أببدع في القصيد اللي يكدّر راعي الفله=وأبكتب في القوافي اللي تزيح الهم عن صدري
وأبكسر حاجز ( الروتين ) وأنتي مثل خلق الله =محيتك من خفوقي قبل انا ما امحيك من فكري
أنا قلبٍ وقف نبضه وحزن وروح معتله =ولا عادت تناسبني عبارة (( يا بعد عمري ))
وأنا في الحب لي ملة ولك أنتي مية مله =ولك كذبك ولك غدرك ,, وأنا مالي سوى شعري
ترى بعض الغلا ينعاف لا من خالطه ذله =درست إني أعز النفس وأرقى فوق من صغري
أسوق الرجل للعليا ,, ودرب الذل ما أدله = وابيع أغلى محبيني ولكن ما نقص قدري
ترى ما كنت أحبك موت ابي تصفيقة الشله =ولا هوب الطموح إن الجميع بحبنا يدري
عرفت إني ( خوي الصمت ) لو زادت بي العله =سكوتي عن تفاهاتك حشيمة حبنا العذري
تمنيت الغلا بعضه وانا ما ابي الغلا كله =على لسانك تكسّر كل حلمٍ والجفا يطري
غموضك شئ ذابحني عجزت ايام عن حله =وإذا كنتي تلوميني على هالصمت ,, من عذري !!
وأنا دايم إلا مني بغيت الشئ اوصله =واشوفك كل ما قربت يمك زدتي في هجري
ما عاد ابغى دفا شمسك وقلبك ما ابي ظله =وما عاد ابغى تحبيني وحرفك يرفضه سطري
سمعت إن العرب قالوا (عدوك وش تبي خله) =وانا كلي ترى ضدك (خفوقي وحرفي وحبري)
وسمعت ( إن الخليل إليا تضايق راحته خله ) =وأنا عكس الخلايق يفرح الخلان في كسري
صبرت أيام ,, إلا شهور ,, ألمّ الجرح وأفلّه =ولو إن الصبر ينطق تعجّب من كثر صبري
حرام إني ما عاد اشتاق لك لو كنت متولّه=خذيتي قبل احساسي ,,, تعالي جربّي نذري
وأنا لو كنت أبنوي لك زعل وأدوّر الزله =لك الله كان فارقتك قبل أهواك من بدري
العرض الشجري
