ياعمي الشوق ذابحني ومشقيني
على هنوفآ خذت قلبي وقفت به
وأنا مولع ولا أدري ويش بيديني
غير الصبر والفرج من ربي وربه
لكن الأسباب ياعمي تمشيني
عليك وأنته دوا روحي وترا طبه
تكفى طلبتك ياعمي لاتخليني
وفزعتك هذي ليوم الدين فالحسبه
غروآ خياله معي دائم مخاويني
وأجبر خفوقي بدون شعور في حبه
لو قال عينك لعينه ترخص العيني
ولو قال قلبك أقول القلب لك لعبه
ولو قال ياسر ترا برد الشتاء شيني
لقول ضلع الصدر لعيونك أشبه
ولو قال لو هو بكيفك وش تسميني
لقول أسمك يكفيني وأنا أطربه
ماكن هالأدمي مخلوق من طيني
ماألقا شبيهه بشرق الكون أو غربه
لله دره ودر المنطق الزيني
تقول ربي من الياقوت قد صبه
ويالله ياربي رجيتك وأنته أمعيني
حقق مناتي يارب الكون في قربه
وأنته طلبتك ياعمي لاتخليني
تراه لاضاع مني أنته السبه