هاكـ كل القصيد اخذهـ مثل ماتبي --- والله اني لا غبط الخاطر مسترحيهـ
كيف لا جيت ابكبت احترق بذهبي --- شمعتـ(ن) ماتحس بعمرها من تسيح
كل شاعر ترا لو هو تشاطر غبي --- يطرب الناس شعرهـ وهو جروحهـ تصيح
خذ قصيد(ن) بدى قبل يخط شنبي --- يوم الأيام كانت مثل ريضان شيح
آآهـ ياليت تجمع بعثرة مكتبي --- والله اني نويت ابني لشعري ضريح
كم كتبت وكتبت ولا وصلكـ طلبي --- مدري العيب فيهم او بطبعي صريح
كن الأيام برد وهالقصيد حطبي --- والأماني رماد وهالتوافيق ريح
بدل الوقت شكلي ولا قوى مذهبي --- وادري ان الأماني بهالزمن من صفيح
سهل ويا الصديق وللردي مصعبي --- ودون طيحت خويّي والله اني لطيح
هيهـ يامن تفتش دفتري وش تبي --- كل بيتـ(ن) يمركـ اعرف انهـ جريح
وكان ما كفاكـ شعري يخلف الله تعبي --- ما يخلد ويبقى الا القوي والصحيح
يالقصيدهـ تثني وطربي والعبي --- في زمانـ(ن) بوجهـ الي هقابهـ شحيح
دامها في البدايهـ والنهايهـ حبي --- لا يغركـ قوي العود باكر يطيح
والله أني كنت ألوم اللي يضيق إن غاب خله .. لين جربت المحبة والفراق وقلت توبه..
نعنبو جد المفارق فيه هم وفيه ذله .. أثر كل الحب لذه والفراق اكبر عيوبه ..
أمس فارقت الغلا ومفارق الخلان عله.. ولعلاج الوصل لا تبلش طبيب ولا حبوبه..
الزعل هو سبة الفرقى يهز الحب كله .. ليتني طولة بالي قبل لا يعلن غروبه ..
وهني اللي وسيع الصدر صدره وسع فله .. غلطة الصاحب تجي وتروح ماهي بمحسوبه ..
سامح الله طبعي اللي للتغير يالعله .. قاضب (ن) خلك عزيز لين صارت لي عقوبه ..
ليش تحسب غلطة الصاحب على الصاحب مذله .. ليش ما تحسب ميانه لو تجي عشرين نوبه ..
ولا وربي كنت أحبه حيل مادورت زله .. لا تشكك في غلاه ولا تساعد في هروبه ..
لايمي قبلك تعبت ألوم شعار المجله .. كنت مؤمن في مقولة أعذب الشعر الكذوبه ..
وأثر كل (ن) في حياته له تجارب مستقله.. وأنت لاتشره على مثلي وتبلا لك بحوبه..
جان جابتك الحميه روح له تكفى وقل له.. لايخليني وإذا وده يخفف من ذنوبه..
يستخير وله غلا قلب (ن) صدوق مايمله.. فدوة (ن) له قلبي من شماله لي جنوبه..
يوم قفا والخفوق يفوح عقبه فوح دله.. وسط وقدت واحد (ن) عز الشتا والسهر دوبه..
لا تقهوى بارده من برد فنجاله وزله.. ثم قربها على جال الجمر وارها شبوبه..
وين يدله الخفوق وكل مايدله يتله.. طاري اللي يا كثر مااتعبت رجلي في دروبه..
لاطرأ جريت ونة من بلاده مستحله.. مثل ماراحت بلادي مع شعارات العروبه..
كل هاجوس يجيبه جعل شعري فدوة (ن) له.. واعذابي كل ما جابتلي القبله هبوبه..
مشغل قلبي بحبه دون خلق الله من الله.. هيه ياللي ممتلكني حسن وأسلوب وعذوبه..
ما سمعت إن الخوي له بالخوي تسعين زله.. وأنت طوف زلتي ياعل تفداك اللعوبه..
صاحبي سيف الهجر لا صرت تقدر لا تسله.. ماتظن العفو عند المقدره أكبر عقوبه..
ايه أنا اللي كنت ألوم اللي يضيق إن غاب خله.. بس جربت المحبة الفراق ولت توبه
ما يفضح اللي حب الا اخر اللحظات
لا مد كفه بالوداع و صد بعيونه
معلن رايات الأسف و جيش من العبرات
و بين الحنايا صهيل خيول محزونة
سلام ياللي ناوي الفرقا عدد ما فات
و تعداد ما مر السحاب و هلت مزونه
سلام من قلب سكنته انت و الحسرات
غلاي تكفى يا مودع ناظري صونه
ارحل و انا بارحل .. معي هم و تعب و سكات
و اسرار ما بيني و بين الروح مدفونه
ارحل ما دام الله كتب لك يالحبيب شتات
ما لي على حكم القدر رايٍ و لا مونه
ما لي بعدك .. إلا الصبر و مجاذب الونات
و قصيدي اللي كل خلق الله يغنونه
و ان طالت الغيبة أبانعي الحب .. لو ما مات
عسى الهوى بك يشتعل و تردك ظنونه
باحاول انسى و لو يصيح الشوق بي هيهات
و باحاول اسلى و لو يصيح القلب باهونه