بســـم الله الرحمــن الرحيـــــــم
والصلاة والسلام على اشرف الأنبياء والمرسلين
نبينا محمد عليه افضل الصلاة والتسليم
واتمنى من الجميع التفاعل معه
الموضوع يتكلم عن سوء طرق التربيه في مجتمعاتنا
يعني قليل تلقى في مجتمعنا ناس واثقه من انفسها بمعنى الكلمه وهذا طبعأ بحكم عاداتنا وتقاليدنا القمعيه مثل الأب يحسب انه دوره في الحياه هو جلد وضرب وتعلم الملاكمه على أجساد ابنائه وبناته او قمعهم بالهواش وكثر قولة أح او لااااااا او ولد لا تفشلنا او تراه ان سويت كذا والله لا اتسويك الواحد منا ينشىء على هذه الكلمات الرادعه ويكون خائف ومتوتر وعنده ضعف شخصيه وحياء زايد عن اللزوم وأعراض آخرى كثيره نتيجة هذا النوع من التربيه
وبما انه انا وانت وانتي راح نكون آباء وأمهات المستقبل أتمنى اننا نكون أخذنا درس وعبرة من تجربتنا ونحاول اننا نعد جيل آخر في المستقبل من خلال تربيتنا لأبنائنا من خلال أعطائهم جرعات كبيره من الثقه بالنفس من خلال تحفيزهم وعدم تقليل شئنهم أمام الناس مثل انك تكون في سادس ابتدائي وجالس في المجلس عشان ابوك عنده عزيمه يجي يقولك اطلع يا بابا العب بالحوس مع البزران!!! المفروض العكس اذا صار ولدك عمره ثلاث سنين تروح تشتري له ثوب ونعال رجال وطاقيه وتقوله طول الوقت: انت رجال وتأخذه معك للمسجد وترزه بكل محل وتشتري له كم مفتاح وتحطها بميداليه وتقوله هذي لك يا رجال وتحاول تعلمه من نعومة اظافره انه ما يخاف من اي مخلوق في هالدنيا وانه ما يستحي ويضيع منه الكلام اذا صار فيه ناس وأشياء كثيره مثل كذا يستهينون بها الناس لكن هي جدأ مهمه لكي تصنع من أبنك رجلأ.
وطبعأ بسبب ضرب الأب لأبنه طوال فترة الطفوله والزعاق عليه سبب حاجز بين الأب وابنه بحيث يكون الولد مثلأ في فترة المراهقه وهي اخطر مرحله بالنسبه له... توجد أسئله كثيره بالنسبه له بحكم هذه المرحله ولكنه لا يجد من يسئل بسبب انه بينه وبين أبوه حاجز فعندها يسئل الغريب وقد لا يصدقه الغريب ويعطيه أجابات خاطئه وتأثر في تفكير المراهق وتؤدي به للهلاك وهنا أم المشاكل
بصراحه الموضوع كبير جدأ ومتشعب كثير بحكم الفرق بين العائلات وطرق تربيتهم ولكن من خلال معايشتي ومخالطتي لكلثير من الشباب في مجتمعنا حسيت انه هالطريقه هي الغالبه في مجتمعنا وحبيت نتناقش ونسمع من بعض قصص حصلت في السابق أثرت علينا سلبأ او أيجابأ ونريد أيضأ ان نسمع رأيكم بهذه الطريقه فقد ما لا أأيده انا يؤيده غيري...
وياليت من جميع الاباء و الامهات الاستفادة من هذا الموضوع
العرض العادي
