أشعل ..( نجوم الليل) .. لعيونك إصرار ..
وإذا طَفَاها الصبح .. أضوي غرامك
جلست .. أسامر وحدتي حاير أنظار ..
والفاقد المفقود ما يوم لامك
رَفْضَت زوايا غرفتي كل الأعذار ..
واستوحشت في غيبتك من ظلامك
وآطلّ من شباك الأشواق .. محتار..
مخنوق أدورني وأنا بإنعدامك
شفت الشوارع مرّتك .. خلف الأسوار ..
تعبر لطيفك .. صورتك .. و إرتسامك
وآكفّ عيني .. وألمحك فوق الأقمار
وأشوف لآخر نجم واحكي هيامك
اللي كتبته فيك وأعجبك بأشعار
واللي نظمته مادح ٍ بي سهامك
والخافق اللي باح عن كلّ الاسرار
ما بيّح إلا للبدر عن .. (مقامك)
صحّتني اللحظة .. تباريح واقدار
وْعلى المدى بان الفجر من لثامك
مثلي رصيف الحيّ بذبول الانوار
ذبلت عيوني تندهك من منامك
كل الفراغ إنتي وأنا زحمة أفكار
من وين أناظر مَ/المح إلا زحامك
صدر الغياب إن ضاق مافلّ الازرار
مَ/اتنفس أنسام العطر في كلامك
من أول الليلة إلى بعد الاسحار
واللي مضى عمر ٍ وبعض إبتسامك
وأشعل نجوم الليل لعيونك إصرار
وإذا إنطفت .. (للعمر أضوي غرامك ) ..!!