مشكلة .. لا جات حاجتك بيديـن البخيـل
ما يفكـك ليـن تدفـع كثـر مـا يدفعـه
ومشكلة لا صرت مطعون بكفوف الدخيـل
في ظهرك أربع خناجر وبالصـدر أربعـه
ومشكله لا ضـاق بالوقـت رجـالٍ ثقيـل
يطلـب أحبابـه وعيـا زمانـه ينفـعـه
ليت ربي ما يحاسـب خليـلٍ مـن خليـل
دام مـا للحـظ فزعـة وللوجـه أقنـعـه
دام ماللعـذل تالـي ومـا بالحيـل حيـل
الغـلا سـمٍ نذوقـه .. ومُـرٍ نجـرعـه
نحتري فيه اللقا .. والحصيل اهوَ الحصيل
مثل حلمٍ ما تحقـق .. وعييـت أقطعـه !
كني اللي حط بشفـاه مـن جمـر المليـل لا قدر يرميـه للنـاس ، وازرى يبلعـه !
والظروف اللـي حدتنـي لنيـران وفتيـل
عرضت دمـع المحاجـر لشـيٍ يجزعـه
والمدامـع بالغـلا.. لا تحـال ولا تحيـل
والمشاكل كل ماجـات .. جـات مجمعـه
أعذلوني عن هوى النفس وعيونـي تخيـل
في حبيـبٍ مـا تركتـه ولازلـت اتبعـه
مغرمٍ في حب مثله ولا أرضى لـه بديـل
عيني تشوفه .. وقلبي يجـوع : ويشبعـه
ذاك كل مازان بالـي ، وطالعـت النخيـل
ما ذكـرت الاّ ثباتـه بوقـت الزعزعـه
ما هو إلا قطعةٍ مـن حشـا قلـبٍ عليـل
ومانـي الا قطعـةٍ منـه مخلـوقٍ مـعـه
لا جميلٍ شفـت قبلـه ، ولا بعـده جميـل
العذاري رهن رمشه ، وانا رهن أصبعـه
والله انه لـو طلبنـي طلـوع المستحيـل
ل اطلعه .. منّيه ، مناك .. يعنـي لطلعـه
ما علي مـن الملامـه ولا هـرج الهبيـل
ما أشجع الرجال لا ثار غيـره ماأشجعـه
في عيون اللي عشقني ولا جانـي هزيـل
الله اللي حـط عشقـه بقلبـي ، وازرعـه
لو سكت .. ينطق له الصم ، والدنيا تسيـل
وان حكى .. لو يمشي المزن يوقف يسمعه
سلسبيـلٍ مـن شفاتـه يخالـط سلسبيـل
معمعه بسكـات واحلـى سكـات بمعمعـه
ما هقيت ان أكثر الليل يمرح بالجدايـل :
لين شفته شوف عيني (( بكفـه يرفعـه ))
وإن حييت وما بقى لـي معـه كـود ليـل
لسهره بأول غروبه .. وامـوت بمطلعـه
والله ان العشق جمره : وطاحت بالشليل !
وان حصل ما طاعك الوقت بحبابك .. طعه
ومنهو اللي علم أعـداي نكـران الجميـل
ومنهو الي خـان خلـي وحـاول يقنعـه
كل عاذل ردني عنـك يالطـرف الكحيـل
ياعسى الله يقلعه .. يـا عسـى الله يقلعـه
يامعرض قلب الأحبـاب للـدرب الطويـل
السعه . لا بـارك الله بالضيـق . السعـه
والله أن الوقت قاسـي وأنـا مانـي ذليـل
وأشهد ان الرجـل مـرات ظنـه يخدعـه
وأنتـم تعذلـون خفـاق بعيـون العديـل
ما رحمتم نـار جرحـه وغيـرة مدمعـه
والسوالـف ليلهـا ليـل والحايـل يحيـل
والمشاكـل مشكلـه مشكـلـه متجمـعـه
مشكله لا خانـك الوقـت بالحمـل الثقيـل
لو زرعت الزرع هوج العواصف يشلعـه
ومشكله لا صار عاذلـك مايبـرد غليـل
لا تـرده طيـب كلمـه ولا حـدٍ يمنعـه
ومشكله لا صرت مطعون بكفوف الدخيـل
في ظهرك أربع خناجر وبالصـدر أربعـه
العرض العادي
