رواية "الا ليت القدر" للكاتبه بقايا شتات..
مره متوتره..وخايفه بنفس الوقت..ونزلت على قلبها غمامة حزن..في هذي اللحظات بالذات تمنت امها معاها..مثل أي بنت بالكون..ما تنشاف الفرح هالا بعيون الامهات..لما تجي وتسلم عليك وتبارك لك في اليوم اللي انتظرته سنين وتعبت عشان تشوف اللحظه هذي,,وكمان تمنت ابوها ..يبارك لها ويعطيها نصيحه ويدعي لها ويمسح على شعرها بحنان..وتمنت اخر امنيه ان زوجها ما يكون ضاري..
دخلت عليها اريام ومنار..
: وهذي عروستنا الحلوه..
منار اول ما شافتها بدت تسمي وتقرا عليها.. بجد مدى اليوم اسطوره في الجمال..
وبعد ما باركت لها..
مدى بتوتر: وين البنات؟؟
اريام: تحت تبينهم؟؟
مدى : لا ..بس اسأل..
اريام حطت ايدها على ايد مدى وانصدمت انها كانت بااارده,,
: خايفه !!
مدى ابتسمت بسمه باهته: شوي..
منار تطمنها: خوف طبيعي..بس بعدين تتذكرين هالشي بتضحكين وتقولين يا ليتها تتكرر..
مدى بنفسها " ما اظن هالشي "
>>>>>>>>>>>>>>>>>>>>>>>>>>>>>>>
تحت بالقصر...
رن موبايل ابتهال شافت اسمه وابتسمت..
: هلا سلطون..هلا بأخو العروسه..وولد عم المعرس..
سلطان ضحك: هههههههه لازم تسوين تعريف لي..
ابتهال: يا اخي من قدي..اخوي سلطان بن محمد..
سلطان: احم احم ترى ما تحمل هالشي وانا كاشخ..
ابتهال ضحكت وهي تشوف مشاعل بتذوب من الحياء.
: سم اخوي آمرني وانت كاشخ..
سلطان: لا هنتي يا اختي وانتي كاشخه اليوم خلي مدى توقع على هالدفتر..
ابتهال وقفت بسرعه: توقع !! طيب ثواني وانا جايه باي......بنات تعالوا نحضر مراسم الاحتفال توقيه الانسه مدى على الانس ضاري..
البنات ماتوا ضحك على طريقتها في التقديم وكأنها في مسرحيه تاريخيه..
دانا: وبعدين مو اسمه انس اسمه سيد..
ابتهال: اللي هو.."وبحماس"..انا بروح اخذ الدفتر من سلطان واجي..
مشاعل ولانا بنفس الوقت: بأجي معاك.."وطالعوا بعض"
ابتهال تغير لون وجهها ..معقوله لانا كمان تحب سلطان !!
دانا حاولت تصرف الموقف: بنات كلنا نروح..هذا من الحماس اكيد..
البنات وافقوا وراحوا كلهم..
وهم ماشين اشواق تهمس لدانا: وربي ما تفوت علي الحركه هذي..الثنتين يحبون سلطان..
دانا طالعت مشاعل: هذي بنت جيرانهم من سنين..واكيد تعلقت فيه ..ومحد يلومها سلطان غير..
اشواق ضحكت: من ناحية غير...غير..
وطلعوا كلهم برى القصر بالحديقه..
سلطان لمح مجموعة بنات بس ما يقدر يميز ملامحهم..
ابتهال تركتهم وقربت لسلطان..
:وش هالجيش اللي معاك !!
ابتهال ابتسمت لها بخبث: معجبينك..اكشخ اكثر..
سلطان مات ضحك: لا جد...ليه جو معاك؟
ابتهال: ما ادري يمكن من الحماس..
سلطان: خذي الدفتر هذا وخليها توقع ورجعيه..
ابتهال اخذته: اوك..