مقـــــــــدمة
يقولون السيل ما تأخر ألا من كبره..... والسيل إذا جاء يجيك ويحوق أم الدنيااا
الزبدة، من زماان ما صارت لي جرية ولا مصيبة... قلت الحمد لله أكيد أن حياتي تبي تعتدل وبأصير ولد طبيعي زي النااس بدون مواد حافظة ولا بودرة <<< واحد يشك ان ابوه ينتج حليب مغشوش ... وبكذا قررت أني أكمل دراستي عشان أصير عضو فعّال في المجتمع يسهم في دفع عجلة التنمية...... كنت موقف دراستي من كثر المصايب الله يجيركم ....... في اليوم اللي اخذت فيه شهادة أولى ثاانوي دور ثااني طاح علي كفر طيارة كانت مارة فوقي ........ من قوة الخبطة دخلت في الأرض وطلعوني وثوبي أسود !! وريحتي ريحة محطة بنزين !! وطاشت الأرض نفط (<<< صرت سادّن فتحة البترول لا خلاء ولا عدم ).......
تذيهنت وطالبت بحقي في ذا النفط اللي طاش من محل محطتي (<<< عشان كذا يسمون أماكن المشتقات البترولية محطة) و رحت يمهم وقلت أبي نصيبي ........ أنا اللي اخترعت بير النفط هذا ....... قالو طيب حط رقم بيتكم وبندق عليك ..........
وأحط رقم حميد....عشان رقمهم سهل ولا يصير لهم عذر يقولون نسيناه (<<< مسوي ملكع هالدلخ )........ وأقعد كل الوقت في بيتهم معسكر في الملحق ما غير جنب التلفون و متعلق في سلكه ( اللي ما يعرفني يقول ذا جاي مع التلفون فوق البيعة )....... حتى الصلاة أصليها في الملحق وأخلي التلفون يم جهة القبلة.... الربع تأخرو ما دقو
بديت أمل من الأنتظار..... وقلت لباهت جب تلفزيون يلهينا....... ويروح ويجيب تلفزيونهم، وتلفزيونهم الله يجيركم من بقايا الحرب الأهلية في الكونغو.... شاشته كنها كورة من قوة التحدب يعني لو تقعد وراه عاادي تقدر تتابع..... يوم دخله قلت له وراك فاك وجه الجمس وجايبه؟؟؟.... المهم بدينا نتاابع وما عندنا ألا الأولى والثاانية أرضية.... وأحسن الشي الدعاايات إذا جت ننبطح على بطونا ونبدى نلعب برجلينا من الوناسه وإذا خلصت نقول: يووووووووووه....... الوكااد أن هالتلفزيون فك أزمة (<<< هذا وهو ما فيه فيديو فك أزمة).....
رن الهااتف أخييراً وأفز، ومن قوي الفزه مروحة السقف صفقتني في وجهي ونشبتني في الجدار واقعد معلق ، و أصير أمد لساني على حواف خدودي بينها وبين الجدار بزعمي حركة عشان أفك التلصيقة بسعابيلي
. وأفكها وأمحط على الأرض ويغمى علي.... الشاهد ما قدرت أرد على المكالمة.... رد حميد على التلفون وهو ما عنده ألا: هاااه... هااااه... أييييه.... هاااه.. شكله ما فهم ...
لكنه في الأخير وجهه صاار أسود وغمض عيونه وأخيراً رد على اللي يكلمه وهو يهز راسه: أكيد فيه لبس في الموضوع (<<<< يمديكم على صديقي يعرف يتكلم زي حقين التلفزيون).... وش صارت الساالفة؟؟؟؟؟
جاء حميد يبي يعلمني و لقاني في وضع مشين ( تسنّي ذباب مصفوق بجريدة على الجدار ) مغمى علي ولساني طالع وأنا عاضه..... كب مويه على وجهي وقام يشوّت وجهي (<<< عااد رجله مقاسها 54)... وكل ما شاتني شوته راسي يخبط في الجدار وتزيد الإغماءه... ألين أنتبه هو وخشته للي يصير ويسحبني لوسط الملحق....
ويجيب مركى ويرقى فوقه وينزل ركبه على وجهي ألين صارت ضروسي في جهة وحدة في أثمي ( أنا أشوف اني اقوم من ذا الإغمائه أصرف لي قبل لا يذبحني ذا الخبل !!!) قمت وقعدت اتفلّت على ذا السبهه هو ورجلة اللي كنّها جدار مقضوض !! يلعن أصلك وش قااعد تسوي كم مرة قلت لك خل عنك المزح الثقيل (<<< أحسبه يمزح، عشان تعرفون بس نوعية مزحنا).....
رد علي وهو يصفق بيديه على وجهه (<<< الغبي كل ما صفق نفسه يقول أح لكنه يستمر، غصب يقلد التمثليات المصرية اللي كنا نشوفها): ألحق ألحق، مطلعينا في السي أن أن وحنا مطلوبين وبوش نفسه جايب طارينا، يقولون أنه حنتز (<<<< يعني غاضب ياهووووه اللين ما تعرفون لغتي).....
وأروح لأقرب تلفزيون مشبوك بدش وآخذ الريموت وأرص الزر اللي يطلع السي أن أن وألقى وجه الخنزير بوش الله يكرمكم وهو يتكلم...... وفي زاوية الشاشة بالأحمر (BREAKING NEWS) وهذي معناتها أخبار جامدة بالحيل....
ويصير هالعلج ماسك صورنا أنا وخويي وهو يأشر عليها يقول:
[[[[[ هالزلايب مطلوبين... اللي يشوفهم يدق علينا في البيت الأبيض وإذا صار الخط مفصول يدق على البقالة اللي جنب البيت الأبيض ]]]]].........
والتفت على حميد وألقاه مفهي ما فهم ما غير فاتح أثمه والذبان يدخل ويطلع (<<<< الذبانة إذا طلعت تاخذ لفتين وتطيح على الأرض وهي ترافس)..... وأجرّه من علباه..... المسألة حياة أو موت....
دااااا دااااا وش الساالفة قييم دااااا؟؟... (<<<<كذا وهو يتكلم الله يرفع عنه)ياااخي ما شفت بوش وهو يتوعد فينا؟؟؟ نبي نهج!!!!.. أنا عاادي ممكن أفهم أني أصير مطلوب لكن أنت!!...
داااا طيب هو دااااااا يمزح ولا جاد دااااا وبعدين لـيــ..... طاااع (<<<< صوت طيحه)....
أبو صنقه هذا إذا قام يتكلم يسعبل... وهو قاعد يكلمني تحمس بزيادة و زاد الإفراز عنده لدرجة أنه زلق في سعابيله ومحط على وجهه وأغمي عليه.... أنا تركته الصراحة.... مالي دخل (<<< جحده) .... بيمسكونه وبيدرون أنه عاهه وبتدخل حقوق الحيوان عشانه وبيطلع منها لكن أنا لازم أتوزى......
قلت مالي إلا أزبن عند أبوي حبيب قلبي أبوي أكيد بيفزع لي ويفكني من ذا الوجه الودر (بوش)
وأرجع للبيت ... ومن يوم دخلت ألا وهذيك العصا اللي تمشي مليون تنشب في وجهي.... رحت لزاوية باب الكراج الكبير عشان أفكها (<<< زي ما تفك ببسي أبو نص في باب الكراج)...... صارت الضربة من أبوي..... المهم يجيني وخذ هواش:
يا الداشر يالسمرمدي خرّبت سمعتنا (<<<< من زينها عااد)وشنك مسوي لبنت بوش يوم أن أبوها يتوعدك؟؟؟؟ هاااااه وشنك مسوي؟؟؟؟.. ....
وشو؟؟؟ وش بنته؟؟؟؟
إخرس أيها الوغد تباً لك (<<<< ترجمة الأفلام وما تسوي)... قللي بسرعة هي حملت و لا لا؟؟؟؟ قللي بسرعة عشان يمديني أنادي الشيخ صالح يعقد لكم ........
لا يا بن الحلااال.... السالفة مهيب كذا.........
طبعاً ما كملت لأنه فصخ ثوبه وبدى يلعب كراتيه وخذ تصفيق.... حركة النمر المزكوم... حركة التنين الأزرق... حركة القط الجائع.... حركة المعصوب... لدرجة أنه يطمر في الهوا وهو رافع يديه ويتجمد زي الماتركس ثم يرفسني في وجهي......
أنا أرتعت ورى أبوي صار كذا...... ونسيت آخذ شي من البيت وأطلع من البيت وأنا أشاهق من الصياح..... وأركب الهايلكس وأمسك طريق الجنوب (<<< يقولون أنه أأمن )
وأنا في الطريق سالت الدمعة من عيني..... ليش أنا دايمن مظلوم كذا؟؟؟؟....
ليش هالمصايب ما تجي واحد ثااني غيري ؟؟؟؟ أهم شي أنا مايجيني شي.... عاد هالهواجيس ما جت ألا مسيان والشمس غاطسه في أحضان الأفق كطفل في حجر أمه يعاني ويلات الجوع (<<<< أبي اصير مشرف على الاقسام الادبيه بعد هالوصف خخخخخخخخ
على هالحزن قمت أهيجن....
[[[[
يا شينهاا لا منهاا تعسّرت وضاااااقت *** وعليك المصايب والهموم تحااااااااااذفت
وحزّنت وبكبكت وخياشيمك نااااشقت *** تسأل قهررر:ليه الدنيا معي مااااا صفت؟
]]]]
عااد صوتي الخالع تعرفونه .... حتى الهايلكس من شين الصوت قام علّق على البوري يبيني أسكت.... .. ويوم وصلت وادي الدواسر وألا الجوع ذابحني (ترى فيه اشاعة قوية تقول ان أهل وادي الدواسر ينولدون بشنباتهم وفي يديهم سبحة وهم يقولون:خلوها<<< ترى خوالي دواسر لحد يتفلسف علي) وأوقف عند محطة وأدخل بقالتهاا وآخذ من المحطة خبز فرنسي...... والله يا أنا أقدر الخبز الفرنسي مع حليب السعودية ولا آكله ألا إذا صرت ماسك خط......
يتبـــــــــع
7
7
7
قصتي مع الوجه الودر بوش ...
العرض الشجري
