ياليت أخلـّـي كل حي ٍ فحاله=انسى هموم الغير قلبي بسلّيه
أشقيت بالي يوم كل ٍ فباله=مرتاح فكر ه مالقى من يعنيه
الحب قصة عاشق ٍ في خياله=واقع صدمه وصد ثم قام يبكيه
القلب جرحه سبة اللي غداله=اقفى وغاب ولا تبيّن مواريه
كل ٍ وله خل ٍ ليا جا اشتكاله=هم المعنا لا شكاله بيرضيه
منهو لقاله خل قام ومشاله=مير المصيبه وين خلي وانا ارجيه
اربع سنين ولا وصلنا مجاله=من وين ماجيته يغيّر مماشيه
مجلسه يمنا مير انا في شماله=صفر ٍ مهمش دون حسبه ويرميه
طفل ٍ صغير السن فيه الجهاله=يلعب على شايب كبير ٍ ومغليه
غره زمانه يوم جاته سهاله=ماذاق طعم المر من كاس تسقيه
بنشده منهو قد زمانه صفاله=من غير ماياطا على النار تكويه
البدر مايكمل وشفنا هلاله=والشمس غابت من بغى الليل يسريه
إنشد كبير السن وقت ٍ مضاله=كم مرة ٍ ذيب المفالي نعشيه
شايب كريم ٍ مرخص ٍ في حلاله=كف ٍ نديّه من بغى شي نعطيه
طبعي ولالي طبع ثاني بداله=عيشت كرم ماعشت راسي مرخيه
من عاش فالدنيا مخوّي لحاله=ماعاش بين الناس محد ٍ مخاويه
منهو مبهر ياغناتي دلاله=لامر حي ٍ مايقفي إمتعديه
وشهي حياته من يجمّع في ماله=لاصار داره من حيا الناس مخليه
الشيب ماهو عيب إلا جا رجاله=الشيب في راسي ولاني مغطيه
حاولت اجامل مير ماهي جماله=عيب ٍ على مثلي ليا ضاع طاريه
العرض الشجري
