مـــتــــغــــلــيـــــــــة

[نايف الشريف]

بعض التغلي لايعوّد جهاله=ماني من اللي معطي الوجه مقفيه
ماهمي اللي راح قفا لحاله=لوهو يبيع انسى ولاني بشاريه
مثلي ليامنه نوى شي إتكاله=والا يقفـّـي قبل لاشي يثنيه
بكره ليامن جا وجالي مجاله=اخذ نصيبي وإن بغا شي نعطيه
هذا مقام ودايم ٍ عندي مقاله=منهو يجينا لازم ٍ يوم ونجيه
القلب ماني زايد ٍ فيه إشتعاله=هادي ولامن شب بالنار نطفيه
ياما تعبنا والعقل زاد إنشغاله=كنت الصغير اللي حلايا البنت تلهيه
يركض وراها ماتنويله مناله=حلم ٍ نصيده ثم لافقت نخطيه
منهو بغا قلب ٍ يحبه وإنعطاله=من غير مايلقى تغلي منه يبكيه
الحب كنه ياعرب عرض البقاله=خلــّــي معك نقد ٍ تبيع وتشتري فيه
الحب الاول راح مانلقى بداله=حب ٍ كما الدّين وعليك اليوم توفيه
حق ٍ لغيرك حب ماضاع إستحاله=تاخذ هواك وتعطي ماكان يكفيه
يابنت حبي لاتظنينه هباله=حب ٍ قديم وطول انا العمر اربيه
مثلي عَـرَفْ للحب واختار إنتقاله=خل ٍ على درب الهوى امشي مخاويه
خليكي للي ضو فالحب إنطفاله=قلبه ظلام وماعرف له درب يمشيه
يطرد سراب الحب إلاشاف إبتداله=ضامي ولاهو لاقي ٍ حب يرويه
الحب نبع ٍ يشربه منهو صفاله=كلما صدق فالحب يشرب ونسقيه
مابه تغلّي بالهوى خل الجهاله=منهو جفانا بالهوى ملزوم نجفيه