[تبين زوجك يحبك ويموووت فيك؟؟اكسبي امه اول تعالي اعلمك كيف
بدون مقدمات
انا لاحظت ان اغلب مشاكل المتزوجات بسبب حمواتهم
طيب ليش؟؟
وشو الحل؟؟
انشالله بتلقينه بهالموضوع اقريه للاخير وادعي لي بظهر الغيب
تبين تعرفين وشهو سبب تصرفاتها
باختصار هي حاسة انك اخذتي ابنها فلذة كبدها اللي تشوفه للحين طفل رضيع فتغار منك وهذا شي طبيعي
نجي للحل
1 عامليها مثل امك
لاتقولي محد مثل امي ومن هالكلام لاحبيبتي
طالما اخذتي ولدها يعني امك ونص وصار عندك امين مبروووك>>>وش تحس فيه
2 خليكي طيبة جدا معها مهما سوت من طبيعة البشر كلما كبرو تزيد مشاكلهم ودرجة حساسيتهم
يعني خليكي حذرة بالتعامل معها بس مو برسمية
امزحي معها سولفي واذا متضايقة تقربي منها واسأليها عن همومها
3 ناديها بنفس الطريقة اللي زوجك يناديها ماما , يمة اي شي المهم بنفس الطريقة
عشان بدل ماتحس ان ولدها اتأخذ منها تحس انها كسبت بنت جديدة
4 خصصي يوم بالاسبوع تكلميها فيه لو دقيقتين اسأليها عن صحتها
ويوم ثاني تزوريها فيه
5 وانتي عندها لاتقعدي رجل على رجل مثل العمة
لاحبيبتي ادخلي المطبخ وساعدي بالطبخ وتنظيف الصحون بس لاغير
لاتبالغي في الخدمات عشان لاتنهدر كرامتك عند خوات زوجك وتصيري مثل الشغالة مثل وحدة من الخوات تقول ادخل الغرف وانظف ليش ياعمري وبالنهاية اذا مانظفت يزعقون عليها مثل الخدم
ساعدي بحدود
6 وانتي تسولفين معها خلي لسانك ينقط مجاملات مثل ياحبيلك,الله يخليك لنا,انتي بركة هالبيت,تصدقين فلان قلبه ابيض عليك(على زوجك) وانتي تسألين عن اخبارها كثري من بشريني عنك طمنيني عليك وهكذا بدعي عاد انتي اخبص
7 اهديها لو شي بسيط على قد استطاعتك عاد تعرفين الحريم والهدايا خاصة بهالعمر محد يعبرهم مساكين
اذا سسافرتي جيبي لها,في الاعياد,في رمضان خلي بس بالمناسبات عشان هديتك يصير لها قيمة
مرة جيبي وقولي انها منك
مرة جيبي وخلي زوجك يعطيها على انها منه صدقيني بيفرح ومرة جيبي وعطي بنتك او ابنك على انها منهم
ياحب العجايز للحنة ودهن العود والزمزم والسجادات والجلابيات الهدايا كثيرة على ذوقك عاد
8 في بعض الزيارات خذي معاك اكلة او حلى المهم لاتدخلي يدك فاضية
9 لما تناديك لاتقولي نعم قولي سمي يمة امريني
وانتي رايحة من عندها قولي بمشي يمة تامريني بشي؟؟
بناتها خلك طبيعية معهم بدون تكلف عامليهم مثل خواتك بعفوية وطيبة وانتبهي لاتخسري كرامتك بالطيبة الزايدة عن المعقول
10 اسألي زوجك عنها كلما ذكرتيها قولي امي شلونها طمني عليها بيطير من الوناسة
11 كلموها مع بعض حسسيها انك بنتها تماما
12 اذا طلبت منك شي انتبهي تقولي لا او ما اقدر حتى لو شي منتي طايقته قولي انشالله يمة وحاولي
13 اذا شفتيها معصبة او تدور مشاكل الزمي الصمت خليها لين تهدا من حالها بعدين تكلمي معها بهدوء قوليلها يمة لاتزعلين نفسك الدنيا ماتسوى وانتي زعلانة وكلنا مانبي الا رضاك انتبهي تحطين الغلط عليك لحالك حتى لو انك غلطانة اجمعي ولاتفتحين الموضوع ثاني بس راضيها وطيبي خاطرها
14 لما تضايقك من شي لاتدخلي زوجك ولاتطلبين عونه لانه لو فاتحها بالموضوع بتحقد عليك ظنها تبين تفرقين بينهم
اسمعي وارمي ورا ظهرك
15 لا تتهاوشي مع زوجك قدامها بتشيل فكرة عنك انك مو مسعدة ولدها ومعيشته بنكد
مهما ضايقك اسكتي ولاتردين اذا صرتو لحالكم تخالصو
بنات هذي نصايحي لكم لو عملتو بها راح تكسبون حماتكم وقبلها ابنها اللي بيرتاح من المشاكل
اتمنى لكل متزوجة حياة سعيدة وهادية
ولكل مخطوبة التوفيق
ولكل بنوتة زوج صالح
ولنا كلنا الذرية الصالحة
ياااااااااا رب انك على كل شي قدير
لاتنسو الردود تراني تعبت وانا اكتب
تبين زوجك يحبك ويموت فيك؟؟؟؟اكسبي امه اول وتعالي اعلمك
العرض العادي
