الجادل اللي يمر القلب شارعها=بين الحنايا تعدّى ماتطالعني!
تقفي مع الدم بعروقي واتابعها=واحس كنْها على نفسي توزعني
قامت تبعثر غلا..وان جيت أجمّعها=.أضمّها وآتشتت..لين تجمعني
بين الحنايا تثنّى في مرابعها=كنْها تقول أتحدى من يطلّعني!
دام الحشا بيتها وأنا مدلّعها=وش دخّل القلب يزعل يوم توجعني؟
وليا خذا رمشها رجلٍ يطالعها=لعل رمشٍ خذاني مايرجّعني
عيونها جيوش والنظره طلايعها=غارت بصدري وجاز لسيفها طعني
ويوم انْكفت..لين قلبي من قلايعها=والصبر عن خافقي ماعاد ينفعني
مدهالها القلب..وعيوني مراتعها=أموت فيها..وهي للريح تزرعني
لو تدري الريح عن هادي طبايعها=ماهزّت غصون قلبي..لين ودّعني
ريحانتي والغلا فـ القلب زارعها=تشرب عروقي وترواني..وتشبعني
كنّ النحل من رحيق الورد مشبعها=وانا شموخي من أحلى شي جوّعني
ولياتعانق خجلها مع تواضعها=عانقت ليلٍ على مسراه شجّعني
لو ينسرى ليلها..سريت بايعها=بشر...ولا الله عن الزلّه مرفعني
واصبحت من عقب ماني ضدّها..معها =ان ضاعت آضيع...وان دلّت تسنّعني
وان شفت بالعين قلبي بين أصابعها =سجدت لله....يالله لاتضيّعني
وان جات للجد واسقتني مدامعها =علّمتها الدمع للعشاق...وش يعني؟
الدمع صوتٍ ليا غازل مسامعها =تشوف صوتي واذا مرّيت تسمعني
والله ماكنت أطاوعها ولا اسمعها =لكنّه الحب!!...سمّعني وطوّعني
للجادل اللي شراييني شوارعها =القلب يقتادني...والنفس تمنعني
العرض الشجري
