عرض مشاركة واحدة
قديم 01-08-2009, 09:32 PM   رقم المشاركة : 9
شوقي لوليف روحي
( ود نشِـط )
 
الصورة الرمزية شوقي لوليف روحي
 






شوقي لوليف روحي غير متصل

جلسنا نتقهوى بعد شوي دخلت علينا خالتي وقمت سلمت عليها في البداية دمعت عيونها بس لمن شافتنا رايقين ضحكت معانا وجلست تتقهوى ..
وصلنا الأكل ورحت ناديت ريم لقيتها متحممه وتبغى تنام بس جبتها غصب عنها
كانت ريم بتقول لي شي بس قلت لها لاتتكلم الحين انا رايقه وماابغى اسمع شي ينكد علينا .
دخلنا انا وريم واعطيتها وجبة كنتاكي لأنها وجبتها المفضلة .. وصلت البيتزا وأكلنا انا ومهند منها كنت جيعانه بس بجد معدتي مرة تعبانه احسني ابغى ارجع وارتعش .
قمت بشويش ماحبيت اقلقهم علي ودخلت الحمام ورجعت كل اللي اكلته الله يعزكم ورجعت جلست معاهم
قال مهند :تعالي كملي اكل
: لا الحمد لله خلاص شبعت
قال بصوت واطي محد يسمعه غيري : وش فيك انتي وجهك ليه اصفر . ترى اليوم باخذك عند الدكتور .
: مهند والله مافيني شي بس تعرف .... وسكت
سكت مهند على طول عرف اني متضايقه من الموضوع اللي صاير حديث الساعه في البيت واني اداري واسوي نفسي عادي .
دق جوال مهند كان ابوه : هلا والله يبه ................... الحمد لله على سلامة الوصول ................... انا في بيتي والوالده عندي والبنات ............................ الله يحييك ننتظرك
اشر لي مهند وقمت لبست جاكيت على البدي حقي وناديت الشغالات يجهزن القهوة والشاهي وقمنا كلنا دخلنا المجلس حق الحريم اللي بجناحي
دخل عمي علينا وسلمنا عليه انا ومهند وجلس بصدر المجلس وقمت صبيت له القهوة وانا احسني تعبانه وادوخ .. حسيت وجهي يتعرق والدنيا تسود بوجههي .. جلست قبل اصب لمهند ولا لاحد ومسكت راسي قلت لريم بشويش : ريومه صبي القهوة عني مصدعه مافيني اوقف
قامت ريم صبت القهوة وشفت مهند التفت علي مستغرب وحسيته عرف اني خايفه من عمي وكلامه اللي راح يقوله .
قال عمي : ديمه انتي فهمتي الموضوع يبه وهذا مو بيدينا يعني مانبيك تزعلين وتأكدي انك بنتي مثل ريم وسميرة ورانيا والبيت هذا بيتك واحنا لوبيدنا ماخلينا هالشي يصير بس انا شفت ان مهند تعب وتغير حاله وانتي الله يهديك طولتي عند جدتك قلت اكيد مامنها رجا وخطبت لمهند من واحد معروف في السوق والله يابنتي لو غيره لاعتذر منه بس المشكله هذا مستحين منه ووو ..
كنت ساكته ماادري اضحك من النكته اللي قاعدين يقولونها ولا ابكي من القهر وان محد حاس فيني ولا اتكلم واقول رأيي واعبر عن قهري ..
تكلم مهند : يبه بعد اذنك انا من قبل قلت لكم محد له علاقة فيني ولحد يتدخل انت قمت بتكحلها عميتها يايبه .. اعتقد مايرضيك اني اعيش تعيس طول عمري وانت بيدك تعذبني وتحرمني السعادة .
: افا يامهند هذا كلامك عني
: انت تدري اني اذا فكرت اخطب البلوة هذي معناتها تدمير حياتي
: مهند البنت بنروح نخطبها الليلة ابيك تعطيها حقوقها وديمة بنت اصول ماتخلي زوجها وبيتها عشان حرمة .. وهي تدري انها غلطة غلطتها يوم جزمت انها ماراح ترجع لك ..
: لو سمحت يبه الكلام هذا منتهي زواج ماني متزوج والموضوع حله بطريقتك اعتذر من الرجال وقول الله يرزق بنتك
:هذا سعود ال.... مو أي واحد اعتذر منه وتدري اني اذا اعتذرت منه وقلت ماعاد نبي بنتكم انه بيسكت ولابيخلينا في حالنا .. بعدين ديمه عاقلة وحكيمه وتعرف الاصول والواجب وتقدر خوفي عليكم وعلى حلالكم من بطش سعود .
وقفت قلت وانا ارتعش : بكيفك ياعمي انا ماراح اعترض على شي انت وولدك احرار في اللي تسوونه .
خرجت وانا مو قادرة اسند طولي الأرض تلف فيني وقرفانه ابغى اخرج من هنا بروح لاي مكان بعيد عن هنا .
لحقتني خالتي بعد ماتمددت بسريري قالت : ديمه يمه فيك شي ؟
: لاياخالتي مافيني غير القهر والحسرة .
: والله ماني راضيه وادري ان مهند يتعذب مثلك واكثر بس والله ماياخذها مهند عليك وراسي يشم الهوا
: خالتي علاقة ولدك في ابوه عندي بالدنيا كلها حتى لو ضحيت بحياتي معاه والحرمة بدالها حرمه بس الأهل محد يعوضهم مثل ماقلت لولدك ..
شفت خالتي انهارت وبكت .. قمت جلست عندها قلت : مو قصدي انكد عليك ياخالتي بس هذا النصيب والقدر والقسمه ليه نعترض
:انتي اللي محد يعوضك ياديمه بس الله يوفقك ولايقهرك ويرزقك وسامحيني ياديمه
قطع علينا مهند لمن دخل وقال : يمه روحي شوفي ابوي وفكيني من شره
قامت خالتي وانا رجعت تمددت على السرير وقرب مهند مني قال : ديمه لاتعتقدين اني بسوي اللي يبيه ابوي.
: اذا ماسويته راح تقهر ابوك ويغضب عليك .
: لاتفكرين بالموضوع هذا راح ينتهي بإذن الله قريب .
: لا يامهند لازم افكر وهالمرة بواقعيه اكثر .
: ديمه انتي تعبانه اوديك مستشفى
: لا مافيني شي وروح لابوك لاتتركه لوحده
: ديمه عمري لاتكبتين بقلبك تكلمي قولي شي .
: مهند خلني لوحدي لوسمحت ..!
خرج مهند من عندي وسمعت صوت ابوه ارتفع يقول الحين ادخل البس و الحقني و انا تحت انتظرك
دخل مهند ولبس قلت : فين
ناظر فيني قال بسكت ابوي كم يوم لاتخافين ماراح اتزوجها لو اشنق نفسي .. لبس ثوبه واخذ شماغه وخرج
خرجت لريم اللي كانت منهارة تبكي ورانيا مو هنا قلت : شو فيه ..؟
: مهند غصبه ابوي يروحون يخطبون الحين
: ها ..؟ الحين ..؟ طيب ومهند ..؟
دق جوالي شفت الرقم كان مهند : هلا
: ديمه لاتخافين انا على وعدي اقسم بالله مااملك عليها لو تنطبق السما على الأرض بس ابي اهجد ابوي كم يوم وعشان نرتاح شويه .
: لاتزعل مني يامهند
: شو تقولين انتي ؟
: مع السلامه حبيبي .
قفلت قبل يرد ووقفت بس دخت ورجعت جلست على الكنبة وقامت ريم عندي قلت وديني غرفتي الله يخليك
: ياويلي كل ماشفناكم مبسوطين يجي شي ينكد عليكم
: حسبي الله ونعم الوكيل
رحت لغرفتي وكانت ريم تبغاني اتمدد بس قلت تعالي ساعديني بروح لبيت خالي مااقدر اشوف مهند وهو جاي من عندهم .. طالعتها قلت : يمكن يشوفها .
: شوفيك مستحيل يطلب يشوفها ومهند اكيد بيسكت ابوي بعدين يبطل منها .
حتى ولو انا اصلاً مااتحمل اجلس دقيقه وحده وخلاص ياريم انا واخوك شكل نصيبنا مو لبعض كل المشاكل اللي صارت بينا تقول ان فيه خلل ومو لازم نستمر مع بعض عشان نرتاح كلنا .
فتحت شنطتي وحطيت اغلب اغراضي المهمه فيها قلت لريم : امانه اذا زوجة مهند بتسكن هنا لاتخلين لها شي بغرفتي اخاف يمكن بكرة تتبلاني بشي وتخلي اغراضي دليل ضدي .. لأني قد سمعت عن هنادي بلاوي . ب ماابي اتكلم عليها .
: تخسي ماتدخل بيتك وانتي مصيرك بترجعين وهذي والله والله ياديمه ماتدخل بيتنا بعد اليوم ولا نخلي مهند ياخذها حتى لو سكت وملك . انا شفتها لمن عزمهم ابوي جوالين كلها تدق بشكل خيالي حتى مااستحت منا .. وغير كذا حرمه كبيرة اكبر من مهند . وماتحترم امي تناظرها بنص عين .. تحسب احنا اللي ميتين عليها .
طالعت ريم قلت : مالقى ابوك من بيم خلق الله الا هنادي سعود ..
يووه فشيلة لو يعرفون الناس انه ماخذها . حرام وربي حرام ياريم . كان دور له وحده احسن من هذي .
شفت دموع ريم تنزل وماردت علي شكلها مفجوعه من كلامي وخوفي على مهند واني ماارضى انه ياخذ وحده سمعتها كذا .
اتصلت على سواق خالي وقال انه بيجي بعد ساعه بعدين اتصلت على هدى قلت لها ترتب غرفتي واني بجي اجلس عندهم كم يوم .. ماردت هدى لأنها فهمت اني زعلانه وبجلس عندهم .
خرجت بعد مااخذوا الشغالات شنطتي الكبيرة وخالتي كانت مقفلة عليها بغرفتها تقول ريم انها منهارة وتبكي على مهند وحياته اللي خربها ابوه بيده .
اما رانيا مقفلة عليها من قبل مااخرج ماادري كيف وضعها الحين .
جلست بالحديقه استنى السواق ودق جوالي كان مهند رديت على طول كنت ابغاه يقول خلاص رفضت ، خلاص تفاهمنا ، بطلوا ، ابوي كلمهم ، ابغى حل للموضوع من مهند ماابغى اتركه كأني بخلي قلبي هنا ،، بخلي روحي وأروح لبيت خالي بدون روح بدون حياة ، بدون قلب لأني علقته مع مهند ومشيت ...
: الو
: هلا عمري كيفك الحين ؟
: ..............
: ديمه بجيك اشرح لك كل شي .. ادري اني خذلتك وجاريت ابوي بس والله انه عشان افتك من وجع الراس وافكك . بعدين اهم شي انه مو ارتباط رسمي
: مهند انت اللي سامحني
: شو قصدك ..؟
: مع السلامه مهند .
: الو ... الوو
قفلت ودق مرة ثانيه مارديت .. قفلت جوالي وجا السواق على طول ودخل شنطتي السيارة وركبت معاه رحت لبيت خالي
دخلت البيت وخليت الشغالات يجيبن لي شنطتي فوق لأنها مرة كبيرة ولازم ثنتين يشيلنها
سلمت على هدى وعيالها وانا دايخه مااشوف قالت هدى : ديمه تعالي اجلسي وقولي لي اش صار وليه شنطتك هالكبر
: خلاص ياهدى بجلس هنا
: شو صار ؟
: مهند خطب اليوم .
: شووووووو .؟
: اللي سمعتيه ابوه خطب لمن كنت في سوريا يحسبني ماراح ارجع له وحن على ولده .. ويقول الحين متورط مع الرجال اللي خطب بنته ومستحي يقول مانبي بنتكم .
: وببساطه يهدم حياتك وحياة ولده عشان مستحي .
: بعدين هدى انا الحين كثير تعبانه بروح ارتاح .
لحقتني لغرفتي ونزلت عبايتي ورميت نفسي على سريري
بكيت هالمرة براحتي بكيت بكيت بكيت الين احسني ماعدت قادرة اتنفس
اتذكر ان هدى كانت عندي وتحاول تهديني بس انتبهت بعد كذا اني لوحدي بغرفتي
صحيت ورحت اغسل وجسمي كله يرجف وانا حاسة اني تعبانه الأرض تلف فيني واحسني دايخه عشاني مااكلت وكل مايدخل معدتي شي ارجعه

تعوذت من ابليس وتوضيت وصليت .. وكنت بنزل عند هدى بس انا تعبانه مو قادرة اوقف فتحت جوالي لقيت اربع رسايل من مهند كلها يترجاني اكلمه ولا ارد عليه
دقيت على هدى قلت لها تطلع عندي وبسرعه جات هدى عندي : هلا ديمه كيفك الحين
: تعبانه ياهدى
: تحسين بشي
: خليهم يجيبون لي شي آكلة
: شو مشتهية
: ممممممم ماادري مالي نفس بس احسني جيعانه
: طيب بنزل اسوي لك شي بنفسي
طلعت لي هدى بعد شوي بكاس حليب وشابورة وساندوتشات جبنه ومربى وشكولاته
شربت حليب وأكلت حبة شابورة احسني خلاص اكتفيت
سألتني هدى عن اللي صار وحكيت لها الموضوع كله بالتفصيل كانت بتتجنن:.. معقوله هذا آدمي اللي يسوي في ولده كذا عشان مستحي ولا هالخرابيط .
: تعرفين هنادي اللي شفناها في زواج يارا سلمان
: ايوه اللي قاصه شعرها بوي
: ايووووه ..
: شو فيها ؟
: هذي اللي خطبها عمي لمهند .
: لا لا ياديمه هذيك اكبر من مهند
: عمرها في الثلاثين تقريبا يعني اكبر منه بسنتين .
ضحكت هدى قالت : صدق شر البلية مايضحك . طيب ومهند اش ردة فعله ؟
: مهند تعبان ومهموم ورافض الموضوع بس راح يجاري ابوه يقول بسكته عني كم يوم اذا خطبنا بس ماراح املك ولا اتزوجها لين يملون هم ويفكونا من شرهم .
: حسبنا الله ونعم الوكيل .
: خالي فينه ؟
: دقيت عليه قال ان مهند كلمه وجاي بالطريق .
: تكفين ياهدى لايناقشني بالرجعه لمهند مااقدر والله ياهدى مافيني انا تعبانه ومااتحمل أي نقاش .
: ديمه هدي نفسك خالك مستحيل يضرك او يتعبك
دق خالي باب غرفتي ودخل .. قمت سلمت عليه وجلس على سريري بجنبي قال : ماعليك والله ياديمه ماترجعين لهم ولاتعيشين مع ضرة وانا حي لك وموجود
بكيت من ردة فعل خالي وارتحت كثير قلت : الله يخليك لي ياخالي بس لاتقسى على مهند ترى ماله ذنب
: عارف مهند مهموم اكثر منك بس ابوه المتخلف هذا جنى عليكم حسبي الله ونعم الوكيل فيه .
قاطعته : حتى ابوه مغلوب على امره صدقني .. يقول ان سعود بطشه قوي وخايف انه يدمر شركته .
: ليه وين حنا عايشين خلاص اشتغل بعيد عنه وافتك من شره واعتذر منه بطريقه حلوة خل اللوم عليك وعلى ولدك قدامه وان بنته مافيها عيب او انها تنعاف وانتهى الموضوع .
: خلاص خالي طلبتك انا تعبانه برتاح هنا ماابغى سيرة مهند ولا اهله الين افتح انا الموضوع هذا بنفسي .
: خلاص ولايهمك بس ارتاحي .. ديمه وجهك اصفر وشكلك تعبانه قومي خليني اوديك المستشفى
: لا خالي بس الموضوع هذا ارهقني كثير ... لي اسبوع مااقدر آكل ولا يدخل نعدتي شي الا ارجعه عشان كذا ماابغى سيرته ولاحد يكلمني عنهم .. حتى لويجي مهند هنا لحد يقول لي طلبتك خالي .
: اوعدك ماجيب طاريه لين تفتحين سيرته بس ترى مهند ماله ذنب .
: حتى انا مالي ذنب .. الله يخليك ياخالي قفلوا على الموضوع .
: يالله انزلي تحت معانا ماراح اتركك لوحدك
: لا خالي مااقدر احسني دايخه وتعبانه
: طيب بنسهر فوق وتعالي معانا
قمت عشان خالي وانا بجد تعبانه جلست بالصالة اللي فوق .. فتح خالي التلفزيون وقعدنا نسولف كان التلفون يدق قال خالي لهدى : قومي ردي اذا مهند يبي يديمه قولي ماتقدر تكلم احد .
قامت هدى وفعلاً كان مهند لأني سمعتها تقول ماعليه مااقدر اعطيك اياها تعبانه ماتقدر تكلم احد .................... لا ماراحت هي متضايقه شوي ................... خلاص اذا شفتها كويسة بقولها على اتصالك الحين اعذرني مااقدر اقول لها شي ...................... هلا والله مع السلامه .

جات هدى وانا مخنوقة ادري انه بيموت علي وادري انه مو بيده بس انا خلاص لازم اطلع من حياة مهند .. واذا قعدت اهديه ولا اكلمه بيصير عنده امل انا نرجع لبعض وانا لايمكن اسمح لأي مخلوق يعيش طرف ثالث في حياتي انا ومهند
جابت هدى العشا لخالي فوق كانت ريحته تقرفني وماقدرت اتحملها قلت بروح لغرفتي ..
بس خالي قال : والله اذا ماتعشيتي معاي مااذوقه ولا اتعشى الليلة
: خالي والله مااقدر آكل قبل شوي اكلت بعدين معدتي تعبانه من اسبوع شكل جايني برد في ابها احسني برجع .
:طيب تعالي اشربي شوربة دافيه تريح معدتك عاد انا حلفت
رجعت جلست وانا قرفانه احسني بستفرغ بس عشان خالي شربت ملعقتين بعدها خلاص ماقدرت اكمل قمت بسرعه ورحت للحمام استفرغت كل اللي في معدتي .. بجد انقهرت وزعلت اني رجعت كل اللي بمعدتي .. ماصدقت اني آكل قبل شوي
لحقني خالي وانا كنت واقفة عند المغسلة دايخه وتعبانه احسني بطيح ... بس مسكني خالي وتساندت عليه الين وصلت غرفتي : قومي ديومتي بوديك للمستشفى عشان خاطري
: خالي والله مافيني بنام الحين و ان شاء الله اذا صحيت اكون احسن
: طيب نامي وانا بمر عليك اذا صحيتي .. وانتي امانه عليك اذا احتجتي شي تدقين علي .
: حاضر .
خرج خالي من عندي وانا دايخه واحس برعشة في جسمي .. نمت بعد ماطلع خالي بدقايق .
صحيت على هدى تصحيني الساعه تسعه الصباح تقول قومي افطري ..
نزلت معاها بعد ماحاولت استفرغ بس موقادرة معدتي فارغه .. لقيت خالي تحت وجلست معاهم افطر بعد شوي صحى بسام وأسامه وياسمين وديمه وجو عندي فرحانين فيني
: ديمه خلاص ماابغاك تروحين اجلسي وارجعي لغرفتك
: مممممممممم طيب حبيبي بسام خلاص بجلس عندكم كثير لأني احبك واحب اسامه وياسمين وديمه و عشان العب معاكم كثير
فز بسرعه اسامه اللي حياته كلها لعب
: ديمه قومي العبي معاي الحين في الحديقه
: حبيبي انا تعبانه الحين استنوا عليّ شوية بعدين اخرج معاكم
دخلت علينا الشغالة بشيبس وعصير لعيال خالي بعد ماافطروا لأن امهم وعدتهم تعطيهم اذا هم افطروا كويس .. !
اول ماشفت الشيبس حسيتني اشتهيته قلت لها تجيب لي شيبس بالخل والملح
ناظرتني هدى قالت : ديمه لاتكونين حامل
: شو حامل اعوذ بالله لاتفاولين عليّ
: كل اللي فيك يشير على انك حامل
: لا لا مااعتقد .
انا قلت في نفسي من اقتناع انو مو معقول بشهر واحد احمل وتبين علامات الوحم .. الله يستر
بجد حسيت هدى ذكرتني بشي غايب عني .. قمت بروح لغرفتي كأني بهرب بس وقفت ودخت وحسيت اني ابغى ارجع ورحت اجري للمغسلة رجعت فطوري كله .. جا خالي عندي وانا احسني اضعف واحس برعشه .. بس طحت على الأرض واغمي علي .
صحيت وانا بالمستشفى كان خالي عندي قال : ديمه
: خالي اش صار
: ماصار شي بس دختي وجبتك للمستشفى
: اوف شو هذا ..؟
: محلول مغذي لأنك تعبانه وتحتاجين مغذي
: شو فيني ياخالي ؟
: مافيك الا العافية بس الدكتور يقول انك حامل
: ياويلي اذا صدق والله لاموت
قال خالي : ليه تموتين ؟ وش هالكلام ياديمه ؟ هذا بدال ماتفرحين تقولين كذا ؟ .
بكيت وانا اكلم خالي : خالي انا ماافكر ارجع لمهند ابداً بعد ماخطب .. واذا كنت حامل بيصير فيها كلام .. وبتجبروني ارجع له عشان البيبي ..
: ماعليك من احد واذا ماتبين ترجعين لمهند محد بيغصبك لوعندك عشرة عيال منه وولدك ولدي انا اربيه ويصير عندي بغلاتك .
: الله يخليك لي ياخالي بس بطلب منك طلب .
: آمري
: ماابغى احد يعرف بحملي الله يخليك ياخالي .
: ماتبينا نقول لمهند بيفرح ياديمه .. مهند محتاج يفرح .
: خالي صدقني بيتعذب اكثر
: خليني اقول له وتشوفين انه راح يفرح
بكيت بقهر : خالي طلبتك الله يخليك لوبيدرون راح يبهذلوني انا الحين تعبانه نفسيتي مرة سيئة مو متحملة شي ..
: خلاص ابشري بس مصيره بيعرف مايصير نخبي على الناس ولدهم .
: طيب بس مو الحين .
: ولايهمك ديمه اللي تبينه يصير بس هدي اعصابك الانفعال مو زين عشانك

خرجت من المستشفى وقلت لهدى اللي كانت متوقعه اني حامل ..
: ياقلبي عليك ياديمه يعني الحين تعرفين انك حامل والله موقته خاصة ان ...
سكتت هدى ماتبغى تجيب سيرة مهند
تكلم خالي : هدى تراها ماتبغى احد يعرف يعني محد يعرف انها حامل الا الله ثم انا وانتي وهي فاهمه .
: لاتخاف ياناصر من متى اعلم باسرار ديمه
: طيب ابغاك تهتمين فيها ترى عندها نقص تغذيه ومحتاجه تهتمين فيها
تكلمت انا : خالي اقدر اسافر
: ديمه مو كل مشكلة تهربين منها لجدتك .. واجهي مشاكلك بعدين وانتي في بيتي ياديمه محد يقدر يتعرض لك فاهمه .
: الله يخليك لي بس .
جلست بالصالة عند هدى وهي راحت تجيب لي شي آكله وخالي راح لشغله برا


اتصلت علي خالتي فادية قالت انها جاية في الطريق مع اخوالي ماجد وسامي لمن عرفت انهم جايين لجده قررت تجي معاهم وبتجيني في بيتي .. قلت لها اني في بيت خالي ناصر بجلس عنده يومين .. يووه الحين كيف افتك من خالتي وتحقيقها بدءاً بملابسي واغراضي وانتهاءً بشكلي وحالتي ..!
طلعت فوق ولبست ماابغى التعب يبين علي ونزلت للصاله استناهم ... دخلت خالتي عندنا انا وهدى وسلمت علينا وانا بسرعه رحت اسلم على خالي ماجد وخالي سامي بالمجلس .. جلست معاهم لأني من رمضان ماشفتهم اول ماشافني خالي ماجد : شو ديمه ليه كذا تعبانه ..؟
: مافيني شي ولاني تعبانه ..!
: الا وجهك تعبان وش فيك ..؟
: هههههههههههههه الحمد لله ياخالي بس يمكن لأنك ماشفتني من فترة
: مهند كيفه ؟
: ها ..؟ بخير
: ديمه بتتكلمين وش فيك ولا تراني بزعل منك .
كان خالي ناصر ساكت ويحرك فنجال القهوة بيده وباين انه مسرح مو معانا .
تكلم خالي سامي : مهند وين ومتى جيتي هنا انتي ؟
: جيت البارحه .
: ومطوله ولا بتمشين بسرعه ؟
حسيتهم يحققون معاي واني لازم اقول لهم على اللي صار مهما كان هذولا اخوالي ولازم يعرفون مني قبل مايعرفون من الناس : بصراحه انا خلاص تركت مهند لأن ابوه اجبره يخطب له .. والله يخليكم لحد يتكلم معاي بالموضوع هذا عندكم خالي ناصر اسألوه عن كل شي وفكوني من خالتي فادية لأنها ماتعرف تتفاهم معاي ولا تتكلم بهدوء وانا موناقصه ..!







التوقيع :
اضغط على الصورة لفتحها بصفحة مستقلة





نـ الدنيـــآ ـور حبيبتـــي تسلمـي عـلى التـوقيع يـآعمـري
دمتــ بسـع ـآدهـ ورآح ــت بـآل يـآ أغلـــى وأحـب صـديقــهـ...