سلسلة دروس الود التعليمية (من الألف للياء) .. حماية حاسبك الشخصي .. وحساباتك الشخصية
سلسلة دروس الود التعليمية (من الألف للياء) ... الدرس الأول: حماية حاسبك الشخصي ... وحساباتك الشخصية - الجزء الأول
السلام عليكم ورحمة الله وبركاته ...
بإذن الله بنقدملكم في منتدى الود سلسلة دروس تعليمية تفيد مستخدمي الحاسب والانترنت كلهم ... وبنختارلكم في كل مرة مواضيع مهمة وحساسة ونعطي فيها دروس وبرامج مفيدة ...
وبداية ... بنقدم لكم دروس تعليمية في ((حماية حاسبك الشخصي ... وحساباتك الشخصية )) من الألف للياء ... وياليت يكون مفيد لكم ... وأي تعليق أو اقتراح أو استفسار احنا جاهزين ...
بسم الله نبدأ ...
مع كثرة استخدامنا للانترنت ... وكثرة أشغالنا عليه ... بدأنا نواجه خطر حقيقي وهو فقدان خصوصيتنا أو فقدان بيانات مهمة بالنسبة لنا ... والسبب ... ناس فاضية وفاهمة تبغى تتسلى بخلق الله ...
يا إما تخترق أجهزتنا وتلعب فيها ... ولا يخترق حساباتنا الخاصة ويطلع على أمورنا الخاصة ... وأحيانا يسرق فلوسنا وحلالنا لو كان مخترق حساب بنكي ... ولا ناس ترسل لنا فايروسات تلعب بحسبة أجهزتنا ..
والمتضرر الأول والأخير ... احنا ... لأننا مقصرين ولا عرفنا نحمي أجهزتنا صح ...
عشان كذه أنا قررت إن أول درس يكون في الحماية ... بأعطيكم دروس مختصرة ومفيدة بالحماية وكمان بأقدم لكم برامج مع شروحاتها ... ويارب تفيدكم ...
أولا: حماية الخصوصية ... والحفاظ على حساباتنا الشخصية من المتطفلين ...
طبعا بالتأكيد كلنا عندنا حسابات شخصية على الانترنت ... أو على الأقل حساب واحد ... عندنا حسابات بريد إلكتروني ... وحسابات منتديات ... وحسابات بنوك ... وحسابات شركات ... وغيره ...
وكلنا بالتأكيد ما نحب أحد يتطفل على حساباتنا ويطلع على أمورنا الخاصة ... وبالذات حسابات البنوك والحسابات اللي فيها الدراهم ... هذي لو أحد تطفل عليها ودنا نطلع عيونه الثنتين
المهم عشان نحمي هالحسابات ... لازم نراعي مسألتين مهمات ...
1- الباسوورد حقتنا لازم تكون غير معروفة لأي شخص ...
2- السيرفر اللي عليها باسوورداتنا لازم يكون محمي وغير معرض للاختراق ...
بالنسبة للسيرفر ... هذي مسألة مو بيدنا نتحكم فيها ... لأن كل موقع وله طريقته الخاصة بحفظ كلمات السر وبحمايتها ... وغالبية المواقع الصاحية تكون الباسووردات مخزنة عندهم مشفرة ... والحماية تكون في أقصى درجاتها لأن سيرفرهم لو صار عليه شي هم المتضررين أكثر منا ...
فلذلك احنا ما بنشغل نفسنا فيهم وبسيرفرهم ... وننتبه للشي اللي احنا مسؤولين عنه ونقدر نعدل فيه وهو باسووردنا (كلمة السر الخاصة فينا)
طرق سرقة كلمة السر:
في طرق كثيرة ممكن يستخدمها المتطفل عشان يسرق كلمة السر ... وكمان في برامج كثيرة ... برامج تجسس أو غيرها ... البرامج هذي بنجيها بعدين وبنعطيكم دروس عشان تقضوا على برامج التجسس في أجهزتكم ...
من الطرق المستخدمة في سرقة كلمات السر ...
1- Password Spoofing أو أنا أسميها بالعربي ((الادعاء)) : وهو إنه يجيك واحد هاكر مسوي ذيب ويسويله موقع مثلا يشبه بشكله موقع الهوتميل ... ويوزع هالموقع على الناس ويوهمهم إن هالموقع هو تبع الهوتميل ...
ونجي احنا يا غافل لك الله ... نحط ايميلنا وباسووردنا على أساس إنه الموقع الرسمي ونكتشف إن الموقع نصبة وباسووردنا انسرقت وصارت عند أبو الشباب وراحت علينا ...
هذي المشكلة لها عدة حلول مقترحة .. فمثلا بعض أنظمة التشغيل ما تطلعلك شاشة الـ Log in إلا عند الضغط على أزرار معينة ...
مثل الويندوز عشان تدخل بحساب الـ Administrator لازم تضغط Alt+Ctrl+Del مرتين ... وبهالشكل نضمن إن الشاشة هذي هي حقة الويندوز الأصلية وماهي واجهة مسويها واحد وكاذب علينا فيها ...
واحنا كمان عشان نتجنب الوقوع في مثل هالمقالب .. لازم قبل لا ندخل كلمة السر حقتنا نتأكد إن الموقع اللي احنا جالسين نعطيه كلمة السر هو الموقع الأصلي ... وأي ايميل يجينا ويقول إنه بنك أو شركة وإنك لازم تحدث بياناتك من هالكلام ما نصدقه إلا بعد ما نتأكد من البنك نفسه أو الشركة نفسها ...
ندق عليهم بالتلفون أو نروح ندخل بنفسنا لموقع الشركة الأصلي ونشوف هل الإيميل اللي جانا صحيح منها ولا كذبة ...
2- Password Guessing وبالعربي ((تخمين كلمة المرور)) : وهو إن يجيك واحد ثاني كمان مسوي ذيب ويسويله برنامج يقعد يتوقع كلمات مرورنا ويحاول ... وبس تضبط معه وحدة يدخل فيها على حسابنا الشخصي ويتليقف ويحوس أوراقنا كلها ...
هذا يا طويلين العمر عشان نكون احنا (أذيب) منه ... لازم نتبع التالي:
(1) لا تستخدم باسوورد افتراضية أو باسوورد فاضية ...
(2) الباسوورد على الأقل تكون 8 خانات ... ولو 10 أحسن وأحسن ... وكل ما زادت كان أحسن ...
(3) الباسوورد لازم ما تكون كلمة من القاموس ...
(4) ما تكون شي انت تحبه وغيرك يعرف عنه ... يعني ما تكون أكلة انت تحبها والكل يعرفون إنك تحب هالأكلة ... لأن كذه يكون سهل توقعها ...
(5) لازم تكون الباسوورد عبارة عن خليط من الحروف والأرقام والرموز ... والحروف تكون كبيرة وصغيرة ...
(6) أهم شي تكون الباسوورد سهل تذكرها ... عشان ما تكتبها على ورقة وتشيلها بجيبك ... لو سويت كذه ممكن أحد يشوف الورقة ويعرف باسووردك ...
(7) حاول يكون لكل حساب على النت باسوورد خاصة فيه ... يعني المنتدى له باسوورد والايميل باسوورد ثانية وهكذا ...
(8) غيّر باسووردك كل 3 شهور على الأكثر ...
تقريبا هذي أهم النصايح ... سووها وأضمنلكم محد بيجي باسووردكم أبد لو يطامر ... وشوفوا السبب ...
الهاكر اللي بيسرق باسوورداتكم بيسوي حاجة بسيطة جدا ... بيسوي برنامج تخمين الباسووردات ويجرب كل باسوورد ويشوف ...
لو كان بيجرب كلمات القاموس الإنجليزي بس بيكون عنده أقل من 100 ألف محاولة ... ومتأكد لو جرب هالشي بيلقى كثيييييييييييييييييير ناس حاطين باسوورداتهم بهالشكل ...
ولو كان بيجرب كل الباسووردات المكونة من 8 حروف واللي تتكون من حروف انجليزية ... بيكون عنده تقريبا 200 مليار محاولة ...
طبعا انتوا تشوفون هالرقم كبير ... بس بأجهزتنا الجديدة مو كبير أبد ... 200 مليار محاولة تاخذ معه ساعة أو أقل يمكن ...
في 3 شهور ... برنامج تخمين الباسووردات ممكن يخمن حوالي تريليون باسوورد مكونة من 14 خانة !!!!
إذا كانت باسووردك تتكون من 8 خانات ... وعبارة عن حروف وأرقام ورموز ... يكون عند برنامج التخمين فرصة 1/1000 إنه يجيب باسووردك في ظرف 3 شهور ...
بهالحالة لو غيرت باسووردك كل 3 شهور تقريبا مافي أمل أحد يجيب باسووردك ببرامج تخمين الباسوورد البسيطة ...
طبعا في برامج تخمين باسووردات متطورة أكثر وتستخدم تقنيات أكثر وأسرع ... وهذي البرامج تقدر تجيب باسووردك بوقت أقل بكثير من الـ 3 شهور !!! وعشان تحمي نفسك من هالبرامج الخطيرة باسووردك لازم تكون 10 خانات أو أكثر ... وبهالشكل تضمن إن بـ 3 شهور محد يقدر يجيب باسووردك ...
هذي أهم نصايح للباسووردات عشان تحمي نفسك من الاختراق ومن لقافة الهاكرز ... بس تذكر أهم شي باسووردك تكون Easy to remember ... Hard to guess سهلة التذكر ... صعبة التخمين
طبعا ما ننكر بأن إيجاد باسووردات تلبي كل الشروط اللي فوق تعتبر تحدي لنا كبشر ... وشي صعب بصراحة ...
وعشان كذه صارت في دراسات كثير عشان تعطينا طرق نسوي فيها باسووردات تلبي هالشروط ...
أنا شفت طريقة حلوة وظريفة مقترحة في أحد الدراسات اللي قريتها وبأكتبها لكم وانتوا سووا على شاكلتها لو عجبتكم ...
هذا يقول لكم خذوا آية مثلا أو أنشودة أو مقطع شعر عاجبكم وتتذكرونه زين ... هو حاط مثال أغنية ...
وخذوا الحرف الأول من كل كلمة ... وحاولوا تلعبوا ببعض الكلمات وتحولوها لرموز تدل على معناها ...
المثال الجاي بيوضحلكم ...
هو كاتب المقطع التالي من أغنية يتذكرها ...
'Twinkle, twinkle little star how I wonder'
عندكم في كلمة star = نجمة ... ممكن احنا نحط بدالها *
ومن كلمة wonder خذ أول مقطع won قريب من كلمة one = واحد ...
وكلمة how = كيف ... أداة استفهام ... نحط بدالها ؟
فتصير الباسوورد ...
T,tl*?I1
وبهالطريقة ممكن احنا نسوي باسوورد خاصة فينا سهل نتذكرها ... وصعب غيرنا يخمنها ... وطبعا ممكن يكون عندنا طريقتنا الخاصة اللي تريحنا ...
وقبل لا أنسى ... أي باسوورد تنكتب بالنت تصير من ضمن قائمة الباسووردات السيئة ... فالباسوورد اللي فوق لا تستخدمونها
خلاص هذا كل اللي عندي عن الباسووردات وحمايتها ... وأي أحد منكم عنده أي إضافة أو أي استفسار أو اقتراح يتفضل ...
وانتظروا الجزء الثاني من الدرس وهو بعنوان ... برامج الأنتي فايروس وكيف نستخدمها الاستخدام الصحيح ...
لاخ ميشو يعطيك العافيه مجهود رائع والله انت قاعد تنبهنا على اشياء الواحد كان يجهل فيها في استفسار بسيط الله لايهينك اغلب اللي يخترقون يخمنون ارقام معين انا ققلت ارقاام
يعني لوحطينا ارقاام وحرووف ماراح يكون يقدر يسوي شي
سلسلة دروس الود التعليمية (من الألف للياء) .. حماية حاسبك الشخصي .. وحساباتك الشخصية
ميشو 
العرض العادي
