شعور خنيق لما تلاقي قدامك الف طريق
وانتا مش عارف البداية..ولا شايف الصح فين
تختار طريق عشوائي وتكمل فيه شوية
وتحاول بكل جهدك انك تجيب آخره
في الآخر ترجع تاني..مهزوم..مكسور..حزين
وادي الطريق التاني..نفس النهاية الاولى
والتالت ذيه بردو..ومش هتوصل بسهولة
وعلي كده بقي تجرب كل الطرق الموجودة
بس مساحة الاحلام..بردو لسة محدودة
مع ان خيالك واسع..الحلم مبيكملش
بتحاول بكل جهدك..توصل..ومبتوصلش
واليأس يتمكن منك وتصيبك حالة احباط
وتعيش فترة لوحدك..مفيهاش اي انضباط
وتخسر حاجات كتير..ومش مهمة الخسارة
ماهي مش هتفرق معاك..طول مانتا حاسس بالمرارة
وتضحك رغم ده كلو..علشان متبقاش كئيب
وكل الناس تعاملك علي انك شخص غريب
وكأن الزمن مش زمنك..او الكون مش علي مقاسك
وترجع تسأل نفسك
هي الغلطة فيهم..ولا في احســــــاسك؟؟؟
الشاعر وليد حمدي اسرائيل