انا بنت ابلغ من العمر 25 ( على خلق ونسب وجمال وجامعية) تقدم لخطبتي الكثير ولم يحصل نصيب في شهر جماد الثاني الماضي تقدم لخطبتي رجل يبلغ من العمر 35 مع شهادة متوسطه وقال انه متوظف يعاني من مرض البهق ( مع العلم انا الكثير يشكك ويقولون ان فيه برص لكن اهله يقولون بهق ) المهم هذا الموضوع ماهمني لان المرض من الله وممكن انا اتعرض لاي مر ض كان , باختصار ابويا سأل عن اخلاقه واهله طلعوا طيبين وسمعته طيبه , حصلت الشوفة وارتحت له , بعد شهرين اكتشفنا انه مو متوظف وكان يبغى يملك جاء للوالد يحدد المكلة لكن الوالد سأله وين وظيفتك عشان بيطمن بس قاال حاليا ماعندي يعني كذب علينا , اعطاه الوالد مهلة انه يدور وظيفة للحين مرت 3 شهور لاحس ولاخبر , حتى الوالد ماتشرط عليه الا بمهر قيمته 1000 بس , يعني كان همنا اخلاقه ولما شافنا ماسالنا على الوظيفة هو سكت وما قال ان ماعنده وظيفة وبس معتمد على التعقيب يعني يوم يدخل فلوس ويوم لا , انا والله ماهمني لو يشتغل امن او اي شي اسمه يقدر افتح بيت ويحس بالمسئوليه , لكن اتضح انه بارد وماهو قد كلامه حتى مع الرجال, لدرجة الوالد قاله لو تلقى وظيفة ب2000 بس احس اني مطمن على بنتي , هو ماقدر كلمة االوالد ولا احترم انه اعطاه وعد وانه دخل بيت ناس محترمين وخطب منهم , وازيدكم من الشعر بيت كثير من اقاربه يقولون انه مو قد تحمل المسئولية , اانا محتارة عقلي يقول افصخ الخطبة وقلبي يقول لا ( زي اي بنت احلم بالزواج وتكوين اسرة وابغى الله يستر عليه ويرزقني اولاد ) لان الشباب ماصارو يفكرون بالزواج وكل ماتقدم سن البنت في مجتمعنا قل حظها بالزواج , انا بين نارين ارضى فيه بعيوبه او انقذ نفسي قبل لا اتزوج واندم , والله ماهمني لاتعليم ولامال ولاعيلة ولا منصب , بس اتمنى انسان رجال قد كلمته معاي ومع اهلي لكن هذا مواقفه مع الوالد تفشل حتى ابوي بدأ يتضايق اذا جبت سيرته ووده اليوم قبل بكره اني افصخ الخطبة لكن مسكين ما يبغى يضغط عليه مخلي القرار بيدي عشان لايحس انه قطع نصيبي , ساعدوني واعطوني رايكم وشكرا ( ملاحظة ليش البنت في مجتمعنا تنظلم لما تبغى تستر على نفسه وتصونها بالحلال ماتلقى انسان يستاهل وليش يحطون العيوب في البنات وبس اذا اطلقت واذا فصخت خطبة والله في بنات بعمر الورد يروح عمرهم كدا وشبابنا همه سفر وصياعه او زواج من بره , ايش الحل يعني تبغو البنات تخطب لنفسها او نصيع زيكم احسن ) الله يهدينا اجمعين وياكتر ماتقولو احنا مانبغى الهم والقرف طيب كدا بتظلمونا معاكم
الرجاء مساعدتي بحل او برأي عقلاني جاد وبدون تريقه
العرض العادي
