--- احـسـاس الـذكــريــات --- قصتي الاولـى ---

[زحمة احزان]

السلام عليكم
اعضاء منتدى الود الاعزاء ,, احببت ان اقدم لكم هذه القصه الي كتبتها بقلمي .. اتمنى انها تنال على اعجابكم ورضاكم .. و القى النقد والتشجيع,, وهيه باللغه العمانيه العاميه ..

اذا عجبتكم بكملها ,, ولو ما كانت على مستواكم بتوقف عن تنزيلها ..

:: نص الجزء الاول ::

ناصر عمره 18 سنه ,, يحب الكمبيوتر و خبير فيه .. عنده اخين وهمه ليث وعمره 22 سنه يدرس في بريطانيا و طلال وعمره 14 سنه وهو في الصف الثالث الاعدادي .. وعنده اخت وحده وهي رايه بالصف الاول ثانوي.. وناصر طالب جامعي في جامعة السلطان قابوس بالسنه الاولى هندسه.. ابوه متوفي وتراك لاولاده اموالا طائله حيث انه رجلا مرموق في الدوله وله مكانته الخاصه .. و لديه خمس اخوات من الاب ( فاطمه , عائشه , شيخه , خديجه , حمده ) .. و اخين من الاب وهما ( خليفه , عبدالله) كان خليفه اكبرهم وعمره 56سنه تقريبا و عنده عدد كبير من الابناء اما عبدالله فكان انسان وايد غارتنه الدنيا و للحين ما تزوج وعمره 30 سنه وهو اصغر اخوانه واخواته من بين 30 الى 50 سنه و عندهن اولاد و بنات ما شاء الله تارسين البقعه ..

ناصر معه شقه لحاله في – الخوض- علشان اليامعه دايما اتكون يمه .. ومعه بعد سياره حوت عنابي .. ناصر ما كان يحب يطلع من شقته الا قليل .. وكان اهتمامه في الدراسه اهتمام سطحي بعض الشيء بعد ما دخل اليامعه,, و كان الكمبيوتر يعتبره كل شيء .. ما يقدر يعيش من دونه ..

في يوم لاحظ ان في بنت وايد تكون ضده في الكلام و هو له في هالمنتدى تقريبا يومين .. و طبعا اهو اربع وعشرين ساعه ناقع عيونه في هالكمبيوتر .. يسوي تصاميم وشغلات ورعه باستمرار ,, وكان يتعاون مع ربعه الي معاه على الماسنجر في تدمير اجهزه الشباب الي يتبادلون الاشياء الوسخه وما ننسى انه يعشق القراءه لذلك ما كان عنده وايد فرصه للمنتديات ..

شدة هالبنت اهتمامه .. وقعد يدخل المنتدى يوميا علشان ايكون ضدها في كل شيء ,, وكانت الاراء فيما بينهم متضاربه .. كلن ويبى يثبت رأيه على أي شكل من الاشكال ..
في يوم ظل يحاتي على هالبنت الي غابت فتره قرابت شهر كامل .. وحاس ان في شيء ناقصه ..
معقول ان حبيت هالبنت ؟ لا لا مستحيل ..
بس كان قلبه ايقول كلام غير .. بس كبريائه يمكن يمنعه ان يتعرف بحبه لهذي البنت بالذات ,, رغم ان الكمبيوتر من يوم واهو اول ثانوي معاه ,, و لين ما دخل اليامعه ما فكر يحب بنت وخاصه لو كانت من الانترنت او حتى يتشوف على البنات,, رغم ان ولد طويل القامه و كتوفه عراض و جميل وفاتن و عيونه شايلتنه لانهن ناعسات ولونهن تقريبا عسلي ,, كان الكل يحسده على جماله و روعته .. و عمره ما زعل امه .. يتصل عليها كل صبح علشان يصبح فيها و يتصل بعد كل ليل يقولها تصبحي على خير

رن منبه تليفون ناصر الساعه ثمان .. و تحسف على عمره لانه رقد قبل ما يصلي صلاة الفير .. و تذكر ابوه في ذيك اللحظه كيف كان يهتم ان اهو واخوانه ايثوروا من وقت حال الصلاه .. لذلك تأثر .. بس ظل قوي وصلب وما خلى احزانه تهزمه ..

تسبح و صلى و بعدين راح اليامعه ,, بنات اليامعه كلهن يتكلمن عنه ... من حلاته و بطرته ما كان يشوف عليهن .. اهو ما يعتبرها بطره ,, لكن ما يحب ايداني البنات وخاصه ان في داخله احساس ان ما بيعرف يتعامل معهن ابدا ,,

يا كثر اهو وربيعه سالم في اليامعه يهربون من المحاضرات ويا كثر سالم هذا ما يغازل البنات .. سالم هذا ابوه بعد معروف ,, سالم وايد غني و يهتم في نفسه كان دب وايد و الكل يضحك على جسمه ,, وكان يقولهم ( بس احسن من حسين الجسمي لااااااااه ) بس سالم انسان مرح و ورحه شفافه ويحب ناصر حب كبير ,, ناصر ما كان يعرف انه سالم يعزه هالكثر ,, لان ناصر من طبعه ان ما يثق في احد ولا يسولف لاحد عن الي في خاطره كان كتوم وغامض ,, و هذا بسبب موت ابوه الي سبب له هالاشياء ..

ولما راح ناصر هاليوم اليامعه كان مزاجه متعكر بسبب الصلاه واكيد كانت ( كل القلوب) – البنت الي في المنتدى – شاغله الحيز الكبير من عقله ومخه ..
وفجأه رن تليفونه ..
سالم : هلا والله بالغالي ,,
ناصر : اهلين يالمعفن ,, اش تبى من صباحة الله خير
سالم : تعال يالغبي ,, اما فاتنك حتة بنات .. يالله تخبلت عليهن لكن ما يفيسن سوادات الويه ..
ناصر : صح انك متفيق ,, اش تبابهن ,, خلي البنات في حالهن يا الخسف فضحتنا كان حد يفضح حد
سالم : اونك ربيعي وانا ابى اخبرك اني شفتهن انسيت انك البطران الي ما يعبر اعرفك عايبنك هالجمال الي فيك .. و لا مالت علي انا حليو لكن محد يعبرني ,, يأخي مشكله الجسم هذا
ناصر : هههههههههههههههه حد قالك توكل وايد .. رح زين ,, كم باقي عن المحاضره
سالم : نقعوا مدافع .. سمعتوا من سألني عن المحاضره ..
سالم كان يغازل بنت ويقول ( يا لابس الوردي الوردي في خدودك)
ناصر : هههههههههههههههه صدق انك ما عندك سالفه
سالم : هين انته الحين؟ ,, انا بييك ..
ناصر : انا في الطريق بعدني ,, توني بوصل .. خمس دقايق ..
سالم ساكت ..
ناصر : هيه انت هين رحت
سالم : اسكت عني تو انته ,, حياك ,, شفت بنت وايد حلوه .. بشوفها أي سياره بتركب
ناصر : يالخسف ..
طووووووووووووووط
سكر سالم في ويه ناصر .. وناصر عصب و بعدين يوم تذكر السبب قام يضحك و يقول في نفسه ( صح انك مستخف يالغبي .. لكن انا برويك يا سواد الويه)

بعد ما خصلت المحاضره ,, اول مره يحس ناصر انه مخه دخل فيه معلومات في الهندسه ,, وعاتب عمره شويه لانه ما يذاكر ولا شيء ما يمهمه غير الكمبيوتر والتصاميم و الحين دخل في حياته المنتدى ..
طبعا سالم ما حضر المحاضره ولا حتى ياء علشان الدكتور يحطه حضور ..

سالم كان مستغرب من ان ناصر ما اتصل فيه ولا شيء ,, و قلق عليه ليكون صار له شيء في الطريق .. وطبعا من فشيلته ان البنت الي يلاحقها اختفيت عنه بسبب ناصر .. فقال في نفسه ( لو كان هذا تغلي برويك اليوم الاسود يالفارط يا ناصر يالغبي)
وناصر يسمع انه تليفونه يرن ,, كان حاط نغمه لسالم خاصه ولبيتهم نغمه غير والبقيه كلهن نغمه وحده .. وطبعا ما رد عليه ,, ومن القهر والغم الي في ناصر سكر تليفونه


في بيتهم ناصر ....>>>

رايه : اميييييييييي ماااااااااااايه .. هينش انتيه ؟
ام ليث: هنا يا روح امها ..
رايه : امي ناصر بيي هالاسبوع ..؟
ام ليث وهو تحضن بنتها : ما اعرفه يا بنتي ليش؟
رايه : اباه ايي تو طلبت من عندي المعلمه بحث بالانجليزي و اباه يخلصني منه هذا الدب الي ما يفلح في شيء غير الكمبيوتر
ام ليث : هالله هالله في اخوش ,, هذا الغالي ولد الغالي
رايه ما تحب احد اييب سيرة ابوها قدامها لانها كانت مدلله وايد من قبله ,, كان ابوها يحبها وايد .. و هي وايد تتحسس من هالشيء .. ومحد يفهمها من اخوانها غير ناصر كانت وايد تحبه و تحسه مثل ابوها .. بس طبعا محد يقدر يعوضها حنان ابوها ابدا..

رايه راحت عن امها و قامت تتصل في ناصر .. ناصر من الصبح لين الظهر كان تليفونه مغلق .. ورايه تضايقت منه .. وراحت غرفتها و دخلت الانترنت و ما لقيته على الماسنجر
رايه : غريبه هين راح هالمخلوق تلفونه مغلق و ما موجود على الماسنجر

دق باب رايه ..
طلال : رايوووووووووووه هينش يالدبه
رايه : ياكم الخبل .. نعم اش تبى ؟
طلال : افااااااااا ,, كنت بخبرش خبر بس اخرت خلاص
رايه : انزين برايك ما ابى اعرف
طلال : يقلدها ( انذين برايه ما ابى اعلف) اقول مالت
رايه : عليك يالخسف
طلال : اوهوووه ,, انا خسف لاني ياي اخبرش ان اليوم مباراه حال ريال مدريد
رايه : احلف ؟ طلولي حبيبي اسفه ما كنت اقصد .. انزين خبرني مع أي نادي
طلال : احلفي بس اقولش .. تو عاد .. روحي زين .. ما بخليش تتابعيها ..
رايه : اونه التلفزيون حالك و انا ما اعرف ؟

راح عنها طلال .. كانت رايه راسها وايد يابس وعنيده .. بس شاطره في المدرسه و وايد ذكيه وجميله ,, المعلمات كانن يتخبلن عليها ,, وهي محجوزه لواحد من عايلتها بس هيه ما تباه .. والكل يتمدح في جمالها .. كانت اجمل في بنت في عايلتها
بس مضيع عليها عنادها الكبير ,, و ناصر تعيبه شخصية اخته في داخله .. ويفتخر فيها وايد في نفسه ..


في الجامعه بالتحديد في الاستراحه >>>

سالم : ناصر يالفارط ليش ما اتصلت بي؟
ناصر : روح عني بس ,, مشيء كمل المغازل يالفارط
سالم : اسكت لا اعطيك كف على خشمك الحين ,,
ناصر انصدم من ردة فعل سالم .. لان سالم قالها بكل قوه .. واحرجه قدام الشباب الي في الاستراحه .. وسالم ما لاحظ على عمره غير يوم شاف ناصر مفتر و رايح للسياره
سالم : ناااااااااصر شفيك يا ولد الحلال كنت امزح معك حشااا !!
سالم كان يركض لين ما مسكه من كتوفه ,, بس ناصر مسك ايده و نزلها بالقوه
وقاله : لا اعرفك ولا تعرفني ..
سالم تأثر وايد و حس ذيك الساعه بغلطته وما يعرف اش يسوي .. وحس ان يبي يبكي .. ما يدري وش صار في حاله .. معقوله ناصر يتغير بهالسرعه علي ؟ ليش يا ربي وانا اغليه و اعتبره اعز اصدقائي ..

بعد ما خصلن كل المحاضرات .. الكل استغرب هدوء سالم و عدم تعليقه على الاشياء الي تصير في الكلاس .. و قتها بس عرف ناصر ان سالم يحبه و يعزه كثير .. بس في داخله كان متضايق من هالتصرف ,, والي يضيق فيه اكثر كله هالمعامله الي عاملها سالم لناصر كانت بسبب بنت وفي النهايه كله علشان ايشوفها أي سياره راح تركب

سالم ما راح يتنازل بسهوله عن صداقه ناصر .. رغم ان معرفتهم كانت من نص سنه الي هيه الفصل الاول من الدراسه الجامعيه وكانت من الاروع الاوقات لانها اول سنه يتعلمون انجليزي و كل واحد يضحك على الثاني بس اثنينهم كانت انجليزيتهم لا بأس بها لانهم وايد يسافرون برا وهذا ساعدهم في انهم يدخلون اخر ليفل ,,

خلصن محاضرات الاربعاء الساعه اربعه وفي ذيك اللحظه يروح ناصر .. ولقى سامي ولد اخوه خليفه في الطريق وقال:" هلا ولد اخوي شحالك؟"
وهو يلم عمه :" هلا عمي ,, بخير وانت" و يتخاشمون
ناصر:" تمام والحمدلله ,, هاه كيف هالاسبوع رايحين البلد؟"
سامي : " والله يا ناصر ما اعرف ,, انت بتروح؟"
ناصر :" ان شاء الله ,, بروح وحدي مشتاق اكل البلد بدل اكل العزاب هذا!"
سامي:" انزين عمي زين تمر علينا البيت وتقعد معنا"
ناصر :" والله يا سامي -القرم - تمحني بعيده ما اقدر لها "
سامي:" انزين عمي على هواك .. انا بروح .. سلم على رايوه الدبه "
ناصر:" يبلغ سلم على اخوي"
سامي ولد عاقل وايد الكل يحبه .. مميز في صفاته بين اخوانه العشر .. وناصر يعز سامي اكثر شيء .. وسامي بعد وايد متعلق في عمه ناصر وخاصه انهم نفس العمر.. بس سامي دخل كليه التجاره و الاقتصاد ..

ناصر : الوووووووووووو
طلال: هلا نصوري .. شخبارك يالبطران ؟
ناصر: بخير يالساهي .. شخبارك انت وكيف ثالث اعدادي معك
طلال : وااااااااع لا تذكرني اليوم الاربعاء ما اصدق افتك من الدراسه .. هاه كيف البنات معكم في اليامعه حلوات؟ ( طلال وايد شخصيته قريبه من شخصيه سالم حتى في اهتمامته وبعد طلال شويه عليه متن بس مو بذاك الزود)
ناصر: افااااااااا,, احسن تكلم سالم عن هالسوالف
طلال: من سالم الي ما تسكت عنه خليني اشوفه بعدين لا تنسى اطلع لي رقم بدال حياك ..
ناصر: لااااااااااااااااه .. قلت لك يوم بتدخل اول ثانوي وبعدني بعلمك تسوق
طلال: اوووف برايك ..
ناصر: شكلي وايد عطينك ويه .. هين امي؟
طلال : امي رايحه بيت يدي
ناصر: اخوالي هنا ولا محد بيي؟
طلال: محد هالاسبوع بيي غير اخوي عبدالله
ناصر: والنعم ,, يوم ايي اخوك عبدالله ما ايي السلطان قابوس
طلال : هههههههههههههههههههههههه
ناصر : هات رايوه اكلمها .. اذيه التفله حتى ما تسال عن اخوها
طلال : يالله بحول فوق ,,

رايه: السلااااااااااام عليكم من يتحدث؟
ناصر: يوه يوه يوه .. اكيد يالسه تذاكري كتاب العربي
رايه: نااااااااااصر .. اكرررررررررررهك .. ليش قافل طول اليوم تلفونك
ناصر: ههههههههههههههههه بسم الله الرحمن الرحيم انزين شويه شويه علي
رايه : اسكت عني زعلانه عليك اليوم ..بتيي هالاسبوع؟
ناصر: احيدش زعلانه ليش تساليني؟
رايه : صح صح انسيت يالله مع السلامه
ناصر ميت من الضحك عليها : ههههههههههههههههه دلوعه تبغي اييب لش شيء؟
رايه: لا مشكور
ناصر: من جدها زعلت .. انزين بترضيي يوم بتشوفيني
رايه: مشاكل الي يصدقون عمارهم
ناصر: ههههههههههههههههههههههههههههه بس طفري تو انا بروح اخذ شاور و بييكم.
رايه: حياك

طبعا ناصر راح بسرعه لكمبيوتر بعد ما كلم رايه ..

لما فتح المنتدى راح بسرعه ايشوف من الاعضاء الي اليوم خشوا المنتدى و يدور على اسم واحد .. –كل القلوب- الي ما حصله .. و تضايق وفكر ان يرسل رساله خاصه علشان يتحرى الرد لين ما يوصل البلد ..

كان نص الرساله : ( السلام عليكم
اختي كل القلوب ..
لطالما انتظرت ان تشرفينا بدخولك المنتدى
وخاصه ان غيابك شهرا عنا ليس بقليل
ويا عجبي كيف لا تحترقين شوقا لهذا المنتدى !!

تقبلي تحياتي .. ناصر افندي)

ولما رجع للي قراه تألم قلبه ان كتب اختي ,, بس احتراما لها ..





في بيت بو سالم ...>>>>

سالم كان يلعب مع بنت اخته الصغيره الي عمرها سنتين اسمها روان .. و يضحك ويسولف مع اخواته ..سالم كان عنده خمس اخوان .. و ثلاث اخوات ..
اخوانه ( فيصل 30 صديق عبدالله اخو ناصر, بدر 27 , سعود 25, سعيد 22, حمد21 , و سالم 18, و اخرهم ابراهيم 15)
اخواته ( ايمان تؤام سعود 25 سنه , امل 24 عشرين – ام روان- , مهره 10 سنوات)

سالم في داخله وايد متأثر بس مو مبين مع احد ,,
مهره: ساااااااااااااالم ابي اروح الدكان
سالم : ليه حبيبتي شو تبين في الدكان
مهره: ابي اشري اغراض
سالم : ههههههههههههههههه توش صغيرونه اغراض موه تشتري؟
مهره: بتأخذني ولا بخلي السايق يشلني؟
سالم: لااااااااااه حتى لو ما رضيت اشلش السايق ما راح يشلش يا حبيبتي ما يصير
مهره : بخبر عليك ابوي
سالم: الا الشيمه تعالي ,, ابويي بشلش بشلش بس بشرط
مهره وهي تقلب عيونها ومشبكه ايدها و تتحرك مثل البطرانه : وش تبي
سالم : تعزميني على ديو
مهره: انزين الفلوس وايد ,, بعزمك بس عندي شرط
يبي يقول ((شو الشرط)) بس مهره قالت بسرعه: ما تأخذ روانووه الغثه معنا
سالم وايد يحب روان ,, يمووووت عليها لانها مربربه و عليها خدود مورده وتخبل الواحد
سالم رافع حاجبه : لا والله عاد كيفي اشلها معي او لا
مهره : خلها تنفعك ابرك لك
سالم يضحك ما قدر يتكلم ويقول في خاطره من الحين تغارين يا مهره بتتعبين
مهره: ويضحك !! يا حظي بس من اخو
سالم : ههههههههههههههههه صدق تغاري يالهدره اصلا ما يصير تغارين توش صغيره
مهره : اوهوووووووووه صغيره كبيره ,, عاد كيفي
مهره شكلها جدا طفولي بس عقلها اكبر منها ,, فيها ذكاء و راثي لان ايدودها كانوا عندهم رجاحه في العقل ,,
ايمان عانس و سالم وايد ايحبها وايسولف معها ,, و قريب منها وايد .. لذلك قال لمهره في اذنها انها تروح تناديها ايروحون مع بعض – مركز السلطان – يشرون اغراض مهره و منها يغيرون جو .. كانت مهره تخطط تقوله ايروحون مجمع الحارثي علشان تلعب شوي
شوفوا كيف هالبنت خبيثه !!؟؟
سالم رغم كل الي يسويه كان مشغول باله في الي صار له اليوم مع ناصر .. مو قادر ينسى .. بس يحاول يتناسي

في السياره كان الصمت صاحب الموقف و سالم كله سرحان ويفكر و بما ان الحي التجاري ما بعيد من القرم وصلوا بسرعه ..

وهمه يمشون صوب المركز سمع صوت يناديه ..

.....: ساااااالم
سالم يلتفت لوراء ويشوف صديقه سعد .. و ينحرج لان اخته ايمان معاه ..
سعد صديق سالم من الطفوله .. سعد وايد يحب ايمان .. وايمان بعد ,, يدق قلبها لما تمشي و تحس انها مو قادره تتحرك .. بس ربشه مهره خلتها تتحرك ,, بس قلبها كان هناك ,, امبين سالم وسعد .. وسعد من الفرحه مو قادر يسوي شيء .. يحس نفسه ان الدنيا ضيقه عليه لانها مو شايلتنه من الفرحه ,, بس تسالون ليش سعد ما تزوج ايمان ؟؟
لان ايمان محجوزه لولد عمها الي مسافر ,, ولد عمها الفاشل .. الي للحين ما نجح في دراسته .. على وشك طرده من اليامعه الي اهو فيها .. ولد عمها الي يسولف مع كل بنات مسقط وكل بنات خلق الله .. ما شغله غير الترقيم و السوالف ,, صح سالم يغازلهن بس ما تجرأ في يوم يسولف مع بنت .. كله مجرد ضحك و مزوحي

سالم يخاشمه : هلا سعدوووه شخبارك
سعد: بخير يا المنفخ شخبارك انت
سالم : من حالك ,, هاه شو ياي تسوي هنا
سعد : والله ياي اشري اغراض حال البيت
سالم : زين زين نشوفك ..
سالم قال كذا لان سعد لما خطب ايمان رغم انه ولد عائله محترمه ,, رفضوه وكان سالم يتقطع قلبه على اخته الي تنتظر ولد عمها بس بعد ما شاف ان حالة سعد مو عاجبته ,, الهالات مليانه عيونه وشكله ما يريح الواحد قرر ان يكلم ابوه علشان اخته و صديق طفولته .. مشكلة سعد الوحيده ان بعد ما رفضوه لجأ للتدخين .. يبي ينتقم منهم بأنه يضر نفسه ..

سعد لما سمع كلام سالم راح لعالم ثاني .. صار حزين و مكتئب .. بس في نفسه جرح كبير من اهل سالم ..
سالم: سعد انا اعرف في هيش تفكر
سعد ما قدر يرفع رأسه .. ودموعه على وشك انها تنزل
راح سالم وخذاه على ينب و قاله : اوعدك يا سعد اني اكلم الوالد ما يصير ننتظر حسام لين ما ينجح و يشتغل و بعدين يتزوج ايمان
سعد نزلن دموعه غصبن عنه .. تجمد ما يعرف هيش يقول ولا شو يسوي .. ويمسح دموعه الي ما وقفن ..
سالم : تعال السياره بدال هنا قدام خلق الله
راحوا السياره وسعد راسه منتكس ولا قادر يحط اعيونه بعيون احد ..

ترررررررررررن ,, تليفون سالم
ايمان : هلا سالم وين رحت
سالم : انتوا اشتروا الي تبونه بعدين روحوا مجمع الحارثي انا بييكم هناك
ايمان : ان شاء الله
سالم يفكر ايقول لايمان او لا : ايمان
ايمان: هلا اخوي
سالم : معي سعد الحين ( ايمان قلبها يدق بالقوه ما تدري شو تقول وسعد نفس الحاله) تبيني ازوجش اياه
ايمان ساكته .. استحت .. بس قالت : و ابوي وحسام؟
سالم : انتي تبين سعد ولا حسام؟ تكلمي انا اخوش اقرب واحد لش من اخوانش لو ما قلتي لمن بتقولي يالله قولي من ؟
ايمان بعد صمت مو قصير: سـ.....عـد
سالم : خلاص تم .. فمان الله
ايمان : في حفظه
ايمان قلبها يتقطع من الفرحه ,, اخيرا فهمتني يا سالم اخيرا .. يا ترى كيف حالة سعد ؟؟؟
سعد تنهد تنهيده طويله و من ثم قال : خلاص يا سالم ما في داعي تكلم ابوك متاكد انه ما في فايده
سالم : انت لا تفقد الامل ,, الوالد الله يخليه ما يعرف عن سوالف هالخسف الي كل البلاوي اتيي من راسه واطيح في راس ايمان ,, تنعاني اختي ما تهون علي وانت صديق طفولتي ,, وبحقق بايدي امنتيكم ,, والله معي ان شاء الله
لا تشوفني دب بس تطلع علي سوالف رهيبه
سعد:ههههههههههههههههههههههههههههههههههههههه
سالم : اخيرا سمعنا هالضحكه ,, صح انكم مخبل تحزنوا على اشياء مالها داعي
سعد : انت لك حبيت؟
سالم : يالله اسكت عني انا في اليوم احب 100 بنت في اليامعه من اول نظره
سعد : ههههههههههههههههههه ما تغيرن سوالفك يالفارط
سالم : انزل بس هههههههه كل العالم بتتغير غيري انا
سعد : هذا المعلومه مختومه ,, هاه كيف بتيي الرمسه اليوم
سالم : امممممممممممممم بفكر خخخخخخخخخخخخ
سعد : مالت عليك وعلى تفكيرك ( و هما ينزلون من السياره)
سعد مرتاح نفسيا و خاصه ان سالم ربيعه وبيساعده في اكبر عقده في حياته في نظره ,, الغريب ان سالم يتكلم في اشياء جديه دايما اهوا سعيد ويضحك وكل شيء بس حس سعد ان اليوم في شيء غريب يعني مو سوالف الاوليه ,, اليوم في ويهه حزن ,, ليكون يحب بس؟
بس سعد ما يحب يتدخل في شؤون غيره ,, يحب ان الشخص ايي ويسولف عن الي في قلبه بدون عن يطرح أي شيء ..
تحياتي : اختكم : زحمة احزان

[زحمة احزان]

::: نهاية الجزء الاول :::

سالم وسعد في طريقهم الي المركز سأله سالم : سعد لازم تترك التدخين
تفاجأ سعد من هالطلب الغريب .. وخاصه انه صادر من شخص مثل سالم




الساعه تسعه الليل ..في بيت همه ناصر ... في البلد

بيببببببببببب بيييييييييييييييب ... ناصر يضرب هرن يعلمهم انه وصل
وكان يايب ورده حال رايوه علشان ما تزعل ومشري لاخوانهم حلويات و عطر لامه علشان يرضي الكل..

طلال كان رايـع من برا و سمع صوت الهرن و قعد يركض يبي يحضن اخوه الي اسبوعين ما ياء البلد بسبب الامتحانات.. و ناصر على وشك انه يدخل الا يصارخ طلال
طلال : نصووووووووووووووري حبيبي شو يايب لي ؟
ناصر: مالت عليك يالدب بدال ما تحضني وتقولي مشتاق لك يا اخوي يالغالي
طلال : لااااااااه لو حضنتك بتقول : ( شويه شويه علي بتقتلني يالدب)
ناصر: ههههههههههههههههههههههههههههههه
طلال دمه وايد خفيف لكن شخصيته شويه ضعيفه ,, لان اخوه ليث كان وايد يضربه يوم صغير وترك هذا في نفسه جروح طفوليه ما يقدر ينساها .. خاصه ليث لو بغى يضرب احد ما يرحم ,, وطلال بعد ما كان جميل مثل جمال اخوانه .. كلهم يأخذون العقل الا هو .. كل هالعوامل اثرت فيه وصار انسان حساس جدا ..ويشيل في خاطره الكثير الكثير الي في يوم من الايام راح يكبر فيه هالشيء .. والله اعلم شو بيسوي


رايه كانت تشوف التلفزيون في صاالة الطابق الارضي وتغني ( يا صاحبي وش فيك قاعد لحالك ليش انت متغير ومشغول بالك)
ناصر يسير شويه شويه علشان ما تحس فيه وهي منسجمه لما تغني و تلعب بشعرها
ناصر: يا صاحبي ضاقت علي الليالي الي شغل قلبي وفكري وبالي
رايوه : ناصر .. بسم الله من متى انته هنا
ناصر: خبرش عتيق يالزعلانه
رايوه: زين ورح عني ما ابى اكلمك
ناصر : يايب لش هذي,, عطاها الورده وراح عنها يعرف ان راس يابس و بترضي نفسها بنفسها هالدلوعه
ناصر وقف وتذكر سامي وقالها: سامي يسلم عليش
رايوه: الله يسلمه


ناصر لم امه وقعد معاها ويسولفون و كانوا مرتاحين وكل شيء ,, لين ما يت الساعه 10 ونص والوالده كانت تبي تروح تنام ,, دخلت تنام وظل اهو وطلال ورايوه ..
طلال: ناصر بكره نبيك تطلعنا ملينا هنا
رايوه ساكته ما تتكلم ..
ناصر: وانتي رايه ما تبين تطلعين؟
رايوه: ما اعرف
ناصر عصب عليها و تجاهلها : طلال متى تبي تروح ووين؟
ناصر من صفاته انه يعصب ,, بس ما ينازع ..
طلال : مسقط ..
ناصر: هاو .. تراني ما اقدر ,, لو كنت اعرف كنت بخلي احد من اولاد اخواتي ايبوكم
طلال : لااااااااااااه ما نبي !! وامي ما تقدر تطلع ,, نبي نمشي ونرد في نفس اليوم
ناصر يفكر ,, ما يهونون عليه اخوانه لانه صدق ملل في البلاد ما في احد ايي معاهم وخاصه انه طلال و رايوه اعز الناس معهم ما موجودين في عمان – رايه وطلال اعز اصدقائهم اولاد خالهم الي يداوم في الخارج - بس ناصر تذكر كل القلوب لو ما ردت عليه ما بيروح لو ردت بيروح ,,
طلال : هاه شقلت؟
ناصر: والله بشوف بس ما اوعدكم
رايه : تطمئن ما راح انروح
ناصر يكلم طلال و يصك رايه بنص عين : طلال ابي استخدم غرفتك وكميبوترك هاليومين ,, اللاب توب مالي في التصليح
طلال : على هواك انا بروح ارقد الحينه ,, تعبان ,, تصبحوا على خير
ناصر ورايوه: وانت من اهله
ناصر: الحين خبريني ليش مبوزه كذا ؟
رايه : ما شيء
ناصر: دلع صح .؟؟
رايوه تشوف عليه بعين حاره وكلها غضب: على راحتي كان دلع ولا مصاخه محد يله دخل
ناصر : كيفش ,, انا بروح اشبك على النت فمان الله ..

ما ردت عليه .. وراح عنها فوق خذ شاور وغير ملابسه .. وشبك على الانترنت
( وصلت رساله من كل القلوب) لما شاف الرساله .. قحم وقعد يصارخ مثل المينون كانه طفل من اول ويديد..

( وعليكم السلام
هلا ناصر .. غريبه حد افتقدني
تصدق عاد ,, اليوم كنت طالعه من المستشفى
مشكور على سؤالك
اتمنى اشوفك عما قريب
وحرب جديده راح اتكون :] )
عوره قلبه ,, تألم .. خلاص .. هالبنت احبها وما اقدر اعيش من دونها لا تسالوني ليش وليش .. بس هالبنت غير .. هذي كل القلوب واسم على مسمى ..

( هلا كل القلوب
يا كثر ما افتقدك ,, ماله المنتدى طعم من دونك – بكل صراحه –
ممكن اكلمش في موضوع ,, )

و نسى ناصر الموضوع وظل يصمم ,,

مها لما قرت رساله ناصر الخاصه ,, تبي تتقطع من الفرحه .. الله ناصر يحبني ,, ما اصدق .. وش الموضوع الي يبي يكلمني فيه .. ليه طيب ما يطلب ايميلي ,, بعطيه حقه و بشوف وش يبي مني بالضبط .. بس ما اقدر .. اخاف يفهمني خطأ ويعتقد اني من البنات الماصخات ..
( هلا ناصر ..الحمدلله انك موجود على المنتدى
وشكرا على هالمشاعر الطيبه
تفضل في أي موضوع تبي تتكلم انا اسمعك)


ترررررررررررررررن ترررررررررررررررررن
ناصر شاف ان رقم سالم كان ما يبي يرد ,, بس اخلاقه اعلى من هالشيء .. ولو انه سواها من قبل ..!!
ناصر: وعليكم السلام
سالم : هاه زعلان ؟
ناصر : لا عادي
سالم : ياخي ارحمني وارضى والله ما قادر اصدق انك زعلان مني وانت وايد غالي ومعزتك كبيره على قلبي
ناصر : الله يسلمك ..
سالم ساكت ما عرف هيش يقوله .. وناصر متضايق ما قادر ايقول شيء
سالم : عموما ما اخرك .. انا اسف وايد وما كنت اقصد .. في خاطرك شيء
ناصر: مشكور مع السلامه
سالم : فمان الله
ناصر تأثر على هالمعامله القاسيه الي عاملها سالم و يدري ان سالم يمزح بس بيرضى عليه لما بيروح اليامعه ان شاء الله ..

فرح ناصر لما شاف رد كل القلوب
( كل القلوب .. ممكن نتلكم على الماسنجر بقول لك كلام وايد اذا ما عندك مانع)
للأسف ناصر تأخر في الرد على كل القلوب لذلك طلعت من المنتدى .. واصيب بإحباط شديد ..
وهو يشتغل على التصاميم .. رن تلفونه.. رقم اخوه عبدالله
عبدالله : السلام عليكم ناصور شخبارك
ناصر : وعليكم السلام .. كيفك انت
عبدالله: ماشي الحال
ناصر: هاه بغيت شيء؟
عبدالله : ايه ,, بغيت من عند امك مفتاح بيتنا !!
ناصر تضايق : أي بيتكم؟!!
عبدالله: الي انت فيه الحين
ناصر: الظاهر انك شارب شيء .. !!
عبدالله : احترم نفسك يالغبي .. وين امك ؟
ناصر: امي نايمه ,, اسمعني أياني واياك تفكر في مثل الي تفكر فيه .. سمعت؟
عبدالله: كبرت وتهدد يالبطران
ناصر: ما برد عليك .. شيء ثاني تبي؟
عبدالله: كلامي هذا يوصلك ويتعداك .. البيت الي انتوا فيه لازم يكون لي انا احق فيه
ناصر وبكل استهزاء يكلمه : وبعدين؟
عبدالله: بتشوف انا ولا انت
ناصر: وبعدين؟
عبدالله عصب .. وناصر يحب يتعامل بالتعامل الجاف والقاسي مع الناس الي ما تستاهل : وبعدين بتزوج وبتطلعون منه ..!!
ناصر باستفزاز: الظاهر انك نايم و تقص لي حلمك !! صح
عبدالله ما تحمل اسلوب ناصر الاستفزازي لذلك سكر في ويهه
ناصر: فكه .. يعلك ما تتصل مره ثانيه .. صايع ضايع وله حق في البيت !!

ناصر رغم رد الاستفزازي الا ان الخوف سيطر عليه وخاصه ان اخوه ليث وايد ملتهي بدراسته في بريطانيا .. ويا دوب ايي في السنه مره .. ويقعد معاهم شهر .. حتى ما يتهنون فيه .. و يتصل ليث احيانا في اخوانه يسلم عليهم .. ما همه شيء بعد تقسيم الورثه للورث .. لان اكتفى بنصيبه و نسى الباقي .. إلي هو بيوت ابوه الثلاث الي في البلد .. والاثنين الي في شاطئ القرم .. ااااه من الدنيا .. كل شيء يطيح في ناصر حتى في الحب الي بدا في حياته ,, يحس انه شيء مؤقت ما راح يدوم .. بس يتريا انه ايدوم لفتره طويله .. اه يا كل القلوب لو تحبيني .. خلاص بظل لش وحدش تسوين فيني الي تبيه .. .. .. : )

مها اخذت في خاطرها لان ناصر ما رد عليها ,, فطلعت .. وروحها ظلت معلقه في المنتدى .. معقوله اني احب انسان كنت في يوم استفزه .. ناصر هذا الي واثق من نفسه لدرجه الغرور .. الي ما يهمه غير نفسه .. ناصر الاناني ,, يتغير بلحظه ؟ يا ترى هو كذا في حياته العامه ولا غير ؟
خطر في بالها .. ناصر من وين؟ يا ليته سعودي و يسكن في الرياض .. يا رب
ويا ليت ايكون غير عن الشباب الي يخدع البنات .. امييييييييين يا رب ..
اااااه يا ناصر متى اكون بقربك بس؟
تحياتي :: زحمة احزان ::

[الرزينة]

الأخت / زحمة أحزان


في البداية أرحب بك في منتدانا الحبيب

وأتمنى أن نرى دائما جديدك

وبالنسبة للقصة ..

فاسلوبك ممتع ومشوق

فأكملي .. سنتابعك

تحياتي لك,,

[زحمة احزان]

اختي الرزينه ..

اسعدتني كلماتك .. واتمنى ان يتابعني الكثير من اصحاب هذا المنتدى
و اني ما اكون عضو ثقيله عليكم ان شاء الله ..

.. :) .. اشكر ردك .. وان شاء الله تعيبكم القصه .. وسمحونا لو ما كانت على قدكم
توني مبتدئه ..

اختك : زحمة احزان

[جاسم العراقي]

الاخت زحمة احزان

قصه جميله وان لم تكتمل بعد

هذا اللون هو الواقعي وهو حسب رايي اصعب من الخيالي في مجال القصه



تحتاج منك دوما محاكاة الواقع وجعل القصه شيقه في نفس الوقت



انا انتظر كيف ستتصرفين البدايه مثل ما قلت جميله



انا بالانتظار للجديد



تحياتي

جاسم العراقي

[زحمة احزان]

اخوي جاسم العراقي ...

شكرا على كلماتك الرائعه .. :) ..

و ان شاء الله اكون موفقه في محاكاة الواقع ..

واتمنى ان تكون هناك ايدي تشد بيدي لتعلمني الاخطاء الي اقع فيها من خلال كتابتي للقصه

و راح اكملها بإذن الله ..

اختك : زحمة احزان

[الهنوفه]

الأخت زحمة أحزان


هلا بك وحياك الله معانا هنا


لك حرف جميل يالغاليه وخيال واسع


ملاحظتي هي لو كتبتِ باللغة العربيه يالغاليه


لأن لديك مهاره واسعه في رسم الأفكار


ولديك كما ذكرت سابقا الخيال الواسع الجميل


الذي يحتاجه القاص في كتاباته ،


وقد أجدت في محاكاة الواقع وهذا شىء جميل


لك مستقبل مشرق يالغاليه أستمري


والله معك ،،،،



تحياتي العطره



الهنوفــــــــــه

[زحمة احزان]

اختي الهنوفه

كلماتك هذه ستظل معلقة في ذاكرتي

حقيقة لدي قصه طويله بالعربيه الفصحى ولكني لم اشأ ان انشرها .. :) ..

وهذه القصه اخترتها باللغه العاميه ولو انني اجد صعوبه في كتابتها .. ربما اكثر من العربيه الفصحى ..
ولكن هذه القصه لن تكون طويله جدا .. لذلك فضلتها باللهجه العاميه

اذا رأيت كثرة المتابعين لهذه القصه سأقوم بإذنه تعالى بنشر الاخرى

و شكرا على كلماتك الاكثر من رائعه والمشجعه

اختك : زحمة احزان

[موت][_و_][ميلاد]

نعم فهمت قصتك
عباراتك وهمسك
وقفت طويلا عند سطورك
اراقب حروفك
ويعتصرني حزنك
كنت انتظرك عند بوابة الزمان
عند مراكب الأحزان
على جسد الشاطئ
أنظر الى حوريتك الجميلة
تداعبها بهمسك وحنانك
كنت وحيدا عند جزر العذاب
ترقب تلك المنارات
حيث الأمل سيشرق
وتقبل اليك تلك الحبيبة
من صنعت معك أشرعة من الحب
لتبحر معها 00لتخبرها كم أحببتها
أكانت حلما أم طيفا
أم وردة نابضة في قلب كأس الحب
تنتظر محب قد رحل
زحمـــــــــــــــــــه احزان
لازالت حروفك تتغنى00 بقصتك وكلماتك لها بصمات ساحرة
لاحرمنا من همسك العذب وكلماااااتك الرائعة
تحياااااااتي وأمنيااااااتي لك








(*·.¸موت][_و_][ميلاد ¸.·*)

ا : ( `•.¸
`•.¸ )
¸.•
(`'•.¸(` '•. ¸ * ¸.•'´)¸.•'´)
«´¨`.¸.* موت][_و_][ميلاد *. ¸.´¨`»
(¸. •'´(¸.•'´ * `'•.¸)`'•.¸ )
.•´ `•.¸
`•.¸ )
¸.•

[زحمة احزان]

اخي موت وميلاد

ان كانت هناك كلمات يجب علي ان ادونها من اروع الكلمات

لابد ان تتقدم كلماتك من ذاتها لتكون في الصفحة الاولى

فشكرا على ما كتبت اناملك الرائعه من ابداع ..

اختك : زحمة احزان