على كثر ماقصرت ياصاحبي واخطيت
تحملت غلطاتك وسميتك الغالي
تحديت كل اللي يقولون يوم اقفيت
رحل صاحبك ! واقول : ياكثر عذالي
نسيت الغرام وغبت عن ناظري وابطيت
وخليتني مابين همي وغربالي
بديت انت بالصده وانا عنك ماصديت
قطعت الوصال ورحت ماهمك وصالي
نطرتك على موعد لقانا ولا مريت
وخاويت ليل الهم والضيق بلحالي
مضى ما مضى وشلون عقب البطا حسيت
تجي بعد ماصديت تنشد عن احوالي
انا كل ماهبت هبوب الغلا سجيت
اسج القدم عن حبك اللي على الخالي
ترى مايفيدك لا تندمت قولة ليت
مصيرك تذوق المر في ثغرك الحالي
ولاينفعك ماضيك الاول لو انك جيت
ولا عاد تعنيني لو انك تهيالي
بعد كل ماسويت وش عاد لو سويت
ترى مابقى لك شي يطري على بالي