ما كذبت أمي عليّ .. يوم قالت :
لا تنام إلا متوضي
وصل .. لله ركعتين
وإقرا لك لو آيتين
وإرفع يديك وتضرع .. بالدعاء
يشرق النور بجبينك
ما تجيك أحلام توحش
وما تقوم الصبح
مهموم .. وحزين
ما كذبت أمي عليّ .. يوم قالت:
لا تفرط في صلاتك
ولا يغرك حب ذاتك
ولا يبل الريق مسكر
حتى لو يبست شفاتك
إحرص .. تصلى جماعه
وكل ساعه
راقب الله في حياتك
ما كذبت أمي عليّ .. يوم قالت:
لا تصير إنسان جارح
إضحك بوجه الجميع
عامل الناس بتسامح
لا تفرط في حقوقك
لا تجامل في النصائح
ولا تثور .. تصير فاضح
وإن لمست عيب صاحب
لا تنافق .. ولا تصارح
وإنتبه من هالنصيحه
لا تصير إنسان غامض
ولا تصير إنسان واضح
ما كذبت أمي عليّ .. يوم قالت:
إحذر .. أولادك ومالك
لا تجافيهم وتقسى
ولا تبالغ في دلالك
ربهم بالخير .. تربح
وعلم النفس القناعه
وعلم القلب الشجاعه
ولا تغطي العين وتحلم
وتخدع الرآي بخيالك
ما كذبت أمي عليّ .. يوم قالت:
إنتبه .. لا تبني دارك
قبل ما تختار جارك
وفكر بحق المجوره
لا يحس إنك ظلمته
وإلا إنك يوم خنّته
وإلا توذيه .. بصغارك
ما كذبت أمي عليّ .. يوم قالت:
إن وعدتَ بوعد .. فاصدق
إحذر تزل بلسانك
أو تقلل يوم شانك
عش عزيز النفس تسلم
حاجتك للناس .. علقم
لا تبين ضعف حالك
أو يغرك زود مالك
ولا تهين إنسان .. تندم
ما كذبت أمي عليّ .. يوم قالت:
خلك إنسان بكرامه
لا تغرك هالأمور:
المناصب .. والقصور
فكَّر بيوم القيامه
فكَّر إنك ماأنت خالد
رحلة الدنيا قصيره
تلقى نفسك في سلامه
ما كذبت أمي عليّ .. يوم قالت:
إحذر تصير البخيل
وإحذر تبذر وتطّغى
وإحذر تعيش بخساسه أو ذليل
ولا تنام بيوم خالي
لا تنام بدون .. لا تفعل جميل
تلقى نفسك في معزه
تلقى روحك في شموخ
عش أصيل .. ومت أصيل
ما كذبت أمي عليّ .. يوم قالت:
كل ما سويتْ فيني أو في أبوك
تبي تشوفه من عيالك
بِر فينا .. تلقى بِرك
يا عسى الله لا يضرك
والله الله ..
لا تلين بضعف تِعصر
ولا تقسى بشر تِكسر
إصحى .. وإحذر
زوجتك تشكى وتكدر
لا تدقق في خطاها
وإنتبه تكشف غطاها
تسعد بنعمة وفاها
وتلقى منها مايسرك
ما كذبت أمي عليّ .. يوم قالت:
لا تمل هموم حملك
ولا تظن الناس مثلك
وإصنع أمرك من يمينك
لا تدور من يعينك
بين ربعك .. ولا أهلك
لا تعامل باللي تكره
ولا تجارم وإلا تشره
ما كذبت أمي عليّ .. يوم قالت: <<<<< من ما أعجبني ونقلته لعيونكم
العرض الشجري
