ديمه انا مااهنتك لمن خطبتك انا طلبتك قدام الرجال وقلت اني شاري بنتكم للمرة الثانية واذا ماوافقت بخطبها لين توافق .. بس اتصلت عليك ابي اضغط عليك وتوافقين ..ابيك توافقين غصب .. وماابي اهين نفسي قدامك انتي بالذات اكثر من كذا .. صحيح سامي وماجد انقهروا مايبون يحطون ناصر بالموقف هذا لأنه كلمك عني ورفضتي وخايفين يزعلك مرة ثانية بس مافيه حل الا اني اخطبك مرتين وثلاث وعشر .
كنت فاتحه فمي وانا اناظره ماقاطعته مهند خطبني زي الناس بس كذب علي
وقف قدامي قال : كذبت عليك وكانت العواقب وخيمه .. ماحبيتيني ، واحتقريني واعتبرتي اني اهنتك وغصبتك على الزواج مني .. المشكلة ماجات فرصة اقولك وقتنا كله زعل ونقاش حاد ومشاكل وعوائق .
... آآه ياديمه عذبتك معاي كثير بس وش اسوي اللي هنا ـ كان يضرب على صدره بيده ـ مايبي غيرك وكنت مستعد اسوي أي شي عشان آخذك ..
تكلمت بهدوء رغم انفعاله ورغم جديته ووضوحه وصراحته بالشكل هذا لأول مرة معاي قلت : خلاص انسى يامهند .. انا واثقة من حبك لي وممكن اني انا سببت لك التعب اكثر مما سببته انت لي .
حطيت يدي الصغيرة بيده القوية قلت : حبيبي خلنا نبدا صفحة جديده ..
بسرعه وفجأة شالني بين يدينه ولف فيني قال : حبيبك ياديوم حبيبك من قلب ولا كلمه عاديه .. كان يضحك ويدور فيني
: ههههههههههههههههههه طيب سيبني واقول لك .
نزلني على الأرض بس ضمني على صدره قال : نزلتك يالله قولي وماراح ازعل
انا على صدره حقيقه مو خيال ياناس هذي اللحظات هي اجمل شي بحياتنا هي اللي تنسينا كل العواصف اللي مرت بحياتنا قلت: زوجي وحبيبي وأغلى الناس .. اخذتني حتى من نفسي يامهند وقدرت تمتلك مشاعري وقلبي وتفكيري ..
حطيت راسي على كتفه وانا احس بانسجام وراحة نفسية هااااائلة وقلت له : مشتاقة لك كثييير والله مشتااااقة لك ومااقدر اعيش بدونك .
حسيت فيه وهو يتنهد بقوة وكأنه يخرج من صدره هم ولا شي مثقل عليه قال : الحمد لك يارب .. والله ياديمه ان هذا مطلبي من الدنيا انا حققت كل اللي كنت اطمح له .. اصير دكتور ، وتخصص ممتاز ، وراتب اكثر من ممتاز، ووحدة حلوة وفيها كل المميزات اللي يتمناها أي رجل وتحبني . وتحبني ياديمه زي مااحبها .
: خلاص مهند انا وانت تعبنا كثيير لازم نرتاح ... حبيبي انسى خلنا نفرح محتاجين الفرح مانبي هم وذكريات حزينه .
شفنا خالي ايمن خارج يدور علينا قال مهند وهو يبعدني عن صدره ويمسك يدي : خالك هذا دمه ثقيل .. الله يذكر ناصر بالخير بس .
: ههههههههههههههههه حرام عليك والله خالي ايمن طيب ومايقصد شي .. اش رايك ندخل عند جدتي تتعرف عليها اكثر .
: يالله
لف يده حول وسطي ومشينا مع بعض واحنا بطريقنا لف مهند على اليمين مكان جلستنا انا وجدتي البارحه
قال : اوووووه ....شفته يطالع باللوحه اللي رسمتها نسيت ادخلها كنت استناها تجف .
: هههههههههههههه شو رأيك ؟
تأمل اللوحه وطالعني قال : جايبة معاك صور لي ..؟ من فين نقلتيها ؟
: مممممممممممممممممم نقلتها من هنا ـ وأشرت على قلبي ـ
جلس مهند يناظر باللوحة والتفت علي وباسني بقوه على خدودي وعلى جبيني وعلى فمي وتركني ورجع لف اللوحة قال : هذي بعلقها في بيتنا
خلااص احسني بموت احرجني بحركته كان الجو جليد برا بس انا صرت اغلي من الحيا احسني حرانه ووجهي حار وماقدرت اطلع كلمه وحده
رجعنا للبيت وتعشينا مع خالي وجدتي وخالتي كان باين ان مهند مبسوط وأعجبه الأكل قال لجدتي : الحين عرفت اللي زايد وزن ديمه اثريه اكلك الطيب ياام ايمن شكلي بجلس هنا لين وزني يرجع .. ترى نازل مني فوق عشرة كيلو .
: لك اهلا وسهلا ياابني هادا بيتك وبدياك تعتبرني متل امك
: الله يطول بعمرك اكيد بمقام امي
قلت لمهند وانا اضحك : العشرة كيلو برجعهم انا لك لاتشيل هم بس خليك مطيع وماتعاند ..
ضحك مهند وغمز لي قدامهم قال : الحين انا اللي اعاند حرام عليك لاتظلميني .
اوف احرجني مرة اكتفيت بالابتسامه وانا احس وجهي احترق من قصده .
رحنا بعد العشا جلسنا بالصالة ومهند ناداني بجنبه وكل شوي يحط يده من وراي ويسحبني ناحيته مرة احرجني قدامهم بس هم عادي مالاحظوا والله لو كنت عند اهلي لاتفشل بجد يمكن لأن السعوديين عيب يطلعون مشاعرهم لزوجاتهم قدام الناس مهماً كانوا بس هنا عادي خالي ايمن كان يحضن سهى قدامنا وعدنان اذا اخذ ثلاثه ايام عن خالتي يجي يحضنها ويبوسها ساعه قدامنا ..
جابت لنا خالتي الشاهي .. ومهند كل شوي يأشر لي يقول بنمشي وماكنت اعرف ايش ارد عليه آخر شي قمت رحت لغرفتي فوق ودقيت على خالي ناصر قلت له ان مهند جا عندنا واني راح ارجع معاه .. حسيت خالي انبسط وفرح لي قال الله يوفقكم وهذا خبري في ديمه عاقلة وماتتهور وقراراتها دايما حكيمه ماعليها خوف ..
جهزت لي شنطة صغيره اخذت فيها قمصان نوم وبناطيل وكم بلوزة .. اخذت لي شور سريع وجففت شعري وسويت مكياجي من جديد ..
كنت بطلع خلاص بس تفاجأت بمهند على الباب قال : خالتك جابتني هنا لمن شفتك تأخرتي .. طالع بغرفتي قال : تليق بديومه .. فعلاً فخامه الله يرحم ابوعناد ..
ضحكت وقلت : الله يرحمه . يالله ننزل .. بس طالعني وطالع بالشنطه الصغيرة اللي في يدي قال : فين باقي اغراضك ؟
قلت : اخذت اللي يكفيني كم يوم .. بعدين نرجع ناخذ بقية اغراضي شو رأيك مو احسن ؟
: الا احسن .. ديمه شو هذا اللي هنا .. كان يطالع بوجهي وخفت اكون مخبصة شي بمكياجي قلت : شو ؟
قرب مني وباسني على فمي بقوة .. بعدت عنه بعد شوي قلت : نمشي ولا لا ؟
: ههههههههههههههههههههههههههه ياعمري ياللي وجهها صار احمر ... هاتي الشنطة .
اخذ الشنطه من يدي ونزلنا تحت واستأذن مهند من اهلي وانا سلمت على جدتي وخالي وخالتي وخرجت مع مهند ...
طلعنا نمشي على رجولنا لأن مهند رفض يخلي خالي ايمن يوصلنا قال بنتمشى شوية بعدين ناخذ تاكسي .
وصلنا الفندق ودخل للحمام بياخذ شور .. وانا لبست قميص ابيض قصير لنص الفخذ اسفله كان دانتيل مطرز وصدره مفتوح ومحدد بدانتيل ..
رحت جلست عند التلفزيون بعد ماتعطرت وفتحت شعري .. سمعت باب الحمام انفتح وجا عندي بعد دقيقتين تقريباً بس شفته لابس بيجامه لونها بيج وأطرافها اسود ومتجمد بمكانه وانا حالي صار اقوى من حاله .. جلس بجنبي وأنفاسه تحرقني وقربه يذوبني ..وشالني بين يدينه مافيني اقاوم مهند لمن كنت رافضه اعطيه شي لأني مقهورة منه وماكنت احبه بس الحين احسني مستسلمه له بحب مهند زوجي وحبيبي ماعرفت اني احبه الا لمن بعدت عنه رغم الظروف وان بعدنا عن بعض بأسباب فظيعه ..لو غيري يمكن ماترجع له ابداً بس انا عكس الناس حبيته اكثر ..!
صحيت الظهر تقريباً وانا في حضن مهند على صوت جوالي كان رقم خالتي فادية وقبل افتح الخط مد يده لجوالي واخذه حطه صامت ..
قال : انتي ملكي لوحدي محد يشاركني فيك حتى لو بالجوال ..
:ههههههههههههههههه خلاص اللي يبغاه حبيبي يصير ولا يهمك .. دفنت نفسي بحضنه اكثر.. احس صدره كبير يحتويني ويلمني واحس بشعور غريب وارتياح ضمني .
عشت ثلاثه ايام مع مهند بالفندق ماخرجنا لأي مكان ولا ردينا على احد .. لأن مهند يقول مايبغى أي ازعاج ويبغى يعيش معاي انا لوحدي ..!
فتح مهند جواله يقرا الرسايل كانت ريم مرسلة عليه تقول : ( امي قلقانه عليك مجننتنا خايفه صاير لك شي اذا انت بخير طمنا الله يخليك )
دق مهند على اهله وردت امه عليه اول ماسمعت صوته جلست تبكي لأني سمعت مهند يقول ..... لا لاتبكين الله يخليك لي مافيني الا العافيه .................... ههههههههههههههه رجال مع زوجته مايبي ازعاج .................... هههههههههههههههه والله انها عندي الحين خذي كلميها ..............
ناداني اكلم امه : هلا والله خالتي
: هلا بك يابنتي ... كانت خالتي تبكي من قلب
: خالتي الله يخليك مااحب اشوفك تبكين .. الحين المفروض تنبسطين انا تراضينا وبنرجع لك قريب ولا مايرضيك انا نرجع ؟
: لاوالله ياديمه ابرك الساعات اللي اشوفكم فيها داخلين علي مع بعض
: الله يخليك لنا خلاص افرحي بدال ماتبكين الحمد لله تطمنتي علينا
: الحمد لله رب العالمين والله يايمه دموعي هذي من الفرح اول بسلامة مهند وثاني انكم رجعتوا لبعض .. اشوا انك رضيتي عليه ..
: ماقلت لك ولدك مخليني على كيفه وياخذني ويجيبني زي مايبغى
: يستاهل ترضين عليه لأنه يحبك واكيد انه ندمان ... هاعطيني مهند بكلمه قبل مااقفل
: اوكي خالتي سلمي على عمي وريم ورنو
: الله يسلمك
اعطيت مهند الجوال وكمل مكالمته لامه سمعته يقول لها انه يمكن يتأخر بس ماقرر متى يرجع .
طلعنا اليوم نتمشى وأخذته للمطعم العربي اللي كنت اروح له مع جدتي وخالتي سمر .. اعجب مهند بس اكتشفت ان مهند غيور كل شوي يقول لاتطالعين لاترفعين راسك وانا اضحك عليه آخر شي قلت بطالع فيك انت خلاص ..
رحنا لجدتي اخذت باقي اغراضي وجدتي زعلانه تبكي وتقول انها تعودت علي وماعادت تقدر تتخيل البيت من دوني
والله جدتي كسرت خاطري فعلاً انا كنت مالية البيت عليها مااخليها تجلس لوحدها وكنت اخرجها معاي بكل مكان حتى لو للحديقه ونادراً اخرج مع خالتي واتركها في البيت .
وعدها مهند انا نجي نزوها باستمرار وماراح نقطعها .. وكل ماجينا لسوريا راح نجلس عندها .
رجعنا للفندق وسمعت جوال مهند يدق وكان اللي يدق رقم غريب
وديت الجوال عند مهند وبسرعه رد ماانتبه للرقم قال : هلا ............... نعم خير وش تبين .؟ .............. احد قالك اني مع ديمه الحين ............... اقول انا للحين محترمك وبيتنا والله والله لوتدخلينه انتي ولا بنتك مايصير لكم طيب ويالله مع السلامه ........................... خير وبركه ليتها تذلف تفكني من ترززها قدامي كل شوي ........... وانا مااطيق سيرتها ولا شكلها ولا اسمها ولا حركاتها وفكه والحمد لله ........................هههههههههههه وانتي للحين مشرهه اني افكر اخذها صدق عقولكم ناقصه ....................... اقول تراني للحين محترمك بحكم انك اخت ابوي فقط ويالله لاعاد اشوفك تدقين على الرقم هذا ولا اشوفك انتي ولا بنتك تتعرضن لديمه لا بالكلام او التصرفات فاهمه ولا لا ..؟ قفل مهند الجوال والتفت لي قال : عرفتي من ؟
نزلت راسي بأسى وأخذت نفس عميق قلت : كل ماحسوا اني مبسوطة معاك يجون يكدرون علي .. ومصرين يلحقوني بكل مكان حتى هنا .
: خلاص ديمه انسي بعدين خلاص ابوي تعهد ان دخلوا البيت وانتي فيه ليكسر روسهم .. هههههههههههههههههههههههه ماقلت لك رانيا وش سوت
: لا اش سوت ؟
: جات عمتي عندنا يوم العيد ووقفت رانيا عند الباب قالت ادخلي عيدي على اخوك واطلعي بسرعه .. ولمن جات فاطمه بتدخل وقفتها برا قالت : خليك برا يجونك يسلمون عليك امي وريم من دون ماتدخلين بيت ديمه . .. وفعلاً جات امي وسلمت عليها وريم رفضت تجيها .. ورجعت مع امها بسرعه لبيتهم .
: ههههههههههههههههههههههههههه ياقلبي عليها رانيا البنت شجاعه وقوية تصرفاتها اكبر من عمرها بكثير .
: الا مدلعه ومو خايفه من احد .. بس خليهم ماعرف لهم الا رانيا امي تستحي وريم تقول عمتي وماابي ازعلها .. بس رانيا فكتنا منهم ان شاء الله للأبد .
: يوووه ماابغى كذا ... مهند على كثر ماني عارفه اني راح ارتاح اذا بعدوا عني على كثر ماراح اكون زعلانه اني السبب في نفريقكم ..ماابغى افرق بين احد هذي مهما كان عمتك اخت ابوك .
: ياعمري هم السبب مو انتي وهم اللي يغلطون بعدين خلاص بنتها جاها عريس توها قالت لي . يعني بتفكنا من شرها اذا تزوجت فاطمه .
: شو دخلك انت يجيها عريس ولا مايجيها .
: تقول نوافق ولا نردها لك
فتحت فمي قلت : من عقلها ..؟
: ايه والله من جدها على بالها اني افكر اتزوجها
: الله يستر منهم والله خايفه
: ليه انتي خوافه كذا
: خوفي مو من فراغ نسيت عمايلها فيني .. والله يامهند احياناً افكر نعيش انا وانت بعيد عنهم بس اهلك ماابغى افرق بينك وبينهم
: لف يده من وراي وسحبني عنده بحيث يكون ظهري على صدره .. قال : اجل فكرتي فيني وكيف بنعيش .
ابتسمت وقلت بدلع : وحده تحبك اكيد بتفكر كيف تعيش معاك بسلاام .
: طيب انسي ياعمري .. خليك معاي انا وبس .. لاتخلين احد ياخذك مني حتى لو بالتفكير .
: هههههههههههههههههههه عاد تفكيري مسكين محاصر من زمان ..
: ههههههههههههه ومن اللي ماعنده ضمير ومحاصره ؟
: مممممممممممممم واحد احبه ومالك تفكيري ومحاصره ومسوي له حظر تجول التفت عليه وقلت : اقولك اسمه ؟ .. شفته يهز راسه من دون مايتكلم .. وكملت : اسمه مهندي حبيبي وزوجي وابو عيالي ان شاء الله .. الله يخليه لي ولا يفرق بيني وبينه .
ضمني مهند على صدره بدون مايتكلم .. احس التعبير بالكلام ضاع عنده وصار يعبر بالفعل .
:: ::
كنت امشي في البحر والموج كان قوي ابغى اوصل لمهند اللي يبعد الموج عني .مد يده علي وانا اصرخ ابغى انقذه وابغاه ينقذني كمان ..
مهند الحقني لاتروح مني .. مهند بموت الحقني قرب مني حبيبي
كان يصارخ ديمه مااقدر غصب عني بس لاتخليني انا احبك .. احبك ياديمه ..
كنت اصرخ وابكي والطم وجهي ودموعي تختلط بموية البحر وانا اقول : مهند الحب لوحده مايكفي لازم تبقى معاي الله يخليك لاتخليني مهند احبك مااقدر اعيش بدونك الحقني مهند يكفي ابويه راح وخلاني يكفي جدتي خلتني مهند لاتلحق امي وابوي وتروح عني انا ابغاك مااقدر اعيش بدونك ..!
فزيت على صوت مهند وانا خايفه وهو ضامني على صدره : ديمه اصحي حياتي .. ديمه قومي انتي تتحلمين ياعمري شوفيني معاك ..والله مااخليك ولا اضرك لين اموت ..
عرفت انه كابوس فظيع .. كنت ارتجف وخايفه ... ضمني مهند على صدره وانا ابكي قلت : اوعدني ماتروح مني .
: ماني رايح وانا معك طول العمر خذي اشربي حبيبتي
شربت موية واحسني هديت شوية .. نفثت ثلاث مرات على جهتي اليسار وتعوذت من الشيطان وانقلبت على جنبي الأيسر لأني كنت نايمه على الأيمن.. وصار وجهي ناحية مهند وانا للحين في حضنه ..
رجعت نمت وهو حاط يده اليمين تحت راسي واليسار لافها على خصري
جلسنا في سوريا اسبوع زياده كان عند مهند اجازة شهر ماادري كيف اخذها ولاسألته المهم انه بيجلس معاي وبس .. وبعدها رجعنا للسعودية ولبيت عمي وكانت فرحتهم فيني كبيرة سووا لي عشا وماعزموا لانورة ولابنتها .
ورحنا عند خالي جلست عندهم ليلتين وكان مهند يكلمني باستمرار وكنت اكلمه بالساعات ..
نزلت عند هدى تحت وانا لابسة عبايتي لأن مهند ينتظرني برا ومارضى يدخل يقول صعب ادخل وناصر مو هنا ..
قالت هدى : خلاص ماشية ياديمه ؟
: ايوه مهند برا .. يالله هدى اشوفك على خير
ابتسمت هدى قالت : ماشاء الله ياديمه باين انك مبسوطه .. وغمزت لي بعينها قالت : شكل روحتك عند جدتك حننت قلبك على مهند .
ابتسمت لها قلت : كنت اتدلع زمان بس لمن حسيت بعده عرفت قيمته .
:الله يوفقك ونشوف عيالك قريب .. تراك مرة طولتي
: آمين ويوفقك وترى احنا مو مستعجلين على الأطفال والمسؤولية
دق جوالي كان مهند وأشرت لهدى بيدي يعني باي وخرجت وانا اكلمه
: ها حبيبي خلاص خرجت
: اوكي ياعمري استناك .
خرجت مع باب الفيللا لقيته واقف عند البوابة ودخل على طول ورد البوابه ..
سلم علي قال : لاعاد تطلبين مني تنامين عند اهلك
: ههههههههههههههههههههه ليه حرام عليك كلهم يومين بتتمنن فيهم .
: يومين عن سنتين .
ضحكت من مهند وخرجت ركبت السيارة معاه . ورحنا تعشينا في مطعم وتمشينا بعدها بالسيارة .. جلس مهند يسولف لي عنه ايام طفولته ولمن سافر وعلاقته في عمي ياسر واصحابه ... وانا حكيته عني وعن اهلي ابوي الله يرحمه وعلاقته فيني .. كيف كانت .. احسن شي في مهند انه يستمع لي ويهتم بكل شي اقوله ويبين على تعابير وجهه اذا هو متأثر او معجب او راضي او مقهور ..
رجعنا للبيت بعد الساعه ثلاث وكملنا سهرتنا في جناحنا من دون مانحس بالدنيا .
مرت علي ايام تشبه الحلم ، الخيال .. مهند يدور رضاي على قد مايقدر .. واهله كالعادة معتبريني بنتهم المدلله .. رانيا بنت فواز الله يرحمه ماليه البيت علينا بخفة دمها ودلعها اللي زي العسل ..وصارت علاقتي فيها اكثر من اول .. وقريبه مني كثير .. بس كل مرة تهددني لو زعلت مهند لتزعل مني وماتكلمني واذا قلت لها طيب واذا هو اللي زعلني قالت : هو يحبك مستحيل يزعلك بقصد ولازم تسامحينه وتدورين رضاه ماتزعلين .. كنت اضحك من حبها لعمها ودفاعها عنه .
كنا جالسين في صالة جناحنا انا ومهند نتفرج على التلفزيون .. ودق جواله اشر لي اوطي صوت التلفزيون ..اخذت الريموت وقصرت وسمعت مهند يكلم عرفت انه عمي ياسر .. واللي فهمته انه قال لمهند انهم بيجون يخطبون ريم هو وعمي سالم وزوجته .. ورحب مهند وهلاَّ فيه .. لأن عمي كان بيجي في العيد بس مهند اجله لين ارجع انا من سوريا ..
اتفقوا على الخميس هذا والملكه بتكون بعد عيد الأضحى ..
رحت لريم اللي كانت نايمه ولا تدري بالدنيا بعد ماقلت لمهند ينام له ساعه عشان بنروح عند سميرة اخته لأنها تقول اذا مازرتيني خلاص بزعل منك ..
دقيت عليها الباب وما ردت علي .. ودخلت اصحيها بنفسي ..
: ريم قومي فيه خبر حلو بقوله لك .. ريم .. ريم يالله قومي .
: هممم طيب اقوم بعد شوي بس روحي .
: ريومه قومي فيه اخبار حلوة بقولها لك
رفعت اللحاف عن وجهها قالت وهي مغمضة : قولي اسمعك
: اصحي عشان اقدر اتكلم مو اكلمك وانتي نايمه .. يالله يانوامه .
: اسمعك بأذني انا مو بعيوني يالله قولي
: الله يعينك ياعمي على هالنوامه .
فتحت عيونها طالعتني ورجعت تغمض قالت : ديمه تكلمي وش عندك ؟
: ممممم عمي ياسر كلم مهند قبل شوي .
فتحت عيونها مرة ثانية وبقووة وفزت جلست قالت : شو قال له ..؟ احم واذا كلمه ياديمه انا شو دخلني .
: ههههههههههههههههههه لاوالله ؟ مسوية مو فاهمه ؟ قومي عمي يقول بنجي الخميس نخطب وعمي سالم وزوجته معاه . يعني رسمي ..! .
فركت عيونها ورجعت شعرها ورى قالت : صدق ولا تمزحين ؟
: الأشياء هذي مافيها مزح .. وترى ماعندك وقت اذا تبغين مني مساعدة انا جاهزة من الحين .
: يوووه ياديمه الخميس مرة بدري
: لاموبدري معاك اربعه ايام .. اذا بتكونين مهتمه ونشيطه مو كسولة ..
: طيب اجل خلينا ننزل اليوم للسوق اذا زوجة عمك بتجي .. مسكت شعرها اللي شكله متبهذل من نومتها .. قالت : ماابيها تشوفني وشكلي كذا ..
غمزت لها قلت : ماتبينها تشوفك ولا ماتبين عمي يشوفك الا وانتي قاصة وصابغه ومزبطه شكلك .
فتحت عيونها قالت : اجل هو بيشوفني .. مو خطبه خلاص يجي يخطب ويروح مو لازم يشوفني . واذا ملكنا يصير خير .
: لا ياريم هو طالب يقول بشوفها .. بعدين ضحكت وقلت يمكن ماتعجبين عمي تبغينه يتدبس فيك هههههههههههههههه .
رمتني بالمخدة قالت : وجع يحمد ربه اني موافقه عليه ولا ترى ارفضه واخليك انتي وعمك ..
: هههههههههههههههههههههههههههه لا لا خلاص اللي تبغينه يصير بس قومي اصحي ترى للحين ماقلت لخالتي ومهند ارسلني اصلاً اقول لها بس قلت امرك اقولك انتي صاحبة الشأن .
: تسلمين لي ياديومه بديتي تردين لي الدين .
: هههههههههههههههههههههههههههه الديون وانتي الصادقه .. عسى الله يسعدك ياريوم يالله قومي
: يالله .. نروح اليوم للسوق .
: المشكله بعد شوي بنروح عند سميرة اش رايك نروح عندها وبعد العشا ننزل كلنا السوق حتى هي تروح معانا احسن .
: يوووه لا سميرة تبغانا نتعشى عندها .
: اجل بكرة ننزل صدقيني الأمور هينه لاتعقدينها تتعقد .