تقول احبك أبد ما احب انا غيرك=تقول احبك واساوي بك نظر عيني
تقول احبك وبعرف ويش تفسيرك=هذا شعوري واحاسيسي ومافيني
ملّكتك الروح تحت امرك وتدبيرك=مادمت انا اغليك تكفى لا تجافيني
يابنت احبِّك محبة فوق تصويرك=حبك بقلبي ويجري في شراييني
يابنت انا اللي قدرت افك تشفيرك=رموز حبك معاني لك توديني
قريت بوحك وفاهم كل اساريرك=خلي رموز المحبة بينك وبيني
هذا جوابي وذا شرحي لتعبيرك=ياظامية علميني كيف ترويني
ياطلسم الحب دهن العود تعطيرك=ياجنة الروح لميني وضميني
ياتاج حبي وفوق الكل تقديرك=غلا وفوق الغلا في القلب تمكيني
لا فاحت انفاس ودك من أزاهيرك=واستقبلتها حواسّ الشوق تحييني
سيري على خارطة قلبي مشاويرك=مادام في خارطة عينك مياديني
خلي صلاحيتي أسرك وتحريرك=واستاسريني ولكن لا تفكيني
أحيا بقربك على كيفك وتسييرك=أعيش انا في دفا حضنك ويكفيني
مادمت انا مصدر احساسك وتفكيرك=فانتي ابجديات شعري في دواويني
مستور محمد الحارثي
العرض الشجري
