ياويل قلبي كلما اذكر مزايـــــــــــاه

[مستورالحارثي]

ياويل قلبي كل ما اذكر مزاياه=ياويل قلبي وينه اليوم وينه
مدري وش اخباره ولا اعرف نواياه=حبل المواصل فلّته من يدينه
حبه ملك قلبي ودمر خلاياه=فرقا الحبايب ياهل الحب شينه
تبكي عليه العين والقلب ينعاه=فرقاه في نفسي هي اكبر غبينه
أحاول اتناسى وعييت لا انساه=ماغير اهوجس في وصوفه وزينه
كن العسل يقطر من احمر شفاياه=وكل الخفايا سرها وسط عينه
ياخذ من البراق لمعة ثناياه=وتخجِل شعاع الشمس لمعة جبينه
ياوجد روحي كلما حل طرياه=يوقف دمي من ونتي في وتينه
عزاه ياقلبي من الحزن عزاه=وويلاه يانفسي على اللي تبينه
ياقلب وش تسوى حياتك بليّاه=ويانفس وش حيلتْك وانتي حزينه

مستور محمد الحارثي

مصر ـ الاسكندرية في 11/8/1430هـ