اذا المراجل لبسة شماغ وعقال=قل للعذار يلبسنّ العمايم
ماعاد يفرق زول حرمه ورجال=دام الفعايل تشبه البعض دايم
المرجله ماهيب كلمه وتنقال=وتروح ماراحت هبوب النسايم
والا خشونة صوت او رفع الأثقال=أو رزة صدور وفعل الزلايم
ولاهي بعد مفتاح موتر وجوال=والاردى لسانن حديثه شتايم
المرجله شيمه عن القيل والقال=رفيع نفسن حر بالجو حايم
المرجله عقلٍ وزن وزنه جبال=ودون العقل وش فرقنا والبهايم
يامسندي لو مايل الوقت بي مال=ياولد أبويه ياعظيم العزايم
يامعرب الجدين من العم والخال=يانخوة المفزوع وقت الهزايم
المرجله ياخوي هي طولة البال=هي العزم هي الصبر فالظلايم
فيها الكرم عزه دله وفنجال=فيها الكرامه عن ردى الطبع شايم
والدين لامنه خذا القلب منزال=مشى طريق الحق وابليس نايم
من لاعرف ربه في طيب الحال=لابد وقت الضيق بالهم هايم
حتى صلاتك مع جماعات ورجال=في خيرها ياخوي نعم الغنايم
ولامن نصف ليلك قم صفي البال=ياعظم أجرك بين ساجد وقايم
ولامن رفع ربي له كل الاعمال=حسن الذكر لاقالوا فلان صايم
وخلك شريف القصد ياطيّب الفال=سوء المقاصد فالبيوت الهدايم
واحذر تبيع النفس في درب الانذال=وتتبع خوي ابليس راع النمايم
النفس خيل لك اذا كنت خيال=ومن لاقوى نفسه قوته الهزايم
ولاصرت ماتدري لوش انت رجال=والله خساره فيك ذبح التمايم
نوف بنت شطيّط العتيبي
العرض الشجري
