السلام عليكم ورحمة الله وبركاته
تحية طيبة للجميع،،
هذه قصيدة منقوله ومختاره اتمنى
ان تحوز ع ذائقتكم الشعريه..
ياقلب لا تندم على ما فات واللـى صـار صـار=وشفيك لك يومين في صدري مسـوي شوشـره
أدري ان ما يدفع ثمن طيش الصغـار إلا الكبـار=وادري إن ما يطفي جحيـم غيابهـا إلا المقبـره
وادري انها تملا عيون الكـون دهشـه وانبهـار=والكون مايرضي غـرور اعيونهـا المستهتـره
شموخها اقسى من مقولة ( دق راسك في الجدار)=وضعفها ابلغ مـن كـلام العفـو عنـد المقـدره
اجـي لهـا وانـا بنيـة فـارسٍ طـلاب ثـار=وارجع بنية شيخ جـا ينخـاه مقطـوع اشجـره
من فرط انوثتها يصيب الحـزم حـالات انهيـار=واذا اشتكت من ظلم جاها العدل يطلـب مغفـره
اذا ازعلت ترمي سواد الليل فـي وجـه النهـار=واذا رضت تقلب عزا السلطان ضحك وغشمـره
تسكت ويبقى المستمـع مخنـوق يتنفـس غبـار=واذا حكـت كـن الشفايـف جمرتيـن ومبخـره
ما ارضى انها تزعل ولكن مشكلتهـا باختصـار=تحـب تدلـل كثيـر وهستـرت بـي هسـتـره
ترفه ودلوعـه كـذا بطـره بـدون اي اعتبـار=تجمـع هناهـا بيـن اصابعهـا وترجـع تنثـره
تجـي تحدانـي ونلعـب فـي مشاعرنـا قمـار=احياناً اكسـب ودهـا واحيـان بالعنـد اخسـره
تزعل وتجفاني وانا تارك لها اكثـر مـن خيـار=إن جت تجي وإن فضلت ترحل فلا هي مجبـره
وإن راسها يابس فانا لاخذت فـي نفسـي قـرار=ادعس على قلبي ولا اتنازل وتلعـب بـي مـره
تقبلوا فائق الاحترام والتقدير
وضاح
العرض الشجري
