دعَتْني وجيت للموعد وكنت مْن الفرح كالطير
وجيت من العصر طاير مع إن الموعد المغرب
وجتني بس مدري ليه شعرت الجيّة هذي غير
وهي تقرب من عيوني شعرت إن الممات أقرب
وقلت الله يهوّنها عسى في جيّتك لي خير
أنا من شفتك أقبلتي وأنا خايف ومستغرب
على كثر الحكي مدري كأنّه خانها التعبير
وقالت لي جُمل وأشياء لا تكتب ولا تعرب
هدت فجأة تطالعني وأنا في حاجة التفسير
لجل نحكي بهدوء اكثر سألت: الحلوة وش تشرب
فصاحت بي أنا أحبك ولك في هالحشا تقدير
وتدري ان المثل فينا وفي احساسنا يُضرب
وكنت انت الوفي وانت البري من تهمة التقصير
ولكن ذي عوايدهم من أيام وزمن يثرب
تكون البنت لإبن العم ورغبات الكبار تصير
وتدري الاقربون أولى .. مع إنك للخفوق أقرب
وتدري للقدر كلمة.. لعادات الأهل تأثير
لذا أرجوك تتركني وأنا من واقعك باهرب
شعرت بحكيها كنّه قصاص وأمر بالتعزير
شعرت الدنيا ضاقت بي من المشرق ليا المغرب
مشت خلّت وراها طفل ما يدرك وش التدبير
يحسب ان الغرام أشعار شاعر واغنية مطرب
ضحكت وماقدرت اني ألاقي لضحكتي تبرير
من اللي بوقتنا مرّه ضحك من لدغة العقرب
رفضت أستوعب اللي صار ولا استسلمت للتغيير
ثمان سنين اجي نفس المكان بساعة المغرب
ورغم ان الثمان سنين جرح وكلّفتني كثير
أنا لليوم أجي وأدعي.. تجي يارب .. تجي يارب
للشاعر ــ
محمد الشهري
العرض الشجري
