لاتنشدين الغصن وش فيه ذاوي...... مليت اجاوب كل من صاح نشـاد
هذي مواري علتـي والبـلاوي ....... وهذي مواري دمعتي حزن وحداد
هذي جروحٍ مبطيـه يامضـاوي ........ دايم عليها تنزف اجروحٍ اجـداد
جرحٍ عطيبٍ وازرق الدمع كاوي ....... وليل الشقا يضرب على خافقٍ باد
جرح الزمن اصبح لقلبي مخاوي ........ مثل الرفيق اللي عن الدرب ماحاد
اسير قلبي في همومـه شقـاوي ........ كنه سجينٍ سيق للمـوت منقـاد
لاعاد له ضحكٍ ولا له شقـاوي ........ ولا له مع العالم تباشير واعيـاد
بين الظلوع يجر صوته خـلاوي ...... يغني جروحه شقى .. هم واسهاد
وش حيلته لاصار طيره نـداوي ......... الوقت جايـر والمخاليـق نقـاد
الشاعره فاطمه المطيري.