D للأسف يعني كخخخخخخخخخخ |
الخلاقين،،،
يقول الزمخشري في كتابه (الطق والخلع،، في حياة عبيد الضلع): الخلاقين: هي ما تعرف به نية و شخصية اللي الشخص اللي يرتديها،،، فيقال: هذا ولد نعمه،،، إذا إرتدى النظيف من الخلاقين لمرة واحدة،،، والتي كلفته شراء وشحنا من (ديفيليه دو باغيس) ما يوازي مقدم عقد زين الدين زيدان. ويقال: هذا ولد عفن،،، إذا إختلفت الخصائص الفيزيائية للخلاقين عما كانت عليه قبل سنة حفر البحر،، والتي قام فيها والي قندهار بتوزيع الشرهات على الناس ومنهم الجد رقم صفر للولد العفن. ويقال: هذه بنت فصعه،،، إذا إرتدت من الخلاقين،، ما يدخل الشك في قلبك حول ذمة الخياط،،، الذي خنصر ريع متر من الظهر وشبرين من الركبة، وحاول قدر الإمكان أن يحزق الخلاقين على البنت الفصعة، لكي يعطيها الإحساس بانها كارولين وليست حصة. |
صباح الخير يا عسولييين
مشكوور و الله يالفجل على تواجدك معانا و على الاطراء اللي غرقتني فيه ! و اما عن تعريفاتك فما شاء الله عليك بردت قلبي باللعبه دوري الان : اخر كلمه كانت حصه حصه = الفتره الزمنيه التي تقضيها على اعصابك تنتظرها تخلص عشان تفتك من الدرس او المدرس!! حصه = مرة العم ام فرقه و التي تكسر الخاطر حيل لشدة طيبتها و سذاجتها حيث استغلت و انلعب عليها ... مع اني ما اعتقد ان فيه حصه ينلعب عليها الحين !! ====================و بدون زعل |
أسعد الله أوقاتكم بالعمده.
المدرس: هو كائن فضائي،، ترك كوكبه وجاء ليتنكر ويعيش بيننا كبني آدم،،، مواصفاته الفيزيائية مشروحه في فيلم (MEN IN BLACK)،،، وتقوم الحكومات في الأرض على رعايته،،، وأنشات وزارات التربية والتعليم أو المعارف ،،، كتمويه وتغطية لحقيقتهم أمام المجتمع... وعادة ما يكون هذا الكائن محسودا من قبل الناس لكثرة إجازاته ولكونه جبانا لا يتعامل إلا مع الورعان ولا يواجه الرجال إلا في إجتماع سنوي يسمى مجلس الأباء،،، يختفي هذا الصنف خلال فصل الصيف،،، نظرا لعدم إمكانية هذه السلالة تحمل درجات الحرارة،،، وتجد العزاب منهم،، مربعين في مراقص جاكرتا،،، والمتزوجين،،، حدهم القاهرة ،،، عشان الرقابة. |
الرقابه = من المراقبه و هي ما تقوم به الزوجه مع زوجها حتى ما يحاول يفلت و يسوي حركات هنا و لا هنا !
======================= |
هنا ولا هنا:
جملة صوتيه، غالبا ما تكون مصحوبة بتعبير خاص على الوجه وتنظيم عملية التنفس بشكل يناسب الحالة،،، فالرجل الذي يصحب زوجته الزنانة إلى السوق،،، وتكون زوجته حائره بين العديد من الأصناف،، وتستحي أن تحرج زوجها ذي الدخل المحدود،،، فيرمقها بطرف عينه،، وتصدر منه زفرات كزفرات ثور أسباني،،،يثم يقز على أسنانه،،، يقول ( يا حرمه خلصينا هنا ولا هنا ؟ إنتي عين عاللحمة وعين عالشحمه ؟؟) |
الشحمه = يووه تذكرت عيد الاضحى و الذبايح و اللحوم و الشحوم و ريحة الدم .... حامت كبدي بروح انام !!!!!!!!
=========================== |
أنام:- خمده تخمد اللي بالي بالك ياللي منت معانا
|
وجعوه مبعد كملت 24 ساعة ووصل الموضوع ثلاث صفحات ... والله انكم بربراين ( جمع بربارة :D )
العمدة بالغصب !!! اموووووووووووووواح عليك مشتاقلك موت الكلمة وشهي اللي تبغوني اعرفها لكم ... ياللي منتي معانا !! هذه كلمة تقال غالباً في الاحوال التالية : غالباً تقولها المدرسة لطالبة اللي في أخر الصف من الفصل ( في الدرج الأخير يعني ) اذا كانت لاهية في شين ثاني ( مثل انها تشخمط على السبورة .. او تكتب في دفترها ذكريات ... او ترسم على ثوب صديقتها اللي قدامها ... والى اخرة من سوايا البنات الكسر في الدراسة ..اللي تنتظر متى تعرس بس وتفتك من قومة الصبح :D ) وعادة يتنوع وقع هذه المقولة على حسب طبيعة اسلوب المدرسة التي قالتها .... فقد يرافقها في كثير من الاحيان ... قطعة ( كسرة ) من الطبشيرة ترجم على البنت المنشغلة ... وذلك للتأكد من ان تسبد المدرسة قد برد وهدأت :D ( قاعدة المسيكينة تشرح طول اليوم وهاذي معطيتها الخامس كخخخخخخخخخ ) ..او قد يرافقها في بعض الاحيان خزة بالعين ( تناظرها نظرة شرانية ) قد تفقد البنت وعيها في بعض الاحيان ... وبعض الاحيان قد تجلد بالعصا جلداً مبرحاً حتى تتأدب كخخخخخخخخخخخخخ مابي اطول :D ولا ترى لها مواقع اخرى !!! |
هلالالالا مرزوقه وفجل الله يجمع بينكم بالخير:confused:
ليش ما تروحون تناموووون وتريحونا امزح معنى الكلمه فجل : نبات برمائي ينمو فوق السفن القديمه الغرقانه في البحر المتجمد الشمالي كلودا سلالالالالالالالالامات :D |
جاين نشيط بسم الله عليك يا بدون ... وينك ذالفن له صدز :D
وبعدين وشو اللي قاعد تعرف الفجل .. سلامماااااات ... محد جاب طاريه اصلاًَ... وتراه مهوب طحلب يا بابا !!! ميز بين الفجل والطحلب :mad: <--- حاقد على بدون بس هين الوعد قدام ... يجيلك يوم يا ظالم الكلمة : سلاااامااااات المقام الاول لقولها هو كالتالي : تقال للمريض عندما يدخل المستشفى ... وهي عبارة عن كلمة لمجاملة المريض... ودعوة سريعة له بالشفاء .. بمعنى السلامة لك ان شاء الله ..وانت اصلا في الحقيقة ما جبت خبره :D اما المقام الثاني لها : فتقال عندما يخش عليك انسان عرض في اي امر من امور الحياة وتبغى تتلاقط وتتهاوش انت وياه ... فمثلاً لو يحدك واحد بسيارته وانت ماشي بالطريق ... فستقوم بفتح الدريشة .. وتقوله بصوت عالي " سلاماااااات يا بو الشباب ... وين وين ما تشوف " فإذا اعتذر لك ... فقد عتق بجلده وكأن شيئاً لم يكن !! اما اذا طول لسينة عليك ... فسيكون هنالك مضاربة وقد يصل الدم إلى الركب على قولتهم اللي بعدي عرف " المضاربة " :D ... صاك عليكم ... عشان مايجينا واحدن افدغ زي بدون زعل ويعرف شين من عنده :D |
فجل عين احسود فيها رموش لاتنظلني
احبك يافجل لو ماتصير مع السلطه:D المضاربه هي مطاقه يعني يجيك واحد ملقوف مثل فجل ويقول كم الساعه وانت معصب تقوله سلامات يحدك بسيارته وتطقه لين يصيح مضاربه مأخوذه من مضارب بن فلان اي يتضاربون على المكان الجميل اللي بعدي الجميل:confused: |
الجميل= هو ذلك الانسان الذي تعرف على معنى الجمال و اصبح يلقب بالجميل منذ ان التقى انا مرزوقه
====================يا حظكم بتعرفوني الحين مين كدكم.......... و بعدين يالعمده خمده تخمد اللي في بالي ,,,, مالت على الباميا ============================== |
ايوالله كلتس ملح يا سحيلة .... اشوا اننا نعرفتس ... امحق :D
الباميا ... او الفاصوليا ... واحد منهم ماني متأكد هو كالتالي : نبات اخضر اللون ... لما تفكه يبطبط منه حبات دائرية الشكل ... ويؤكل الباميا عادة مع بعض الطبخات الشعبية مثل ... المرقوق والمرقة وله طعم طيب المذاق .... عرف المرقة .... :D |
يوووووووووووووووووووووووووووووووووووه وش قصة هالمنتدى معاي ...
يا اما ما يرضى يدخلني و لا يدخلني بس ما يخليني ادخل على السايل و الصفحه الخاصه فيني !!!!!!!!!!!!!!!!!!!!!!!!! انا مليت من هالحركات ................ شوفو لي حل وش اسوي ابطل مرة وحده يعني ؟؟؟؟؟؟؟؟ من جد وش السالفه ؟ |
يا آنسة سحيلة،،، يا مالك تنقعين في المطبخ ما تطلعين إلا منبتة ثوم
المرق يا فجل: هو خلاصتك وكل ما ينتج منك من سوائل خلال مراجعتك لآي إدارة حكومية في عز الحر والرطوبة في جده. وإحتراما لمشاعر المرهفين لن أزيد. ياللي بعدي عرف جدة |
| الساعة الآن 04:16 AM. |