يا الله ياللي بيدك البأس وعلاجه=ياخالقٍ كل هالدنيا وما فيها
يارافع السبع مجري الفلك وابراجه=يا باسطٍ سبع نمشي في نواحِيها
خلاّق الإنسان ... كاشف نطفة امشاجه=جلّت آسماك وصِفاتك في تعاليها
انجيت موسى بعصا ... من بحر وآمواجه=ابقدرتك .. واغرقت اعصاة واليها
اسريت بالمصطفى وأثبت معراجه=وولّيت وجهه لقبلة وإنت راضيها
واكملت دينه وهديه بيّن انهاجه=في محكْماتٍ ... سليم العقل واعيها
لك الخلايق بكل اوقات محتاجه=سبحان من علِّم ... آدم كل آساميها
ياصاحبي والزمن ... معروف مِزْلاجه=ودنيا الفنا للرسل ما دام حاليها
ما كنّها إلا كما دولاب درّاجه=واللي كتبه الولي للخلق واطيها
فيها الغني من ازلها وفيه حوّاجه=ناس بنعيمٍ ... وناس البين طاويها
فيها هلْ الطيب وايضا ناس هرّاجه= اللي على الناقصه تتعِب خطاويها
وفيها اللي للمرجله والعرف سهّاجه=ما كنّها إلا المواشي في مفاليها
فيها مركوب الشداد ... وراكب احداجه=وفيها حفاةٍ من الرمضا مواطيها
ولولا الوفاء والكرم ... والكرب والحاجه=ياكثر اللي بالبشر تجْهل مباديها
والعبد مقسوم رزقه ياصل اوداجه=وارزاق كل الخلايق عند محصيها
اللي انكتب لك يجي مضمونٍ إدراجه=واللي لغيرك ايدينك ما يواليها
وشرواك هجير يعرف ... درب منهاجه=حفيد من ترتوي ... عطشا ضواميها
قومٍ لجم الموارد ... دوم هدّاجه=ما تارد الطْرق ... تشرب عذب صافيها
لو إنها بالوغى ... للدم مجّاجه=تبيع الأرواح يوم .... تشريها
شف الجبل راسخٍ ... والريح ما عاجه=يالحر وهي طايره ... تفهم معانيها