يا شعري الموجود في صدر شاعرك
عدى عليك الوقت وما زال صدري
يكرمك حتى وانت يا شعر خابرك
بينت همن فيه وبينت خبري
وجد الخفوق اغذاك والحظ سايرك
وانت تغلى عمر والعمر عمري
وين انت عن ماضيك وفعول حاضرك
يوم ان بيوتك تشفي الغل وتبري
جروح قلبن حده الوقت وباشرك
وابدعت بك وابدعت به وانت تدري
غيّم علي الحزن ومانيب عاذرك
بان الدمع يا شعر وماهوب بامري
اظهر وبين فيه باردك وفايرك
مليت من جلستك ومليت صبري
لا تبرر المجلاس مانيب جابرك
ان كان ماودك فعلمني بدري
لاتصير مثل اللي ومنته وجاورك
وانكرني لين انكرت نفسي ونكري
يا كثر ما بينت له من خواطرك
ويصد ما كنه سمع فيك عذري
واليوم كنه عن شعوري يشاورك
قل له صحيبك حر وماهوب وكري
ويقول أبيض وجه ولاهنت وشاكرك
انت القلم واوراق شعري وحبري
بس انت تدري اني راعيت خاطرك
واتعبت قلبي فيك واتعبت فكري
وانا تراني واقفن فيك وعابرك
جيتك وانا عبري وبعبرك عبري
وان قلوا الاصحاب مانيب ذاكرك
تكفيني صحبة وجد وابيات شعري
هذا كلامي جاك وذالحين غادرك
لا تقول كيف وليه وما صار ومدري
يكفي وانا مبغاه يا شعر يجاورك
ما عاد له مجلاس في وسط صدري
وابيض وجه يا شعر ولا هنت وشاكرك
جليت عني حزن وما زلّ خبري
عاينت من بيـن المراقيـب مرقـاب
وعدّيت فوق وهاضني بـرد نسنـاس
وفتّحت من باب الشعر عـدة ابـواب
وحيّيت من بـدّ الهواجيـس هوجـاس
ثم قام يطري صاحبن جـا ولا غـاب
والغايب اللي مـا تجنسـه الاجنـاس
جنّستـه بقلبـي رفيقـن ولا طــاب
وغيرتهـا للـروح معـدال ولا بـاس
اللي عطاني من مواجيـب الاصحـاب
طعنة ظهر بكليب من رمـح جسـاس
كن الخفوق بخوته فـرد مـا صـاب
وكن المديح الي مدحتـه بـلا سـاس
خطرف لي الطنبين من بـد الاطنـاب
طنب المعزة وطنب من طيب الاحساس
وطبيت طبـة مستهينيـن الاصعـاب
وغمضت ف الطيحة على بر نومـاس
لو بان مني نقـص لا بـاس بعتـاب
وان بـان منـي زود مابيـه ينـداس
شفته كبير الحـظ مخلـوف الاتعـاب
ما وسوسه في الطيب وسواس خنـاس
والا ضعيف النفس ما جاور اغـراب
ما سن حد السيف في وجيـه الانجـاس
من جاس في درب المغانم ولا جـاب
اطيب من اللي مـا تعنـى ولا جـاس
والحاضر اللي طق في القلب لو بـاب
لو غاب له في داخل القلـب مجـلاس