الظروف اللي حـدتـنا .. للوصال المستحيل
ارهقت منا المشاعـر .. واستحالت للمحال
غربتـنا.. لين ذقـنا بالمحبه .. الف .. ويل
شرقـتـنا .. لين نامت .. عـننا سـود الليال
مابقى بالعمر قيمه وأن بقى بالحيل حيل
دام هذا العـمر كله ... بين رجوى واحتمال
وانت تدري بالحقيقه .. لا تطالبني الدليل
الدليل ان اشتياقي صّوت لشوقـك .. تعـال
وجيت يسبق اشتياقك قلب ناصيني دخيل
قمت اجرته في خيام القلب.. ومتوني حبال
ارقد أمن في عـيوني والهدب فوقـك ظليل
دام انا اوعـد عـيونك .. بالمحبه راس مال
لا تخاف الوقت والاوهام وإخفاق الحصيل
للوعـد عندي حشيمه .. والوفا قـدّر و جلال
باسقي ايامك زلال الشهد صافي السلسبيل
واتلحف في ضلوعـك للدفا .. فيّ .. الظلال
زلت اقدامي وشفت الموت بدروب الرحيل
ولا قدرت امسك ثباتي .. فوق طيات الرمال
كيف بصبر عن وجودك لا تقفى الليل ليل
كيف ابقضي العـمر وايامه ؟؟.. اردد هالسؤال
اسالك بالله قلي .. العطا مني .. قليل ..؟
جاوب القلب المعـنى .. لا سـأل والدمع سال
ما الومك بس قل لي .. وين ابلقى لك بديل؟؟
وانت عـارفني وعارف .. قصتي والاعـتلال
وانت فيني ما تفارق .. صعب القالك مثيـل
او انا ما شفت غيرك يستحق مني وصـال
وش بلا قـلبي تكـفن وانكوى جمر المليل
مابقى لي في فضا الأحلام يالغالي مجال
سامح الله من هواه اتعبك يالجسم النحيل
ما بقالي من بعاده كــود .. حزنٍ ما يقــال
باتصبر لين اشوف الموت للدمـع الهميل
با تناسى لين انسى .. واسـكن الواقع(( خيال))
ثم أعـوّد للتلاقي من ورى القـيـد الغـليل
اكسر الواقع لعـلي ... أسرج ركــاب الرحال
والتحف هم الليالي برد واطيافك .. تخيل
بين عـينيني .. وليل القلب وأشراق الهـلال
واتهادى فوق موج الفكر.. وشدادي ثقيل
ارتحل مابين وجهين(( السراب)) .. لنور لال
هذا انا عشت فغيابك بس اسلى مستحيل
ماقدر أسف يا حبيبي ((أنت)) نسيانك محال
رح بمان الله سافر .. يتبعـك صوت العويل
وارتجافات المحاني تبلع الحسره .. انذهال
جعلها ريح الخزامى والنفل .. وبروق سيل
تحضن دروبك.. وظل المزن.. يسقيك الزلال
للتوافيق البهيه .. باشعـل الدعــوه .. فتيل
والهب كفوف الرجاوي.. بالدعاء والابتهال
يا جعـل رب الخلايق ... يجلي الهم الثقـيل
وياعسى باقي حياتك تبلغ مراد المنال
الشاعره سراب
العرض الشجري
