لا تحمل خافقـي مـالا يطيـق
حيث خفاقي بكبره مـا يطيقـي
يا وسيع النفس ابو حجاج طليق
لا تمشيني على السلك الرقيقـي
تدري إن الضعف فيني ما يليق
وانت تدري وش يليق وما يليقي
يا عدو القلب ابو قلبـن رقيـق
كيف طاوعت الخلايق يا رقيقي
والحقيقة صارت انصاف الحقيق
والسراب اللي بدربي مو حقيقي
قالت:
ما للعمر في بعض الاحوال قيمه
لاغاب عنك من توده وتغليـه
تصبح حياتك في بعاده سقيمـه
ويفز قلبك كل ماجـاك طاريـه
دام المحبة تمطر الوجد غيمـه
وصل الحبايب عهد لازم نوفيه
قلت:
قطع الحبايب يا صحيبي جريمه
لو هو مقفي عنك لازم تناديه
لو هو مقفي للمقفي حشيمـه
يالله عسى بالخير ربي يجازيه
ومن لاحشمهم جعلهم للحريمه
يالله عسى كل البرايا تجافيـه
قالت:
اصبر وياتـي للزمـان انفراجـه
والناس قالوا كل مطرود ملحـوق
وان ضاق صدرك بين همن وحاجه
لاتبدي اسرارك على غير موثوق
ولو كل من يمرض عرفنا علاجـه
ما ضاعت الدنيا ولا مات مخلـوق
قلت:
المشكله تكمن بعنـق الزجاجـه
اللي بها بعض الاجاويد مخنوق
اما خرج لو هو صعيبن اخراجه
وليا خرج لاشك يابنت معتـوق
والا جلس يرفس سوات الدجاجه
لا نازلن سلم ولا طالعن فـوق
قالت:
تخفي هيامك وانت ميـت وملتـاع
ما تدري انه في ملامحـك منحـوت
حكي الغزل في صدرك اشكال وانواع
لكن صمتك حـول الصـدر تابـوت
اليا طلبتك وصل صعبت الاوضـاع
مدري من اللي درسك جعله يمـوت
قلت:
يا صاحبي وش فيك فتحت الاوجاع
ضربه بقلبي صاحبي شاتها شوت
ليا طلبته بعض الاحوال ما طـاع
لو ندهنه يابن الاجاويـد بزيـوت
والمعذرة لاشفت بعض الخطا راع
ترى لساني بعض الاحوال مفلوت
قالت:
ما يزعج النفس الا بعد غاليهـا
ولا يسعد القلب الا شوفة احبابـه
ياعين خلي دموعك فيـك خليهـا
القلب يكفيه من الاحزان ما صابه
يكفي حياتي غلا الغالين ماليهـا
لو شفتهم زال كل الضيق واسبابه
العرض الشجري
